Israel apnaqäwiw jaljti

¿KUNATSA aka jaqix uka isi chʼiyanuqaski uk yattati? Jehová Diosaw ukham luräta sänxa. Aka jaqisti Ahías satawa, Diosan profetapawa. ¿Kunas profetaxa? Kunatï jutïrin utjkani uk Diosax mä jaqir yatiyirïna uka jaqiw profeta sataxa.

Jeroboam tatampiw Ahías profetax akan parlaski. Jeroboamaxa Diosan utap lurañ Salomonar yanapirïna. Ahías profetax Jeroboam tatampi jikintasisax machaq isip apsusisax tunka payaniruw chʼiyanuqäna. ‘Chʼiyanuqatanakatxa tunkax jumatakiw’ sänwa Jeroboamaruxa. ¿Kunatsa Jeroboamar uka tunk churpachäna?

Jehová Diosax Salomonatxa apnaqäwipxa apaqxaniw sasaw Jeroboamar Ahías profetax säna. Jumaruw Diosax 10 tribu churätam sänwa. Ukhamasti pä tribukiw jiltʼxäna Salomonan Roboam wawapan apnaqañapatakixa.

Ahías profetax kuntï Jeroboamar siskäna uk istʼasaxa, Salomonax wal colerasïna. Jeroboamaruw jiwayañ munäna, ukat Jeroboamax Egiptoruw sarxäna. Uka qhipatxa Salomonax jiwxänwa. 40 maraw apnaqawayi, ukat Roboam yuqapaw apnaqxarakïna. Jeroboamax Salomonan jiwatapat istʼasaxa Israel markaruw Egiptot kuttʼanxäna.

Roboam chachax janiw sum apnaqkänti. Salomonat sipansa sinti qhuru jaqïnwa. Jeroboam tatampi ukat jilïr jaqinakampiw Roboam tatan ukar sarapxäna, jan ukham jaqinakar sint tʼaqhisiyamti sasa. Ukampis jupax janiw istʼkänti. Jukʼampiw qhuruptäna. Ukatwa jaqinakax 10 tribu apnaqañapatak Jeroboamar uttʼayapxäna, Benjamín tribumpi Judá tribumpikwa Roboamax apnaqxäna.

Jeroboamax 10 tribunkir jaqinakxa janiw Jerusalenar khitañ munkänti Diosar yupaychapxañapatakixa. Ukatwa pä vaca qall lursüna ukar yupaychapxañapataki. Ukat jankʼakiw markax jan walinakampi chʼaxwañanakampi phuqantäna.

Pä tribunxa jan waltʼäwinakax utjarakikïnwa. Niya phisqa mara Roboamax apnaqxäna ukhaxa Egipto apnaqiriw Jerusalén markampi nuwasir jutäna. Diosan utapatxa walja qurimpi qullqimpi apsuwayapxäna. Ukhamasti jukʼa tiempokiw Diosan utapax qalltanjamänxa.