Kunsa yaqhepanakajj creyipjje

Hinduismo

Kunanaktï aka vidansa jan ukajj nayra vidans lurktan ukarjamaw tʼaqestanjja, sasaw hinduistanakajj creyipjje. Kunayman cuerpon nasiñ tukuyjje (moksha) ukhakiw maynejj jan jukʼamp tʼaqesjjeti, ukatakejj akapachan taqe llakinakapatwa amuyup jayarstʼayañapa sasaw sapjje.

Islam

Musulmananakajj jucha kawsaw tʼaqesiñajj utji, Diosarojj qhawqsa confiytan ukatak mä yantʼawa sasaw creyipjje. Sociedad Islámica de América del Norte ukan presidentepäki, Sociología toqet yatjjatatäkaraki uka Sayyid Syeed chachajja, ‘kuna bendicionanaktï Diosajj churkistu ukanakat yuspärañataki, yanaptʼa munapki ukanakar yanaptʼañatakiw tʼaqesiñajj amtayistu’ sasaw amuyi.

Judaísmo

Judionakan costumbreparjamajja, luratanakasatsa tʼaqesksna ukhamawa. Maysa toqetjja, yaqhep judionakajj jiwatat jaktañaw utjani, ukhaw khitinakatï cheqaparjam jan uñjatäpkäna ukanakajj cheqaparjam uñjatäpjjani sasaw sapjje. Ukampis judaísmo místico jan ukajj judaísmo cabalístico ukanakajj jiwjjasin yaqha cuerponsa maynejj mayamp jakkaspa, ukhamatsa maynirojj juchanakapat kutsuyañatak tiempojj churaskaspa ukhamwa yatichapjje.

Budismo

Budistanakajj kutin kutiniw nastan, ukatjja jakkasajj jan wali munañanakasata, luratanakasata, amuyunakasat salvasiñkamaw tʼaqestan sasaw creyipjje. Mä jaqetï yatiñan jaqer tukuspa, suma luräwinak luraspa, amuyupas qʼomäspa ukhajja, taqe tʼaqesiñanakajj tukusjje (nirvana) ukanjja wali utjirinïspawa sasaw amuyapjjaraki.

Confucianismo

Diccionario de religiones comparadas ukarjamajja, confucianismo ukankirinakajj “jaqen pantjasitapata ukat jan wali luratanakap” laykus tʼaqesiñanakajj utjkaspa ukhamwa creyipjje. Ukankirinakajja “suma luräwinak” lurasaw tʼaqesiñanakajj jukʼaptayasispa sasinsa creyipkchejja, “jaqet sipan wali chʼaman espiritunak toqekiw tʼaqesiñanakajj chhaqtayasispa. Ukatwa jaqenakajj kuntï uka chʼaman espiritunakajj amtapki ukanakar iyaw sapjjañapa” sasaw amuyapjje.

Religiones tribales

Religiones tribales ukankirinakat yaqhepajja, layqasiñ utjipanwa tʼaqesiñanakajj utji sasaw sapjje. Yaqhep jaqenakajja, layqanakaw maynirojj sumarusa jan ukajj jan walirus puriyaspa sasaw creyipjje, ukatjja costumbrenakaparjam lurasakiw ukanakat jarkʼaqassna sasaw amuyapjjaraki. Ukatwa kunapachatï mä jaqejj usunti ukhajj mä yatirir jawsapjje, ukhamat layqanakan jan wali luratanakapat jarkʼaqasiñataki ukat costumbrenakaparjam lurasin qollaqayasiñataki.

Cristianismo

Cristianonakajja nayrïr chacha warmin juchachasipjjatap laykuw tʼaqestanjja sasaw sapjje, Bibliankir Génesis libros ukhamwa saraki. Ukampis, cristianöpjjtwa sirinakat waljanejj amuyunakaparjamakiw parlapjjaraki. Sañäni, yaqhep catoliconakajja tʼaqesitanakap Diosarus mä ofrendjam loqtapkaspa ukhamwa creyipjje, ukhamat iglesiapar bendisiyañataki jan ukajj yaqha jaqenakar salvañataki.