Diosax Davitaruw ajlli

¿AKAN kunas kamachaski? Uka waynitux mä uwij qall osot aparaski. Uka osox manqʼantañatakiw uwij qall achuskäna. Ukampis waynitux arktasin osot aparäna. Ukat kunapachatï osox sartaskakïn ukhaxa, ¡uka waynitux jiwayänwa! Ukat yaqha urux uwij leonat apararakïna. Jan axsartʼiripunipachänwa. ¿Khitïpachas aka waynitux uk yattati?

David satawa. Jupax Belenan jakasïna. Achachilapax Obed satänwa, Obetan awk taykapaxa Booz, Rut satarakïnsä, ¿uk amttati? Davitan tatapax Isaí satänwa. Tatapan uwijanakap Davitax awatirïna. Saular apnaqirit ajllipkän ukat 10 mar pasatatwa Davitax utjxäna.

Ukatxa Jehová Diosax Samuelurux akham sänwa: ‘Aceite aptʼat Belenaru Isaí tatan utapar sarma, nayasti mayni wawaparuw apnaqirïñapataki ajllistxa’ sasa. Ukat Isaí tatan Eliab jilïr yuqapar uñjasaxa, ‘akapunïpachaw’ sasaw Samuelux chuymapan säna. Ukampis Jehová Diosax akham sänwa: ‘Jan uñnaqapaksa, jachʼa jaqïtapaksa uñjamti. Janiw jupar apnaqirïñapatak ajllkti’ sasa.

Ukhamasti Isaí tatax Abinadab irpkatäna. Ukampis Samueluxa: ‘Janirakikiw akäkit Jehová Diosan ajllitapaxa’ sänwa. Ukat Isaí tatax Sama sat yuqap irptanïna. ‘Jehová Diosax janiw juparus ajllkarakikiti’ sänwa. Isaí tatax paqallqu wawanakapwa Samuelur irpkatäna, ukampis Jehová Diosax janiw maynirus ajllkänti. ‘¿Janit jukʼampi yuqanakamax utjxi?’ sasaw Samuelux jisktʼäna.

‘Sullkaw utjaski. Jupax uwij awatiski’ sänwa Isaí tataxa. Davitar irptanipkäna ukhaxa, suma uñnaqtʼanïtap Samuelux uñjäna. Ukat Jehová Diosax ‘akapï apnaqiritak ajllitaxa. Aceitempi pʼiqipat warxatam’ sänwa. Iyaw sasaw Samuelux warxatäna. Ukatxa Davitax Israel apnaqxäna.