Intiw saytʼi

JOSUÉ tatar uñtma. Akham saskiwa: ‘¡Inti, jan unxtamti!’ sasa. Ukat Intix saytʼiwa. Mä urpachaw intix saytʼäna. ¡Jehová Diosaw uk saytʼayäna! Kunatsa Josué tatax intin saytʼañap munpachän uk yatxatañäni.

Kunapachatï Canaán uraqin phisqa apnaqirinakaxa Gabaón marka contra sartapkän ukhaxa, gabaonitanakax Josué tatar yatiyiriw mä jaqi khitapxäna akham sasa: ‘¡Jankʼak jutapxma! ¡Qhispiyapxita! Qullunak tuqinkiri markanakaw jiwarayapxitani’ sasa.

Ukat jankʼakiw Josué tatampi soldadonakapampixa sarapxäna. Paqaraw sarapxäna. Ukat Gabaonar puripxäna ukhaxa uka phisqa apnaqirinakan soldadonakapax sustjataw chhuktxapxäna. Ukat Jehová Diosax jachʼa qalanakjam chhijchhintayäna, waljanirupuniw chhijchhix jiwarayäna, ukat mä qhawqhanirukiw Josué tatan soldadonakapax jiwarayapxäna.

Intix jalantirjamäxatapwa Josué tatax amuyäna. Chʼamakthapin ukhaxa uka phisqa apnaqirinakan soldadonakapax qhispipxaspaw sänwa. Ukatwa Josué tatax Jehová Diosar mayisïna, ukat akham sänwa: ‘¡Inti, jan unxtamti!’ sasa. Ukat Intix qhanaskakïnwa, ukhamatwa nuwasiñ tukuyapxäna.

Canaán uraqinkiri walja apnaqirinakaw Diosan markapar uñisipxäna. Josué tatampi soldadonakapampixa suxta maranwa 31 apnaqirinakar jiwarayapxäna. Uka qhipatwa Josué tatax jan uraqin familianakaru uraq jalanuqäna.

Walja maranak pasatatxa, 110 maraniw Josué tatax jiwxäna. Ukampis jakaskäna ukat mitanakapas jakasipkäna ukhaxa jaqinakax Jehová Diosaruw sum istʼapxäna. Ukat jiwxapxäna ukhaxa, jaqinakax jan walinak lurxapxäna ukatwa jan walinakan uñjasipxäna. Ukhakiw Diosan yanaptʼap munapxäna.