Babiloniar apatapkäna ukat Jerusalén uyuchrantapkän ukhakama

Israelitanakax Babilonian katuntatäpkäna uka maranakanxa, walja yantʼäwinakanwa uñjasipxäna. Sadracampi, Mesacampi ukat Abednegompixa pariptayat hornoru jaquntatäpxänwa, ukampis Diosaw hornot jakaskirpach irpsüna. Ukat Babiloniax medopersa jaqinakampi katuntatäxäna uka qhipatxa, Danielaruw leonanakan uyupar jaquntapxäna, ukampis Diosaw leonanakan lakap jistʼantasa jarkʼaqäna.

Ukatxa, Persiankir Ciro sat apnaqiriwa israelitanakarux markapar khitxäna. Chiqpachansa, 70 maratwa jupanakax Babiloniat markapar kuttʼxapxäna. Jerusalenar purisaxa, nayraqatxa, Jehová Diosan utap lurañwa qalltapxäna. Ukampis uñisir jaqinakawa uka luräw saytʼayapxäna. Ukhamasti, Babiloniat Jerusalenar kuttʼxapxäna uka maratxa 22 maraw saraqxäna, ukhaw Diosan utap lurañxa tukuyxapxäna.

Ukat Esdrasan Jerusalén markar saräwipatwa yatxatarakiñäni, jupasti Diosan utapa sumaptayiriw saräna. Diosan utap lurañ tukuyxapxäna uka maratxa 47 maraw saraqxäna ukhaw Esdrasax saräna. Ukat 13 maraw Esdrasan saratapat saraqxarakïna, ukhaw Nehemiasax Jerusalenar uyuchrantañ yanaptʼäna. Ukhamasti PHISQA Jaljäwinxa 152 maranakatwa parlasi.