¿Celularajj jan waltʼayistaspati? Amigonakasampi
Jichhürunakanjja, maynejj yaqha markankiri mä jaqempejj facilakwa parltʼaspa. Akanak toqew jupampejj parltʼaspa: mensajes de texto, correo electrónico, videoconferencias, redes sociales ukanak toqe. Ukhamasti celularajj ukanakan wal yanaptʼistaspa.
Ukampis khitinakatï celular toqekpun amigonakapampi parlapki ukanakarojja akanakaw pasaspa:
Amigonakapat janiw sinttʼasjjapjjeti.
Sapakïpkaspas ukhamwa amuyasipjje.
Jupanak pachpatakwa jukʼamp llakisipjje.
AKWA YATIÑAMA
MAYNINAKAT SINTTʼASIÑA
Mayninakat sinttʼasiñatakejja, maynejj kunjamäskisa uk amuytʼañatakiw chʼamachasiñasa. Ukampis jiwasatï kunanakas redes sociales ukanakar apkatasi ukanak uñasa, mensajenak apayasa wali ocupatäskañäni ukhajja, maynejj kunjamäskisa uk janiw amuyksnati.
Celularatï jakäwiman nayrankchejja, tiempompejj amigonakaman mensajenakap jaysañajj chʼamäkaspas ukhamwa amuyjjasma. Ukatwa taqeniru mensajenakap ratuk contestasma, ukampis janiw amigonakaman yanaptʼa munapjjatap amuyjjasmati.
AK AMUYTʼAM: Amigonakamampi celularat parlkäta ukhajja, ¿kunjamsa jupanakat sinttʼasitam uñachtʼayasma? (1 PEDRO 3:8).
SAPAKJAM AMUYASIÑA
‘Wali uñtʼata mä red social walja tiempo uñasajja, walja jaqenakajj llakitakiw uñjasjjapjjäna’ sasaw yatjjattʼatanakajj sapjje. “Yaqhanakan fotonakap uñañasa, kunanaktï mayninakajj ukanakat comentapki ukanak liyiñasa, janis jiwasajj jakäwisan kuns lurjjsna ukhamwa amuyayistaspa” sasaw yatjjattʼatanakajj sapjjaraki.
Kuna sumanaktï mayninakajj lurapki ukanakan fotonakap uñsna ukhajja, jupanakjamäñwa munjjsna. Jiwasanakat sipansa jukʼamp kusisitas jakasipkaspa ukhamwa amuyjjaraksna.
AK AMUYTʼAM: Redes sociales ukanak apnaqasajja, ¿kunsa mayninakampi jan igualayasiñatakejj lurasma? (GÁLATAS 6:4).
MAYNITAK LLAKISIÑA
“Yaqhep yateqerinakajja, jupanakatakikiw kuns munapjje. Jupanakar yanaptʼapki, jupa toqet saytʼasipki uka amigonakakwa thaqapjje” sasaw mä profesorajj säna.a Ukham amigonak thaqerinakajja, jupanak pachpatakwa llakisipjje. Maynejja amigonakaparojj celularanakäpkaspas ukhamwa uñj-jjaspa. Ukatwa kuna ratutï jupajj munki ukhak amigonakapar thaqaspa, jan munki ukhasti janiw jupanakat amtaskaspati.
AK AMUYTʼAM: Kunanaktï Internetar apkatkta ukajja, ¿atip atip kun lurañ munirïtama, juma pachpatak llakisitamti uñachtʼayi? (GÁLATAS 5:26).
AKWA LURASMA
KUNJAMSA CELULAR APNAQTA UK AMUYTʼASIM
Jumatï celular wali amuyumpi apnaqäta, janirak jakäwiman nayrankkani ukhajja, amigonakamampejj wali sumwa parltʼasïta, jupanakampis jukʼamp sumwa apasirakïta.
BIBLIAJJ AKHAM SIWA: “Munasir jaqejj [...] janiw kunatï jupatak walïki ukak thaqkiti” (1 CORINTIOS 13:4, 5).
Aka ewjjtʼanakat kawkïrinaksa lurañ munta uk amuytʼam, jan ukajj kunsa lurañ munta uk qellqtʼasim:
Mensajes de texto, correo electrónico ukanak toqe parlañat sipansa, amigonakajampi jikisis parltʼaña.
Mayninakamp parlkä ukhajj celular jaytaña jan ukajj amuktʼayaña.
Redes sociales ukanak jan sint uñaña.
Mayninakar istʼañ yateqaña.
Jan walin uñjasipki uka amigonakajar jawsaña.
a En defensa de la conversación sat librorjama.