¿TAQE KUN JILJJATTATAPAT KUNS LURSNA?

Suytʼäwinïñasawa

Kawkjantï jakasktan uka cheqanjja, ¿qhawqha qollqtï ganasktan ukat sipans kunanaktï necesitktan ukanakajj jukʼamp jiläjjeti? ¿Familiasar manteniñatsa jan ukajj jiwas pachpar mantenisiñats llakitat jikjjatastanjja? Ukhamächi ukhajj jutïr urunakat llakispachätanwa. Jan walinakan uñjasstan ukhajja, mä suytʼäwinïñaw wal yanaptʼistaspa.

¿KUNATS IMPORTANTEJJA?

Suytʼäwinipjje ukanakajja, jutïrin sumaw jakasjjañäni sasaw confiyapjje. Kuna jan walinakantï uñjasipki ukanakar saykatañatakis wal chʼamachasipjjaraki. Sañäni, yatjjatasiwayki ukarjamajj khitinakatï suytʼäwinïpki ukanakajja:

Facilakwa jan walinakar saykatapjje.
Wakiski ukhajj cambionak facilakwa lurapjje.
Suma amtanakaruw puripjje, ukaw jan usuntañatak yanaptʼi.

¿KUNSA LURSNA?

Maya, kunjamsa Bibliajj jichhürunakan yanaptʼistaspa uka toqetwa amuytʼañasa. Bibliajja taqe kunan jiljjattatapat kunsa lursna ukatakejj walja ewjjtʼanakaniwa. Uka ewjjtʼanakajj jichhasa jutïrins jan walinak utjipan jan ukhamak jaytañataki jan ukajj mä kuns lurañatakiw yanaptʼistani.

“Suma amuytʼasirïñaw jumarojj sum uñjaskätam, amuytʼañaw jarkʼaqarakïtam” (Proverbios 2:11).

Paya, Bibliajj jutïrit kamsisa uka toqetwa amuytʼañasa. Biblian ewjjtʼanakapajj kunja yanaptʼkirisa uk amuyañäni ukhajja, jutïrit kamsisa uka toqet jukʼamp yatiñwa munañäni. Sañäni, kunjamsa Diosajj “mä suma suytʼäwi jutïritak” churañ munistu ukwa yateqañäni, uka suytʼäwir kunatsa confiysna uks yateqarakiñäniwa (Jeremías 29:11). Cheqas Diosan Reinopaw uka suytʼäwir confiyañatak yanaptʼistu.

¿KUNAS DIOSAN REINOPAJJA UKAT KUNSA LURANI?

Diosan Reinopajja alajjpachankir mä gobiernowa, taqe aka oraqpacharuw apnaqanirakini (Daniel 2:44; Mateo 6:10). Tʼaqesiñsa pisin jakasiñs qʼal chhaqtayani, taqeniw suman jakasiñäni taqe kunas sumaruw sararakini. Ukaw akjjar jutki uka textonakan uñjasi:

“Jumajj kusisïtawa, taqe kunas jumatak sum saratapatjja wal kusisirakïta” (Salmo 128:2).

Diosan Reinopamp apnaqatanakajja “Janiw inamayakejj wali chʼam tukus trabajipkaniti” (Isaías 65:23).

“Oraqenjja grano yapunakajj waljapunïniwa” (Salmo 72:16).

Kuntï Diosajj arsuwayki uk “jan kʼarisisaw” arsu sasaw walja millón jaqenakajj confiyapjje (Tito 1:2). Ukhamajj ¿kuntï Bibliajj yatichki uk yatjjatañ janit munkasma? Biblian utjki uka suytʼäwejj qollqet pistʼañar saykatañatakiw yanaptʼistani. Ukat jutïrin sum jakasiñaw utjani sasin confiyañatakiw yanaptʼarakistani.