Estebanaruw kʼupjapxi

AKAN qunqurtʼatäski uka jaqix Esteban satawa. Jesusan taqi chuyma arkiripänwa. ¡Uñtam jichhax kamachasipkisa! Uka jaqinakax qalampiw kʼupjasipki. ¿Kunatsa Estebanarux ukham uñisipxpacha? Yatxatañäni.

Diosaw Estebanar uka milagronak lurañ yanaptʼäna. Uka luräwinakaw uka jaqinakar colerayäna, ukat chiqa yatichäwinak parlatapatwa Estebanar jisksupxäna. Ukampis Diosaw yatiñkankañ churäna, ukhamatwa uka jaqinakan kʼarinakap qhanstayäna. Ukat jukʼampi colerasipxäna, ukatwa katuntapxäna ukat kʼari jaqinak irptanisin Estebanat kʼarinak parlayapxäna.

Jilïr sacerdotesti ‘¿parlapki ukax ukhamäskapuniti?’ sasaw jisktʼäna. Estebanax Bibliat apstʼata arunakampiw arsüna. Niy tukuyxasaxa akham sänwa, ‘nayraxa qhuru chuyman jaqinakaw Diosan profetanakaparux uñisipxäna. Jumanakax ukhamäpxaraktawa. Diosar luqtiri, Jesusaruw jiwayapxtaxa, ukatxa janiw Diosan kamachinakapxa istʼapkaraktati’ sasa.

¡Uk istʼasax judionakan yupaychäwip irpirinakax wal colerasipxäna! Laka chʼakhanakapsa wal tʼururasipxäna. Ukat Estebanax alaxpach uñtasinxa: ‘¡Uñtapxma! Jesusaruw uñjta Diosan kupïxapan saytʼata’ sänwa. Ukampis uka jaqinakax jinch llupantasisaw Estebanar katuntapxäna. Ukatwa qatatsunipxäna.

Ukat isinakapxa Saulo sat waynaruw kattʼayapxäna. ¿Akan Saulor uñjtati? Ukat Estebanaruw qalampi kʼupjapxäna. Kunjamtï akan uñjktaxa, Estebanax qunqurtʼasisin Diosar akham mayisïna: ‘Jehová Dios Tata, aka jan wal lurapxatapatxa jan juchañchamti’ sasa. Kunattix uka jaqinakarux jilïrinakapaw jan walir irpäna ukwa Estebanax yatïna. Ukham sasin jiwxäna.

Jan walinak lurataxa, ¿ukhamat ukhamti luraraktaxa, jan ukax jan walir puriñapatak Diosaruch mayta? Janiw Estebanasa Jesusasa ukhamäpkänti. Qhuru jaqinakatakis suma jaqinakäpxänwa. Jupanakat yatiqasipxañäni.