Abigailampi Davitampi

¿DAVITAMPI parlir jutaski uka suma tawaq uñtʼtati? Abigaíl satawa. Jupax wali amuytʼasiriwa, jan wali lurañatsa Davitar jarkʼtʼänwa. Davitax kun lurañatakïskänsa uk janïr yatxatkasaxa, kunjamsa Davitax sarnaqaskän uk yatxatañäni.

Saulat qhispxasaxa mä qullu pʼiyaruw imantasïna. Jilanakapampi familiaranakapampiw ukar sarapxäna. 400 chachanakaw sarapxarakïna, Davitaw pʼiqtʼäna. Davitax Moab marka apnaqirimpi parliriw saräna: ‘Mirä, awkijampi, taykajampiy markamar qhiparpan kunas pasitani uk yatisiñajkama’ sasa. Ukat Davitampi mayni chachanakampix qullunakaruw imantasipxäna.

Uka qhipat Abigailar Davitax uñtʼäna. Abigailan chachapaxa Nabal satänwa, uraqinakani qamir jaqïnwa. 3.000 uwijanakani, 1.000 cabritonakan ukhamänwa. Nabalax qhuru jaqïnwa. Ukampis Abigaíl warmipaxa suma uñnaqtʼan warmïnwa. Ukatxa, kunatï chiqäki uk lurañsa yatirakïnwa. Mä kutixa familiaparuw jiwañat qhispiyäna. Kunjams qhispiyäna uk uñjañäni.

Davitampi yanapirinakapampixa Nabalarux yanaptʼapxänwa. Uwijanakap uñtarapipxäna. Ukat mä urux Davitax Nabalat yanaptʼa mayinipxäta sasaw mä qhawqhan khitäna. Puripxän ukhax Nabalax yanapirinakapampiw uwijanakat tʼawra yawirasipkäna. Uka urux fiestänwa, Nabalax walja suma manqʼañanakanïnwa. Ukhamasti Davitan yanapirinakapax akham sapxänwa: ‘Jumarux yanaptʼapxsmawa. Janiw kuna uwijsa lunthatapksmati. Mirä amp suma manqʼay waxtʼapxita’ sasa.

‘Janiw jumanakjam jaqinakarux kuna manqʼsa churkiristti’ sänwa Nabalaxa. Qhuruchasisaw David contra jan walinak parläna. Ukat kunapachatï Davitar uk yatiyapxi ukhaxa, Davitax wal colerasïna. ‘¡Espadanakam apxarusipxam!’ sänwa. Ukatxa Nabalampir yanapirinakapampir jiwayiriw sarapxäna.

Nabalan mä yanapiripax ukham jan wali arunak istʼasaxa, Abigailaruw yatiyäna. Ukat jankʼakiw Abigailax manqʼa wakichasin asnonakapar khumxatasin mistunïna. Davitar uñjasaxa, asnot saraqasaw altʼasïna, ukat akham sänwa: ‘Mirä amp suma, chachajar jan istʼamti. Jan amuytʼasir jaqiwa, luqhi chuymampipuniw kuns luri. Akaksay katuqtʼasita. Mirä amp suma katuqtʼasikitaya, kunatï paski ukat pampachtʼapxakitaya’ sasa.

‘Yatiñanïtaw’ sasaw Davitax säna. ‘Ukham ñanqha luratapat Nabalar jiwayañajatxa jarkʼaqistawa. Jichhax jan kuna llakiniki utamar kuttʼxam’ sänwa. Ukat Nabalax jiwxän ukhaxa, Davitax Abigailampiw casarasxarakïna.