Ñanqha chuyman Jezabela

JEROBOAMAN jiwatapatxa, 10 tribu apnaqirinakax qhuru apnaqirkamakïnwa. Acab apnaqirix añcha qhurünwa. ¿Kunatsa? Jezabel warmipawa ñanqha chuyman warmïnxa.

Jezabelax janiw israelitäkänti. Sidón mark apnaqirin phuchapänwa. Baal diosar yupaychirïnwa, ukat Acab tatarus walja israelitanakarus Baal diosapar yupaychapxañapatakiw wiytäna. Jezabelax Jehová Diosaruw uñisïna profetanakaparus jiwarayänwa. Yaqhip profetanakax jan jiwañatakix qullu pʼiyanakanwa imantasipxäna. Kun munasasa, jaq jiwayaskakirïnwa.

Mä urux Acab sat apnaqirixa wali llakitaw sarnaqaskäna. Ukhamasti Jezabelax ‘¿kunats llakitäta?’ sasaw jisktʼäna.

‘Nabot tatampiw parlapxta. Nayax uwas yapup alasiñ munayäta. Ukampis janiw aljañ munkituti’ sasaw Acab tatax säna.

‘Suytʼma. Nayaw uka yapunïñ yanaptʼäma’ sänwa Jezabelaxa.

Ukhamasti Jezabelaxa, Nabotax jakaskäna uka markan jilïrinakaparuw carta apayäna. ‘Jan kunatakis walïki uka jaqinakampi Nabotar ñanqhachayapxam’ sasa. ‘Diosampi apnaqirimpiruw ñanqhachi’ sapxañapawa. ‘Ukatsti anqar apsusinxa qalamp kʼupjasaw jiwayapxäta’ sasa.

Nabotan jiwatap yatisaxa Jezabelax akham sänwa Acabaruxa: ‘Jichhax sarma, uwas yapup katuntasinim’ sasa. Jezabelax ukham luratapatxa juchañchatäñapänwa, ¿janichä?

Ukatwa tiempompix Jehová Diosax Jehú tatar khitäna jiwayañapataki. Jehú tataw juti sas istʼasax Jezabelax wal nayranaks pintsusïna suma uñnaqtʼan warmïkaspas ukham tuküna. Ukat Jehú tatax purisaxa, ventanankaskir uñji, uka patxankaskir jaqinakarux akham sänwa: ‘¡Aka aynacharu jaquqanipxam!’ sasa. Jupanakax iyaw sasaw jaquqapxäna, kunjamtï akan uñjaski ukhama. Ukat uka warmix jiwxäna. Ukhamwa ñanqha chuyman Jezabelax tukusxäna.