Dinax jan waliruw purïna

¿KAWKIRUS Dinax saraski? Canaán uraqin utjasir tawaqunakar uñanttʼiriw sari. ¿Jacob tatapatakix ukax waliskpachati?, ¿kamsasmasa? Uk sañatakixa, Abrahamasa Isaacasa kamsapxirïnsa Canaán markankir warminakatxa uk amtañamawa.

¿Abrahamax Canaán markankir warmti Isaacatakix munäna? Janiwa. ¿Isaacampi Rebecampix Canaán markankir warmti Jacobutakix munapxäna? Janiwa. ¿Kunatsa uk yattati?

Kunattix Canaán markan utjasirinakaxa yaqha diosanakaruw yupaychapxäna. Janiw chachatakis ni warmitakis ni munat masitakis walipkänti, jan wali jaqinakäpxänwa. Ukatwa, Canaanankiri jaqinakampi Dinan chikachasitapaxa Jacob papitupatakix janiw walïkpachänti sisnaxa.

Dinax jan waliruw purtʼasi. ¿Dinar uñchʼukiski uka chach uñjtati? Siquem satawa. Mä urusti, Dinax saratayn ukhaxa, Siquemaw munkir jan munkir Dinampi ikintatayna. Ukax janipuniw walïkänti, kunattix casarat chachampi warmimpikiw ukham ikintasipxaspaxa. Siqueman Dinar uka jan wali luratapatxa, sinti jan waltʼañanakaw utjxäna.

Dinan jilanakapax uk yatisaxa, wal colerasipxäna. Simeonampi Levimpixa sintipuniw colertʼasipxäna, espadanak aptʼataw uka markar mantapxäna. Ukat mayni jilanakapampiw Siquemarus yaqha chachanakarus qʼal jiwarayapxäna. Ukham lurapxatapatxa Jacob tatapax wal colerasïna.

¿Kunjamatsa uka jan waltʼäwinakax qalltänxa? Diosar jan istʼir jaqinakampi Dinan chikachasitapatwa uka jan walinakax qalltäna. ¿Jiwasax jan wali jaqinakampix chikachasirakiñäniti? ¿Kamsasmasa?