¿Mayni pachpar respetasiñajj utjaskiti?

MAYNI PACHPAR RESPETASIÑAJJ KUNATSA WALI IMPORTANTEJJA

Khititï mayni pachpa respetaski ukajja, problemanakarojj jan kunakiw saykati, janirakiw facilak aynachtʼkiti.

Khitinakatï jupanak pachpa jan respetasipki ukanakajj llakitaw jikjjatasipjje, yaqhepajj llaki usunïpjjewa, yaqhepajj manqʼañs janiw munjjapjjarakispati sasaw yatjjatatanakajj sapjje. Ukat alcohol umañanakaru droganakampi qolljasiñanakaruw purtʼasipjjaspa sasaw sapjjaraki.
Khitinakatï jupanak pachpa respetasipki ukanakajja, janiw mayninakampejj igualayasipkiti, ukatwa mayninakampejj sum apasipjje, suma amigonakäpjjarakiwa. Maysa toqetjja, jupanak pachpa jan añch respetasirinakajj mayninakat jan wal parlapjje. Ukham lurasajj mayninakampejj janiw sum apasjjapjjeti.
Problemanakan uñjaskasajja, jupa pachpa respetasipki ukanakajj janiw facilak aynachtʼapkiti. Kunanak lurañti amtapki ukanak phoqañatakis janiw kunampis jarktʼayasipkiti. Ukampis khitinakatï mä jukʼak jupanak pachpa respetasipjje ukanakajja, mä jiskʼa jan waltʼäw jachʼa problemäkaspas ukhamwa uñjapjje, ukham amuyasajj facilakiw aynachtʼapjjaspa.

KUNSA JUMAJJ LURASMA

Jumar yanaptʼir amigonak ajllisim. Khitinakatï respetasirïpki, jumat cheqpachapun llakisipki ukat jakañ vidamansa yanaptʼapkiristam jupanakamp chikachasim.

“Cheqpach amigojja taqe tiempon munasiriwa, mä cheqpach amigojja jan walinakajj utjki ukhajj mä jilar uñtasitawa” (Proverbios 17:17).

Yaqhanakar yanaptʼam. Jumatï mayninakar sum uñjäta yanaptʼarakïta, jan kuttʼayañs puedipkätam ukanakar yanaptʼarakïta ukhajja, kusisitaw jikjjatasïta. Janis uka luratamat khitis yuspärkchïtamjja kusisitakïskätawa.

“Katoqañat sipansa churañanwa jukʼamp kusisiñajj utji” (Hechos 20:35).

Wawanakamarojj jupanak pachpa respetasipjjañapatak yanaptʼam. Wawanakaman problemanakapajj utji ukhajja, jupanak pachpa askichapjjañapatakiw yanaptʼapjjasma. Ukhamatwa jachʼa problemanakan uñjasipjjani ukhajj jan aynachtʼapkaniti. Jupanak pachpa respetasiñsa yateqapjjarakiniwa, ukaw jilïrëjjapjjani ukhajj yanaptʼarakini.

“Wawarojj kawkïr thaknamas sarañapa uk yaticham, jilïrëjjani ukhasa janiw uka thakit jitheqtkaniti” (Proverbios 22:6).

Jehová Diosan mä testigopajj mä warmiruw cafeterian Bibliat yatichaski.

JEHOVÁ DIOSAN TESTIGONAKAPAJJ KUNSA LURAPJJTA

Jehová Diosan Testigonakapan reunionanakapasa, Bibliat yatichañatak utjki uka programasa jaqenakan sum jakasipjjañapatakiw yanaptʼi. Ukhamat jupanak pachpa jukʼamp respetasipjjañapataki.

SEMANAN APASKI UKA REUNIONANAKA

Semanan apaski uka reunionanakanjja, Bibliat apstʼat discursonakwa istʼapjjta. Ukanakaw mayni pachpar respetasiñatak yanaptʼapjjetu. Ukar sarañatakejj janiw qollqejj mayiskiti, khitis sarakispawa. Ukanjja akanak yateqäta...

... Diosatakejj jumajj kunatsa importantëta.
... kunjamsa cheqpach jakasiñ jikjjatasma.
... kunjamsa suma amigonak jikjjatasma.

Cheqpach amigonak jikjjatätawa, jupanakajj cheqpachapuniw mayninakat llakisipjje (1 Corintios 12:25, 26).

Reunionanakajj kunjamasa uk yatiñatakejja, Internetan jw.org cheqar mantasajj ¿Kunjamsa tantachäwinakajj apasi? sat video uñtam.

BIBLIAT MAYNIR YATICHAÑA

¡Wiñayatakiw kusisit jakasisma! sat librompiw Bibliat gratisak jaqenakar yatichapjjta. Uka librojja jaqenakajj textonakat sum entiendepjjañapataki, yaqha toqenakat amuytʼapjjañapatakejj jisktʼanakaniwa. Fácil amuykay yatichäwinakas chuymar purtʼkir videonakas fotonakas utjarakiwa. Jaqenakar Bibliat yatichapkta ukhajja, jupanakajj kusisita ukat sumakiw jikjjatasipjje.

Jehová Diosan Testigonakapampi Bibliat yateqañajj kunjamsa yanaptʼiristam ukat toqet jukʼamp yatiñ munsta ukhajja, Internetan jw.org cheqar mantasajj ¿Kunatsa Bibliat yatjjatañama? sat video uñtam.