Mardoqueompi Esterampi

ESDRASAX janïr Jerusalenar sarkäna uka maranakat yatxataskakiñäni. Mardoqueompi Esterampixa Persian wali aytat jaqinakäpxänwa. Esterax reinänwa, Mardoqueo primopasti payïr apnaqirit uttʼayatänwa. Kunatsa wali aytatäpxpachän uk yatxatañäni.

Esterax wajchänwa, jiskʼaskäna ukhaw awkipas taykapas jiwxäna, ukhamasti Mardoqueo primopawa uywasïna. Persia marka Asuero sat apnaqirin apnaqañ utapaxa Susa markankänwa, ukat Mardoqueoxa uka utanwa irnaqäna. Ukat mä uruxa, Asueroruw Vasti sat warmipax jan istʼkänti, ukhamasti Asuerox yaqha warmi reinäñapataki thaqhäna. ¿Khitirus ajllpachäna uk yattati? Jïsa, suma uñnaqtʼan Esteraruw ajllïna.

¿Jachʼa jachʼa tukuri jaqin nayraqatapan altʼasisipki uk uñjtati? Amán satawa, Persian jilïrit uttʼayatänwa. Mardoqueosa jupar altʼasirakispa ukwa munäna, kunjamtï akan uñjaski ukhama. Ukampis Mardoqueox janiw altʼaskänti. Qhuru jaqinakan nayraqatapar altʼasiñax janiw jupatak walïkänti. Amanax wal colerasïna. Ukat kuns luräna ukxa jichhaw uñjañäni.

Amanax israelitanakatxa kʼarinakwa Asuerorux yatiyäna. ‘Jan wali jaqinakawa, janiw kamachinakamsa istʼañ munapkiti, jiwarayañäspawa’ sasa. Asuerox janiw yatkänti warmipax israelitätapxa. Ukhamasti Amanarux istʼänwa, ukat mä kamachwa israelitanakar mä urun jiwarayañataki apsüna.

Mardoqueox uk istʼasax wal llakisïna. Esteraruw yatiyayäna akham sasa: ‘Asuero apnaqirimpi parltʼma, jan jiwarañasataki yanaptʼistpan’ sasa. Persia markanxa, jan jawsatäsin apnaqiriru makatañax jachʼa juchänwa. Ukampis Esterax jan jawsatäkasinwa Asuerorux makatäna. Asuerox qurit lurat thujrupwa aytʼäna, ukampix janiw jiwaykäti sañwa munäna. Ukat Esterax Asuerompiru Amanampiruw manqʼäwir sarañäni säna. Manqʼasipkäna ukhawa apnaqirix Esterar säna: mayit kuntï munkta uk sasa. Ukampis Esterax arumanthi yaqha manqʼäwir jutapxam sänwa, ukanwa kuntï munkta ukxa mayïma sasa.

Ukanwa Esterax Asuerorux akham säna: ‘Markajaruw chhaqtayapxani nayarus jiwayapxitaniwa’ sasa. Asuerox wal colerasïna. ¿Khitis uka jaqixa? sasaw jisktʼäna.

‘¡Uka qhuru jaqix aka uñisir Amán tatawa!’ sänwa Esteraxa.

Uk istʼasax walpun colertʼasïna. Amanar jiwayapxam sänwa. Ukatxa Mardoqueoruw payïr apnaqirit uttʼayäna. Ukatsti Mardoqueox mä machaq kamachwa apsuyäna, jiwayatäpxañapäkän uka urux israelitanakax saytʼasipxañapataki. Mardoqueox wali uñtʼatänwa, ukhamax waljaniw israelitanakar yanaptʼapxäna, ukhamat uñisirinakapan amparapat qhispipxäna.