¿Kunatsa tʼaqestan, chuymankipstan ukat jiwaraktan?

Nayrïr chacha warmin juchapatwa tʼaqestanjja

“Mä sapa jaqen juchapatwa juchajj akapachar mantani, jiwañajj uka juchan utjatapatwa mantaniraki, ukhamatwa jiwañajj taqe jaqenakar katunti, taqenin juchachasipjjatap layku” (ROMANOS 5:12).

Diosaw Adanampir Evampir luräna, amuyunakapasa cuerponakapasa perfectönwa. Mä paraíso jupanakar churarakïna, ukajj Edén jardín satänwa. ‘Taqe qoqanakatwa manqʼasipjjasma, ukampis mayatakwa janejj manqʼapjjätati’ sasaw Diosajj jupanakar säna. Ukhamäkchïnsa, Adanampi Evampejj kawkïr qoqattï jan manqʼapjjañapäkäna uka qoqatwa manqʼapjjäna, ukhamatwa juchar purtʼasiwayapjje (Génesis 2:15-17; 3:1-19). Jan istʼasirïpjjatapatwa, Diosajj Edén jardinat Adanampir Evampir alisnuküna. Ukhat aksaruw jupanakajj tʼaqesiñ qalltapjjäna. Tiempompejj wawanakapajj ukhamarakwa tʼaqesipjjäna. Qhepatjja taqeniw chuymankipstasajj jiwjjapjjäna (Génesis 3:23; 5:5). Jiwasajj Adanampin Evampin wawanakapätas laykuw usunttansa, chuymankipstansa, jiwaraktansa.

Demonionakan utjatap laykuw tʼaqesiraktanjja

“Jiwasanakajj Diosat jutatas yattanwa, ukampis akapachajj Supayan amparapankiwa” (1 JUAN 5:19).

Supayajja jan ukajj Diablojja, Dios contra saytʼiri mä angelawa (Juan 8:44; Apocalipsis 12:9). Tiempompejja yaqha angelanakaw Supayampejj mayachtʼasjjapjjäna, ukhamatwa demonionakar tukjjapjjäna. Uka demonionakajja, engañjasaw Diosat jaqenakar jitheqtayapjje, jan walinak lurapjjañapatakiw chʼamañchapjjaraki (Salmo 106:35-38; 1 Timoteo 4:1). Supayampiru demonionakampirojja, jaqenakar tʼaqesiyañajj wal gusti.

Jan suma amtanakar puritasatwa tʼaqestanjja

“Kuntï maynejj phawki, ukrakwa apthapini” (GÁLATAS 6:7).

Nayrïr chacha warmin juchapata ukhamarak Supayan akapachar apnaqatapatwa awisajj tʼaqestanjja. Ukampis awisajj jiwaspachpaw jan waltʼayasiraksna. Amuytʼañataki, sumanak lurktan ukhajj kusisitätanwa, jan walinak lurktan jan ukajj jan wali amtanakar purktan ukhajja, jan walinwa uñjasiraktanjja. Sañäni, wawanakani mä awkejj honradöki, wali trabajtʼirïki, familiaparus wal munaskaraki ukhajja, familiapan kusisit jakasiñaw utji. Ukampis awkitï qollqe layku anatchi, machantaschi, jan trabajiñ munkchi ukhajja, familiapajj pobrew uñjasini. Ukatwa Diosan ewjjtʼanakaparjam sarnaqapjjañasa, jupajj kunatï sumäki ukanak jikjjatañaswa muni, suman jakassna ukwa munaraki (Salmo 119:165).

‘Qhepa urunakan’ jakatas laykuw tʼaqesiraktanjja

“Qhepa urunakanjja [...] jaqenakajj akhamäpjjaniwa: jupanak pachpa munasirinaka, qollqe añcha munirinaka [...], awkiparus taykaparus jan istʼirinaka [...], munañapampi apnaqayasirinaka, qhorunaka, kunatï walïki uk uñisirinaka” (2 TIMOTEO 3:1-5).

Jichhürunakanjja walja jaqenakaw kunjamtï uka profeciajj siski ukhamäpjje, ukaw akapachan ‘qhepa urunakapan’ jakatas uñachtʼayi. Bibliajja guerranaka, manqʼat pistʼañanaka, terremotonaka, usunakaw utjani sasaw nayratpach säna (Mateo 24:3, 7, 8; Lucas 21:10, 11). Jichhürunakan walja jaqenakaw uka kawsa tʼaqesipjje jiwapjjaraki.