Jerusalén phichkatapxi

YATXATTʼAT israelitanak Nabucodonosor apnaqirix Babiloniar apaskäna uka maratxa tunka maraw saraqxäna. ¡Jichhax uñtma! Jerusalenax phichantatawa, ukan jan jiwapkäna uka israelitanakaxa katuntasin Babiloniar apatäpxänwa.

Amtañäni, ‘janitï jan wali luräwinakama apanukupkätaxa, tʼunjataw uñjasipxäta’ sarakïns profetanakaxä. Ukampis israelitanakax janiw profetanakarux istʼapkänti. Jehová Diosar yupaychañat sipansa yaqha diosanakar yupaychasipkakïnwa. Ukhamasti jupanakaw juchanïsipkänxa akhaman uñjasiñatakixa. Kuna jan walinaksa lurasipkäna ukxa Ezequiel profetaw sum qhanañchistu.

¿Ezequielax khitis uk yattati? Janïr Jerusalén phichkatapkäna uka marat 10 mara nayraw Nabucodonosorax walja waynitunakampi chika Ezequielarux apäna. Ukapachaw Danielasa Sadracasa Mesacasa ukat Abednegosa Babiloniar apatäpxänxa.

Ezequielax Babilonia markankaskän ukhawa Jehová Diosaxa, kuntï Jerusalén utapan jan walinak lurasipkäna ukxa Ezequielar uñachtʼayäna. Ezequielan uñjañapatakixa mä milagro luräna. Ezequielax Babiloniankaskänwa, ukampis kuns Diosan utapan lurasipkän ukwa uñjayäna. ¡Uñjäna ukax janiw chiqaw sañjamäkänti!

‘¿Uñjtati kuna axtaskañ luräwinaksa utajan aka jaqinakax lurasipki ukanakxa?’ sänwa Jehová Diosax Ezequielaruxa. ‘Uñkatam aka pirqanakaxa asirunakampi yaqha animalanakampi qillqsutawa. ¡Ukat yupaychaski uka israelitanakar uñtma!’ sänwa. Ezequielax kuntï uñjkän ukwa qillqäna.

‘¿Israelitanakax jamasat lurasipki uk uñjtati?’ sasaw Jehová Diosax Ezequielar jisktʼäna. Jïsa, uks uñjarakikïnwa. Paqallq tunkaniw lurat diosanakar yupaychasipkäna. Akham sapxänwa: ‘Jehová Diosax janiw uñjkistuti. Aka markat sarxiwa’ sasa.

Ukatxa Jehová Diosax Ezequielarux utat alay tuqi punkunkir warminakwa uñjayarakïna. Uka warminakax Tamuz sat diosaruw yupaychasipkäna. ¡Yupaychañ utar mantañ chiqar uñtma! Niya pä tunka phisqanïpxiwa. Ezequielax uñjänwa. ¡Inti jalsu tuqir uñtataw Intir yupaychasipkäna!

‘Aka jaqinakax janiw axsarapkituti’ sänwa Jehová Diosaxa. ‘¡Janiw jan walinakaki lurapkiti, jan ukax utajar jutasinwa jan walinak lurapxi!’ sasa. ‘Jachʼa colerasiñajwa uñjapxani. Tʼunjatäpxani ukhax janiw sinttʼaskäti’ sänwa Jehová Diosaxa.

Jehová Diosax Ezequielar akanak uñachtʼaykäna ukatxa kimsa marakiw pasaskäna, ukhaw israelitanakax Nabucodonosor apnaqir contra saytʼapxäna. Ukhamasti wal nuwarasipxäna. Ukat mara chikatani pasatatwa, babilonionakax Jerusalén uyupnama mantapxäna ukat markpachwa phichkatapxäna. Niya taqiniw jiwarata ukat Babiloniar apata uñjasipxäna.

¿Kunatsa Jehová Diosax uka israelitanakar ukham tukjayäna? Kunattix janiw Jehová Diosar istʼapkänti, janirakiw kamachinakaparjamas sarnaqapkänti. Ukhamasti, Diosan mayitanakap istʼañax wali wakisiriwa.

Jerusalenax phichkatatäxäna ukatxa, Israel uraqinxa mä qhawqhaniw jiltʼasipkäna. Nabucodonosor sat apnaqirixa Gedalías sat judioruw uka jaqinak uñjañapatakix uttʼayäna. Ukatxa, mä qhawqha israelitanakaw Gedaliasar jiwayapxäna. Ukat babilonionakax jutasin jiwarayapxistaniw sasaw israelitanakax axsarapxäna. Ukhamasti Jeremiasar munkir jan munkir irpxaruwayasinwa Egiptor sarxapxäna.

Ukhamasti Israelanxa janiw khitis jakxänti. 70 maraw ukhamäna. Janipuniw kunas utjkänti. Ukampis Jehová Diosax ‘70 maratxa wasitampiw markajax kuttʼanxani’ sänwa. Ukäñkamasti, Babiloniar apata Diosan markapaxa, ¿kunjamakis sarnaqasipkpachäna? Uk yatxataskakiñäni.