Salomonax Diosan utap luri

JEHOVÁ DIOSAX utaj kunjam lurapxäta sänsa ukxa janïr jiwkasaw Davitax Salomonar jaytawayatayna. Pusi mar apnaqxasaw Salomonax Diosan utap lurañ qalltäna, ukat paqallq mara chikatanitwa tukuyapxänxa. Waranq waranqa jaqinakaw Diosan utap lurañxa yanaptʼapxäna, qurimpi qullqimpiw lursupxäna, ukatwa wali jilänxa.

Tabernáculo sat yupaychañ utjamänwa, kunattix payar jaljatänwa. Ukat mä ukchʼat mä ukchʼampïnwa. Ukat Salomonax Diosampi arustʼäwir mantat arkxa jiskʼa utäkis ukaruw uchayäna; ukat mayninaksti jachʼa utäkis ukarurakiw uchayäna.

Diosan utap lurañ tukuyxapxäna ukhaxa, mä jachʼa fiesta lurapxäna. Diosan utap nayraqataruw Salomonax qunqurtʼasisin mayisïna, kunjamatï akan uñjaski ukhama. ‘Janiw alaxpachasa wali jachʼäkasinsa katxaskiristamti, ukat ¿kunjamaraki aka utasti katxasiristamsti?ʼ sasaw Salomonax Jehová Diosar säna. ‘Ukampis nayan Diosaja, istʼakimay aka ut tuqir mayisirinakaruxa’ sasa.

Ukat kunapachatï Salomonax mayisiñ tukuyxäna ukhaxa, alaxpachatwa ninax saraqanïna. Luqtata uywanakwa nakhantäna. Ukat Jehová Diosan qhanapaw uka utan phuqtʼäna. Jehová Diosaxa ukampix istʼatapwa uñachtʼayäna, ukat uka utas Salomonan mayisitapas askïtapwa uñachtʼayäna. Ukat aksaruxa uka utaruw israelitanakax Diosar yupaychiri sarapxañapänxa janiw tabernaculor sarxapxañapäxänti.

Walja maranakaw Salomonax yatiñkankañampi markar apnaqäna, ukat jaqinakax wal kusisipxäna. Ukampis Salomonax Jehová Diosar jan yupaychiri yaqha markankir warminakampiw casarasïna. Mä warmipax akanwa yaqha diosar yupaychaski, ¿uñjtati? Ukatxa uka warminakapaxa yaqha diosanakaruw yupaychayxäna. ¿Ukat kunanakas paspachän uk yattati? Salomonax qhuru jaqïxänwa, ukat israelitanakax janiw kʼuchïxapxänti.

Ukatwa Jehová Diosax Salomonatak colerasax akham säna: ‘Reino apaqxämaxa yaqharuw churäxa. Janiw jakañaman ukxa lurkäti jan ukasti yuqamax apnaqxani ukhaw uk luräxa. Ukampis janiw taqpach apaqkarakïmati’ sasa. Kunjamsa ukax phuqasïn uk uñjañäni.