Munasiñampiw mayninakar uñjañasa

¿Kunatsa?

Janiw mä akatjamatak yaqhachañajj chuymasan chhaqtkaspati. Mä usut qollasiñatakejj tiempo ukhamarak chʼamachasiñaw wakisi, yaqhachañ usut qollasiñatakejj ukhamarakiw ukanakajj wakisi. ¿Kunanakas mayninakar jan yaqhachañatakejj yanaptʼistaspa?

¿Kunjamsa Bibliajj yanaptʼistaspa?

Fotonaka: 1. Asia cheqat jutir mä chachaw café apaskir chʼiyar jañchin mä chachatakejj punku jistʼararapiski. 2. Uka chʼiyar jañchini chachasti trabajir masinakapar café churaskaraki, pasïr foton uñjkayätan uka India markat jutir warmirus churaskarakiwa.

“Munasiñamp isthapisipjjam, munasiñajj wali sum mayachthapi” (COLOSENSES 3:14).

¿Kunsa ukajj yatichistu? Mayninakar yanaptʼañajj taqenin mayachtʼatäñatakiw yanaptʼistu. Jaqenakar munasitas luratanakasamp uñachtʼayañäni ukhajja, janiw khitirus yaqhachjjañäniti, janirakiw chuymasan khitirus uñisjjañäniti.

¿Kunsa lursna?

Fotonaka: 1. India markat jutir mä warmimpiw janqʼo jañchin mä jilïr warmejj gradanak makatañataki, cosasanakap apkatañataki yanaptʼayasiski. 2. Uka janqʼo jañchini warmisti, pasïr foton Asia cheqat jutir chachar uñjkayätan ukaruw galletanak wajjtʼaski.

Kawkïr kasta jaqerutï yaqhachktan ukanakarojj kunjamsa munasiñ uñachtʼaysna uka toqetwa lupʼiñasa. Ukatakejj janiw kuna musparkañanak lurañajj wakiskapuniti. Jan ukasti akanakwa lursna:

Mayninakar munasiñatak chʼamachasiñäni ukhajja, janiw chuymasan yaqhachañajj utj-jjaniti.

Utansa yaqha cheqansa mantapjjañapatak punkwa jistʼararapsna, autot sarkasajj qontʼasipjjañapatakiw asientos chursna, jan ukasti yaqha ukhamanakwa lursna.
Janis jiwasan arus sum parlañ yatipkchejja, jupanakamp mä jukʼaks parltʼañatakiw chʼamachasiñasa.
Kunanaktï lurapki ukanak janis amuykchiñänejja, pacienciampiw jupanakar uñjañasa.
Sumwa jupanakar istʼañasa, kuna jan walinakansa uñjasipjje uk amuyañatakis chʼamachasiñasarakiwa.