¿Kunas estresajja?

Jan walin uñjasktan ukhajja, cuerposajj jankʼakiw jarkʼaqasiñatak wakichtʼasi, ukaw estrés satajja. Lejjwejja, walja hormonanakwa utjayi, ukanakaw taqpach cuerposar phoqanti. Ukhamätapatjja, chuymajj jukʼamp ratukiw putoqe, wilas vena manqhan jukʼamp chʼamampiw sari, ratukirakiw maynejj samaqe, musculonakas wali durow tukjje. Ukanak cuerposan pasaskatap janïr amuyasktan ukhaw cuerposajj jan walit jarkʼaqasiñatak wakichtʼasjje. Jan estresatäjjtan ukhajja, cuerposajj kunjamäñapäkitï ukaruw kuttʼjjaraki.

ESTRESAJJ YANAPTʼISTASPAWA, JAN WALTʼAYARAKISTASPAWA

Estresajja, jan walin uñjasktan ukhaw cuerposar yanaptʼi. Pʼeqe manqhanwa ukajj qallti. Mä jukʼa estresatäñajja, jankʼak kuns lurañataki, kuntï amtktan uk phoqañataki, mä kun sum lurañatakiw yanaptʼistu. Sañäni, examen churañataki, trabajon katoqayasiñatak parltʼir sarktan ukha, ukat yaqha ukhamanakanwa yanaptʼistu.

Ukampis jaya tiempo estresatäñasa, sapa kuti estresasiñas jan waltʼayistaspawa. Wali estresatakïsksna ukhajja, usuntsnawa, jankʼakiw kunats colerjjsna, llakisjjaraksna, kuns armasjjaksnawa, janiw sum amuytʼasjjsnati, kunats sustjasjjaksnawa. Janiw kunjam jaqëktantï ukhamäjjsnati, mayninakampis janiw sum apasjjsnati. Maynejj sinti estresatäjje ukhajja, alcohol umañaru, droganakaru, qollanakaru, sinti manqʼañaru, yaqha ukhamanakaruw yatintjjaspa. Yamas yaqhepanakajja, llaki usumpiw usuntapjjaspa, jan chʼamaniw jikjjatasipjjaspa, jiwayasiñ kunwa munjjapjjaspa.

Cheqas janiw taqenis mä pachpak estresasktanti, ukhamäkchisa kunayman usunakampiw maynejj usuntaspa, estresajj taqpach cuerporuw jan waltʼayarakispa.