Pirqar qillqat arunaka

¿AKAN kamachasipkisa? Manqʼarasipki umarasipkiwa. Babilonia apnaqiriw wali aytat walja jaqinak jawsthapiyatayna. Jerusalenan Diosan utapat apanit qurit qullqit lurata vasonakat umarasipki. Ukatxa, mayak mä jaqin amparapax uñstäna, ukat uka amparax lukʼanapampiw pirqar qillqañ qalltäna. Wal sustjasipxäna.

Ukapachax Nabucodonosoran Belsasar allchhipaw apnaqirïnxa. Yatirinak irptanipxam sasaw jupax säna. ‘Khititï aka pirqan qillqatäki uk liytʼani ukat ukax kuntï sañ munki uka qhanañcharakitani uka jaqix walja waxtʼanakwa katuqani, apnaqäwijansti kimsïrit uttʼayatarakïniwa’ sänwa Belsasaraxa. Ukampis janiw khitis liytʼirjamäkänti, janiw ni kamsañs muni uksa qhanañchirjamäpkänti.

Belsasaran mamapaxa chʼaxwir istʼasax uka utaruw mantäna. ‘Jan sinti sustjasimti’ sänwa Belsasararuxa. ‘Markamanxa diosanakar uñtʼir mä jaqiw utji. Kunapachatï Nabucodonosor achachilamax apnaqirïkän ukhaxa, taqi yatirinakan jilïripatwa uttʼayäna. Daniel satawa. Jupar irptayanma, jupaw sum qhanañchätamxa’ sasa.

Ukhamasti jankʼakiw Danielar irptanipxäna. Danielax janiw waxtʼanakam katuqkirismati sänwa, ukatxa, kunatsa Jehová Diosaxa Nabucodonosorar apnaqirit apaqäna uka tuqitwa qhanañchäna. ‘Jupax jachʼa jachʼaw tuküna. Ukatwa Jehová Diosax apaqäna’ sänwa Danielaxa.

‘Belsasar, jumax sum uk yatisktaxa, uk yatkasasa Nabucodonosorjam jachʼa jachʼa tukuskaktawa. Jehová Diosan utapat apanita vasonakwa apttaxa ukampirakiw umantasiraktaxa. Ukatxa lawat lurata, qalat lurat diosanakarurakiw yupaychtaxa, ukampis janiw taqi kun lurir Diosarux yupaychktati. Ukatpï Diosax aka ampar qillqañapatak apayanixa’ sänwa Danielaxa.

Danielaxa saskakïnwa: ‘Aka qillqatax akham siwa MENÉ, MENÉ, TEKEL, PARSÍN’ sasa.

Ukat ‘MENÉ arux akham sañ muni: Diosax marka apnaqañ urunakamxa jaktʼiwa, ukatsti tukuyap ucharaki. TEKEL aruxa: Balanzaru pestʼatätawa, ukatsti jukʼakiw pesaraktaxa sañ muni. PARSÍN aruxa: apnaqäwimax medopersanakar churatäniwa’ sañ munaraki.

Danielax parlaskän ukhasti, medopersanakaw Babiloniar mantanipxäna. Markpach katuntasax Belsasararuw jiwayapxäna. ¡Pirqar qillqat arunakax uka arumpachaw phuqasïna! Ukampis ¿israelitanakar kunakis paspachäna? Yatxataskañäniwa, ukampis Daniel tuqit jichhax yatxatañäni.