¿Celularajj jan waltʼayistaspati? Wawanakasaru
Jilïr jaqenakatakejja, celular apnaqañ yateqañajj chʼamakïspawa, ukampis wawanakatakejj uk apnaqañajj wali facilakiwa.
Wayn tawaqonakajj walja tiempo celular apnaqapjje ukhajja, aka jan walinakanwa uñjasipjjaspa sasaw yaqhepajj sapjje:
Celularar wal yatintapjje.
Internet toqejj jan walinakwa yaqhanakar sapjje, jan ukajj yaqhanakaw jupanakar jan waltʼayapjje.
Janis thaqapkchejja, pornografía uñchʼukiñaruw purtʼasipjje.
AKWA YATIÑAMA
INTERNETAR YATINTAÑA
Kunanakatï Internetan utjki ukanakat yaqhepajj jan jaytañjamäspawa. Sañäni, Internet toqe anatañanakajja, jaqenakan yatintapjjañapatak luratawa. En defensa de la conversación sat librojj akham siwa: “Aplicacionanakajja, jaqenakan ukar yatintapjjañapatak luratawa” sasa. Kunapachatï jaqenakajj aplicacionanakan uñstki uka anuncionak uñapki ukhajja, uka anuncionak uchir empresanakajj jukʼamp qollqwa ganapjje.
AK AMUYTʼAM: ¿Wawanakamajj celulara jan ukajj tabletakti uñasipki? ¿Kunjamsa jan ina chʼusar tiempo aptʼasipjjañapatak yanaptʼapjjasma? (EFESIOS 5:15, 16).
MAYNINAKAR JAN WALTʼAYAÑA
Yaqhep jaqenakajja Internet apnaqasajj jukʼamp qhoru, jan walinak parliri, jan sinttʼasiri ukhamaw tukupjjaspa. Ukatwa jupanakajj mayninakar jan waltʼayapjjaspa.
Wali uñtʼatäñ munasa ukhamarak mayninakajj jupat wal parlapjjañap munasaw yaqhepajj ukham jaqenakar tukupjje. Yaqhepanakasti, mayninakajj mä fiestar jan invitapki ukhajja jupar jiskʼachapkaspas ukhamwa amuyasipjjaraki.
AK AMUYTʼAM: ¿Wawanakamajj Internetan jan walinakti mayninakar lurapjje? (Efesios 4:31). ¿Mayninakajj jan invittʼapki ukhajj kunjamakis wawamajj jikjjatasi?
PORNOGRAFÍA UÑCHʼUKIÑA
Jichhürunakanjja Internetan qʼañu lurañanakani lugaranakar mantañajj facilakiwa. Kunanaksa wawanakajj uñapjje ukanak yatiñ awk taykanakajj puedipkchisa, janiw wawanakarojj jan walinakat jarkʼaqapkapuniti, wawanakajj jan walinak uñchʼukisipkakiwa.
Mensajenak toqe jan wali fotonaka apayasasa jan ukajj katoqasasa, maynejj autoridadanakamp juchañchataw uñjasispa. Awisajja markan utjki uka leyinakarjamajja, jan wali fotonak yaqhanakar apayirinakajja, pornografía infantil kawsaw juchañchat uñjasipjjaspa.
AK AMUYTʼAM: Internetan jan wali fotonak jan uñañapataki jan ukajj jan apayañapatakejj ¿kunjamsa wawamar yanaptʼapjjasma? (EFESIOS 5:3, 4).
AKWA LURASMA
WAWANAKAMAR SUM YATICHAPJJAM
Wawanakatakejj celulara tableta jan ukajj yaqha ukhamanak apnaqañajj faciläkchisa, jupanakajj maynimpi yatichatäñwa munapjje. Uka toqet Indistractable (Indistraíble) sat mä librojj akham siwa: ‘Jan sum apnaqañ yatkipana wawar mä celular churañajj jan walipuniwa’ sasa.
BIBLIAJJ AKHAM SIWA: “Wawarojj kawkïr thaknamas sarañapa uk yaticham, jilïrëjjani ukhasa janiw uka thakit jitheqtkaniti” (PROVERBIOS 22:6).
Aka ewjjtʼanakat kawkïrinaksa lurañ munta uk amuytʼam, jan ukajj kunsa lurañ munta uk qellqtʼasim:
Internet apnaqasajj jan yaqhanakar jan waltʼayañapatak wawajamp parlaña.
Jan invittʼapkani ukhajj jan chuym ustʼayasiñapatak wawajamp parlaña.
Wawajajj Internetan jan walinak jan uñchʼukiñapatak kunatï wakiski uk luraña.
Celularapan kunanakas utji jan ukajj kunanaksa uñaski ukanak revisaña.
Qhawqha tiempsa wawajajj urun celular uñani uk amtaña.
Arumanakajj cuartopan celular jan utjañapa wawajar jarkʼaña.
Manqʼañ horasan celular jan apnaqañapa wawajar jarkʼaña.