Diosax Ezequiasaruw yanaptʼi

¿KUNATSA aka jaqix Jehová Diosar mayisiskpacha uk yattati? ¿Kunatsa altar nayraqatar aka qillqatanaka uchpacha? Aka tatax Ezequías satawa. Aynachankir pä tribun apnaqiripawa. Jan waltʼäwinakan uñjasi. ¿Kunatsa?

Kunattix alayankir 10 triburux Asiria soldadonakaw atipjapxatayna. Uksankir israelitanakax jan wali jaqinakäpxapunïnwa ukat Jehová Diosax jan jarkʼaqkänti. Jichhax pä tribu contrarakiw Asiria soldadonakax jutapxäna.

Asiria apnaqiriw Ezequiasar carta apayanïna. Uka qillqatanakwa Ezequiasax Diosan nayraqatapar uchaski. Uka qillqatanakanxa Jehová Dios contraw parläna, ukat Ezequiasarux atipjayasxakim sänwa. Ukatwa Ezequiasax akham mayisïna: ‘Jehová Dios tata, Asiria apnaqirit qhispiyapxita. Ukhamat taqi markanakax yatipxani juma sapaki Diosätama’ sasa. ¿Jehová Diosax istʼpachänti?

Ezequiasax suma apnaqirïnwa. Janiw 10 tribu apnaqirinakjamäkänti, ni jan wali Acaz awkipjamäkänsa. Jupax Jehová Diosan taqpach arunakapwa sum istʼäna. Ukatwa, mayisiñ tukuyxäna ukhaxa, Isaías profetax Jehová Diosan arunakap akham sas apayanïna: ‘Asiria apnaqirixa janiw Jerusalenar mantankaniti. Janiw ni soldadonakapasa jakʼachasinipkaniti. Ni mä flechsa flechtʼanipkaniti aka marka contraxa’ sasa.

Aka manqha uñtma. ¿Khitinakäpachas aka jiwarat soldadonakax uk yattati? Asirionakawa. Jehová Diosaw mä angelap khitanïna, mä arumakiw uka angelax 185.000 Asiriankir soldadonak jiwarayäna. Ukatwa, Asiria apnaqirix tʼijtxäna.

Ukhamatwa pä tribux qhispïna, ukat mä qhawqha tiempox suman utjasxapxäna. Ukat Ezequiasan jiwatapatxa, Manasés yuqapaw apnaqirit uttʼayatäxäna. Manasesampi Amón yuqapampixa qhuru ñanqha apnaqirinakäpxänwa. Ukatwa wasitampi markax jan walinakampi nuwasiñanakampix phuqantxäna. Ukat kunapachatï Amonan yanapirinakapax Amonar jiwayxapxän ukhaxa, Josías yuqapaw pä tribun apnaqiripjam uttʼayatäxäna.