Aka oraqejj sumar tukuyatäjjaniwa sasaw Diosajj arsuwayi

Aka oraqejj marat maratjamajj qhawqha juntʼöjjesa uka toqet yatjjatir cientificonakaw ukham sapjje. Jumatï taqe kun Luriri Diosan utjatapar creysta, jupajj jiwasat llakisitap creyiraksta ukhajja, Diosajj aka oraq jupa pachpa sumar tukuñapatak kunanaktï lurawayki ukanakatwa cientificonakan uka arunakapajj piensaypachätam.

Jaqenakajj aka oraq wal qʼañuchapjje, ukatwa oraqejj jupa pachpa jan sumar tukkaspati. Aka oraqesa ukat ukan jakañ vida utjaskakiñapatakis Diosaw yanaptʼani sasajj ¿kunatsa confiysna?

Recuadron uñstki uka textonakajja, aka oraqejj utjaskakiniwa, jakañ vidas ukan utjaskakiniwa sasin confiyañatakiw yanaptʼistu.

• Diosaw aka oraqe lurawayi. “Qalltanjja, Diosaw alajjpachsa oraqsa luräna” (Génesis 1:1).

• Diosaw aka oraqen dueñopajja. “Oraqesa taqe kunatï ukan utjki ukanakasa Jehováa Diosankiwa” (Salmo 24:1).

• Aka oraqejj wiñay utjaskakiñapatakiw Diosajj lurtʼawayi. “Oraqjja cimientonakapjjaruw uttʼayäna, wiñayans wiñayapatakejj janipuniw oraqejj lugarapat onjjtayatäkaniti” (Salmo 104:5).

• Aka oraqen jakäwejj utjaskakiniwa sasaw Diosajj arsuwayi. ‘Cheqpach Diosaw oraq luri, janiw aleq ukhamakïñapatak oraq lurkiti, jan ukajj jaqenïñapatakiw luri’ (Isaías 45:18).

• Wiñayatakiw jaqenakajj aka oraqen jakapjjani sasaw Diosajj arsuwayi. “Cheqap sarnaqer jaqenakaw oraq katoqapjjani, wiñayatakiw ukan jakapjjarakini” (Salmo 37:29).

Kunanakatï aka oraqen utjki ukanak sum cuidañäni ukhajja, oraqejj janiw jan waltʼayat uñjaskaniti. Diosaw ukhamäñapatak lurawayi. Biblian profecianakaparjamajja, khitinakatï jupatakik munasa oraq jan waltʼayasipki ukanakajj kunapachas tukjat uñjasipjjani uk Diosajj amtawayjjewa (Apocalipsis 11:18).

Oraq jan waltʼayirinakajj tukjatäjjapjjani uka pasatatjja, Diosajj aka oraq mä suma paraisoruw tukuyjjani. Ukatjja amparap jistʼarasajj “kunanaktï taqe jakirinakajj munapki ukanakwa jupanakar chur[ani]” sasaw Bibliajj qhanañchi (Salmo 145:16).