Josafatax Jehová Diosaruw atinisi

¿AKA jaqinakax khitinakäpachasa, ukat kuns lurasipkpacha uk yattati? Nuwasiriw sarasipki, ukat nayraqatankirinakax qʼuchtʼasipkiwa. Inas akham jisktʼassta: ‘¿Kunatsa qʼuchurinakax jan espadanipkisa ni lanzanipkisa?’ sasa. Uka tuqit yatxatañäni.

Josafatax pä tribun apnaqiripawa. Jezabel warmimpi Acab tatampi 10 tribu apnaqapkäna ukhaw Josafatax jakäna. Josafataxa Asa awkipjama suma apnaqirïnwa. Ukhamasti walja maranakaw pä tribux wali sum jakasipxäna.

Jichhax jan walinakaw utji ukatwa jaqinakax wal axsarayasipxäna. Josafatar akham sasaw yatiyapxäna: ‘Moabitanakampi, amonitanakampi, Seír qullunkirinakampiw nuwasir juti’ sasa. Walja israelitanakaw Jehová Diosan yanaptʼap mayiñatak Jerusalenan tantachasipxäna. Diosan utaparuw sarapxäna, ukanwa Josafatax akham mayïna: ‘Jehová Dios tata, kamachtʼäsa. Janiw ukhataqi jaqinakarux kamachapkiristi. Yanaptʼapxita’ sasa.

Jehová Diosax istʼänwa, ukat mä yupaychiripampiw taqinir akham yatiyäna: ‘Aka nuwasiñax janiw jumanakankkiti jan ukax Diosankiwa. Janiw jumanakax nuwasipkätati. Uñchʼukipxakïtawa kunjamas Jehová Diosax jumanakar qhispiyapxätam uka’ sasa.

Ukhamasti Josafatax qhiparmanthix akham sänwa: ‘¡Jehová Diosar atinisipxañäni!’ sasa. Ukatwa Jehová Diosar qʼuchupxañapatakixa soldadonakan nayraqatapar aka sacerdotenakxa uchäna. ¿Nuwasiñatak jakʼachasipxän ukhaxa kamachänsa uk yattati? Uñisirinakapax jupanakkamaw nuwarasipxäna, Jehová Diosaw ukhamar purtʼasiyäna. ¡Purintapxän ukhaxa, uñisir soldadonakax taqiniw jiwaratäxäna!

Josafatax yatiñanïnwa ukatwa Diosar atinisïnxa, ¿janichä? Josafatjam Diosar atinisiñänixa, yatiñanïtaswa uñachtʼayañäni.