¿TAQE KUN JILJJATTATAPAT KUNS LURSNA?

Qollq amuyump apnaqañasawa

Taqe kunan jiljjattatapajj inas qollqe pistʼañan uñjasiychistaspa. Ukampis janiw llakisiñasäkiti, kuna laykutejj qollqet jan pistʼañatakejj mä kuns lurapunsnawa.

¿KUNATS IMPORTANTEJJA?

Janitï qollq sum apnaqkañänejja, ina chʼusarukiw qollq aptʼassna, taqe ukanakajj jukʼampiw llakisiyistaspa. Jukʼa qollqenikïkstansa walja yanaptʼanakaw qollq jan ina chʼusar tukjañatakejj utji.

¿KUNSA LURSNA?

Utjkistu ukarjamak jakasiñäni. Ukham lurasajj janiw llakit jikjjataskañäniti, ukat akatjamat jan walin uñjasiñäni ukhajja, utjkistu uka qollqempejj facilakwa yanaptʼayasiñäni.

Qhawqhatï utjkistu ukarjam jakañatakejja, qhawqhsa gantan uk qellqtʼasiñasawa, kuntï necesitktan ukanakat amuytʼañasawa, ukat kunjamsa qollq gastañäni ukanaks qelllqtʼasiñasarakiwa. Qhawqhatï gastañasäki ukak gastañäni, ukat taqe kunas jiljjattani, qhawqtï gankayätan ukas jukʼakïjjarakini ukhajj ukarjamaw gastonak mayjtʼayañasa. Maynitï casadöchi ukhajja, janïr mä amtar purkasajj esposoparu jan ukajj esposaparuw jisktʼañapa.

Akwa lursna: Mä kun alasisajj jukʼat jukʼat pagañat sipansa uka ratpachaw pagañasa. Ukham lurañajj waljaniruw qollq sum apnaqañataki ukat jan manunïñatak yanaptʼawayi. Maysa toqetjja, bancon qhawqha qollqenïtansa uk uñakiptʼañatakis tiemp apstʼasiñasarakiwa. Qhawqha qollqsa gastsna uk yatisajj janiw añch llakisjjañäniti.

Qhawqha qollqetï utjkistu ukarjamak jakañajj chʼamakïspawa. Ukampis gastañatakejj qhawqha qollqekis utjistu uk sum amuytʼasiñajj jan sint llakisiñatakiw yanaptʼistani.

‘Qhawqhas munasini uk amuykiptʼam’ (Lucas 14:28).

Trabajos jan aptʼasiñäniti. ¿Trabajo jan aptʼasiñatakejj kunanaksa lursna? Horasaparuw puriñasa, kunanakas trabajosat gustistu ukanakatwa lupʼiñasa. Kunanak lurañatï wakiski uk jan kamskataw lurañasa, wali trabajtʼirïñasawa, respetasirïñasarakiwa. Kun lurañtï mayipkistu ukarjamaw trabajiñasa, jukʼamp suma trabajirïñatakiw chʼamachasiñasaraki.

Qollq jan ina chʼusar tukjañäniti. Akham jisktʼasiñäni: “¿Kunanakatï nayatak jan walïki ukat kunanaktï jan necesitkta ukanakarut qollq gastjja?” sasa. Walja jaqenakajja droganakaru, qollqet anatañaru, cigarro fumañanakaru ukat alcoholani umañanakaruw qollq tukjapjje. Ukham lurasajj cuerpoparuw jan waltʼayapjjaspa, trabajsa aptʼasipjjarakispawa.

“Khititï yatiña jikjjatki ukajj kusisitawa […]. Qollqe jikjjatañat sipansa jukʼamp sumawa” (Proverbios 3:13, 14).

Jan waltʼäwitak qollq imasiñäni. Puedstan ukhajja, mä jan waltʼäwitakisa jan ukajj mä gastotakis mä jukʼa qollqe imasiñasawa. Uka qollqejja, jiwasasa, familiasat maynis usuntani jan ukajj jan trabajoni uñjasiñäni ukhaw jan sint llakisiñatak yanaptʼistani.

“Taqeniw jan waltʼäwi tiempon uñjasipjje, taqenirakiw akatjamat jan waltʼäwinakan uñjasipjje” (Eclesiastés 9:11).

Qollqe imasiñatak ewjjtʼanaka

Manqʼañanak utanwa wakichtʼasna

Restaurantet manqʼañasa jan ukajj alañas jukʼamp jilaruw mistuspa. Cheqas utan manqʼa phayañatakejj tiempow munasi, ukampis ukham lurañajj qollqe jan sinti gastañatakiw yanaptʼistaspa. Restauranten manqʼanakat sipansa jukʼamp sumwa utan phaytʼassna.

Kuntï necesitktan ukak alasiñäni

Janïr alasir sarkasajja mä listwa lurtʼasiñasa, ukakwa alañasaraki. Kunanaktï jan alañ pienskayätan ukanak jan alañäniti.
Puedstan ukat manqʼañanakajj baratokïchi ukhajj jilpachat alasiñasawa. Kawkjarus ukanak sum imasiñäni uks amuykiptʼañasarakiwa, ukhamat jan ina chʼusar wartañataki.
Kawkja cheqanakantï cosasanakajj menosäki sumäkaraki uka cheqanakatwa altʼassna.
Jakasktan uka cheqantï Internet toqe alañajj utjchi ukhajja, ¿janit uka cheqat alasksna? Awisajja, Internetan menos preciompiw mä kuns jikjjatsna, qollq jan sint gastañatakis yanaptʼarakistaspawa.
Baratöki ukhaw taqe kuns alassna. Ukat ofertanakajj jan utjkäna ukhajj qhawqsa gastayätan ukampiw igualtʼaysna. Luzatsa gasatsa umats qhawqsa pagtan ukanakamppachwa igualtʼayaraksna.

Kun alañatakis sum amuytʼañäni

Kawkïr empresanakatï celularanaka yaqha ukhamanak fabricapki ukanakajja, sapürutjamaw machaq modelonak uñstayapjje, ukhamat jukʼamp qollq ganañataki. Ukatwa akham jisktʼasiñasa: “¿Cheqapunit machaq celular alañajajj wakisi? Ukhamächi ukhajj ¿jichhpachat alañajäspa? Nayatï aläjja, ¿jichhak uñstki ukpunti necesittjja?” sasa.

Jan funcionjje uka aparatonak askichañäni ukat jan machaqpun alañäniti

Aparotanakasajj jaya tiempo aguantañapatakejj cuidañasawa. Wakischi ukhajj askichtʼaysnawa. Maysa toqetjja, qollq jan sint gastañatakejj janiw machaq alañapunejj wakiskiti.

Jiwas pachpaw manqʼañanak achuyassna

¿Manqʼañanak achuyañatakejj utasan camposajj utjiti? Ukajj qollq jan sint gastañatakiw yanaptʼistaspa. Aljañatakisa mayninakar wajjtʼañatakis utjarakistaniwa.

“Wal trabajtʼir jaqen amtanakapajja sumaruw sarani” (Proverbios 21:5).

“Kunanaktï sapür necesitapkta ukanakan precionakapajj jiljjattaskiti janicha uk uñakiptʼapjjapuntwa, ukat tarjeta de crédito uks wali amuyumpiw apnaqapjjarakta” (Miles, Inglaterra).

“Janïr alir sarkasajja, kunanaksa necesitapjjta ukatakejj familiajampejj mä lista lurtʼasipjjapuntwa” (Jeremy, Estados Unidos).

“Precionakajj jiljjatti ukhajja qhawqha qollqes munasini uk mayjtʼayapjjtwa, ukat mä akatjamat mä jan waltʼäwejj utjani ukatakis mä jukʼa qollq imasipjjaraktwa” (Yael, Israel).

“Mä kunas utan pʼakisi jan ukajj autos fregasi ukhajja, machaq alañat sipans wawanakajarojj jupanakpachpa askichapjjañapatakiw yatichapjjta. Esposajamp nayampejj kunanakatï jichhak uñstki ukanak jan alañwa amtapjjta” (Jeffrey, Estados Unidos).

“Qollq jan sint gastañatakejj naya pachpaw verduranak achuyta, mä qhawqha wallpanaks uywasiraktwa. Kuna verduranaktï achuykta ukanak yaqhanakar wajjtʼañatakis utjarakituwa” (Hono, Myanmar).

Mä chachajj huertopat walja verduranakwa apthapiski.