Kunatsa Davitax sarxäna

GOLIATAR jiwaykäna ukatxa, israelit soldadonakan Abner pʼiqtʼiripax Saulan ukaruw David irpäna. Saulax soldadonakan pʼiqtʼiripat Davitar uttʼayäna ukat Saulampiw utjasïna.

Uka qhipatxa, filisteonakampi nuwasïwit soldadonakax kuttʼanxapxäna ukhaxa, akham sasaw warminakax warurtʼapxäna: ‘Saulax waranqa jaqinak jiwarayi, ukampis Davitax tunka waranqa jiwarayi’ sasa. Davitar jukʼampi jachʼañchapxatap istʼasax Saulax wal colerasïna. Ukampis Saulan Jonatán yuqapaxa janiw awkipjam uñisirïkänti. Davitar wal munasïna, Davitax ukhamarakiw jupar munasïna. Ukatwa, Jonatanampi, Davitampixa wiñay munasiñataki mä amtar mantapxäna.

Davitax arpwa wali sum jatʼiñ yatïna, ukatwa Saulax wal istʼañ munirïna. Ukat mä uruxa Saulax uñisiñamp atipayasisax jan walpun luräna. Davitax arpa tuktʼarapiskäna ukhaxa, lanzapampiw akham sas jaqtʼäna: ‘¡Davitaruw akampi pirqar chhuqkatä!’ sasa. Ukampis Davitax maysaruw jittʼäna. Qhipatxa, wasitampiw Davitar lanzampi jaqtʼasax pantjasïna. Uk pasipanxa Davitax amuyumpiw sarnaqxäna.

¿Goliatar atipirirux kun churä sänsa Saulax uk amttati? Phuchaj churäx sänwa. Jichhax Mical sat phuchajampix casarasxasmaw sänwa Saulaxa, ukampis janïr chikkasaxa, 100 filisteonakar jiwarayañamaw sänwa. ¡Amuytʼañäni! Davitar filisteonakax jiwayapxaspa ukwa Saulax munäna. Ukampis janiw Davitar jiwayapkänti, ukhamasti Saulax phuchap churxänwa.

Mä uruxa Saulax Davitar jiwayañ munta sasaw Jonatanarusa yanapirinakaparusa säna. Ukampis Jonatanax sänwa: ‘Janiw kuna ñanqhsa lurañamäkiti. Jupax janirakiw kuna ñanqhsa lurktamti. Jan ukasti yanaptamwa. Jakañapsa niyaw aptʼasiski Goliatampi nuwasir sarasaxa, atipir uñjasax jumas wal kusistaxa’ sasa.

Saulax yuqapar istʼänwa, janipuniw kuns Davitar lurkäti sänwa. Wasitampiw Davitar jawsayxapxäna, ukat nayrjamaw irnaqxäna. Mä urux arpa tukaskäna ukhaxa, Saulax mayamp Davitar lanzamp jaqtʼäna. Davitax jittʼarakikïnwa, lanzax pirqaruw purïna. ¡Akampix kimsa kutïxänwa! ¡Davitax sarxañatakiw wakichasxäna!

Uka arumax utaparuw Davitax sarxäna, ukampis Saulax jiwayanipxam sasaw jaqinak khitäna. Davitan Mical warmipax kuns Saulax lurani uk yatisaxa Davitar akham sänwa: ‘Jichha arumpach imantasir sarxma, jan ukax jiwataw uñjasïta’ sasa. Uka arumpachaw Micalax Davitar ventannam sarxañ yanaptʼäna. Davitax jan jiwañ laykuxa paqallq maraw ukjan akjan imantasïna.