Pedrox Cornelion utap sari

APÓSTOL Pedroxa akan saytʼatäskiwa, jupampi chikäski ukanakax arkir masinakapawa. Ukampisa, ¿kunatsa aka jaqix Pedron nayraqatapan altʼasiski? ¿Waliskpachati ukham altʼasiñaxa? ¿Khitïpachas uka jaqix uk yattati?

Cornelio satawa. Roma soldadonakan pʼiqtʼiripawa. Corneliox janiw Pedrorux uñtʼkänti, ukampis utamar Pedro jawsayanim satänwa. ¿Kunjamatsa? Yatxatañäni.

Jesusan nayrïr arkirinakapax judionakäpxänwa, ukampis Corneliox janiw judiokänti. Ukampis jupax wal Diosar munasïna, mayisïna, ukat khuyaptʼayisir jaqïnwa. Mä jaypʼuxa, Corneliox mä angelaruw uñjäna, ukat angelax akham sänwa: ‘Diosarux kusisiytawa, jupax mayisitanakamarux phuqaniwa. Pedro sat jaqir irptanipxañapatak khitma. Jupax Jope markan Simonan utapankaskiwa, uka utax quta lakankiwa’ sasa.

Ukhamasti, jankʼakiw Corneliox ukham luräna. Qhipürusti, Pedrox Simonan utap patxankaskänwa. Ukat Diosax mä jachʼa mantelsa alaxpachat warkuqtayankaspa ukham Pedror uñjayäna. Ukan taqi kasta animalanakaw utjäna. Diosan kamachiparjamaxa, uka animalanakax qʼañünwa, ukampis akham sir istʼäna: ‘Pedro, sartasin jiwarayam ukatsti manqʼarakim’ sasa.

‘¡Janiwa!’ sänwa Pedroxa. ‘Janipuniw jan manqʼañ qʼañu animalanak manqʼirïkti’ sasa. Ukampis uka arux sänwa: ‘Diosax janiw qʼañüxit siski ukanakxa jan qʼañuw samti’ sasa. Kimsa kutiw ukham säna. Ukat Pedrox kun sañsa munpacha sasaw amuyäna, ukhamaruw Cornelion khitanakapax puripxäna.

Pedrox utat saraqasinxa akham sänwa: ‘Thaqhapkta uka jaqix nayätwa. ¿Kunarus jutapxta?’ sasa. ‘Mä angelaw Corneliorux “Pedro jawsayanim” satayna ukatwa jutapxta’ sapxänwa, ukhamax sarañäniy sänwa Pedroxa. Qhipüruw Pedrox arkir masinakapampi Cesarea markar sarapxäna Cornelion utaparu.

Corneliosti familiaranakaparu wali munat uñtʼatanakaparuw jawsthapiyäna. Kunapachatï Pedrox purïna ukhaxa, Corneliox Pedron kayuparuw altʼasïna, akan uñjasiski ukhama. Ukampis Pedrox sänwa: ‘Tata saytʼma, nayax jumjam jaqikirakïtwa’ sasa. Jïsa, janiw mä jaqir yupaychañatakix altʼasksnati siw Biblianxa. Jehová Diosarukiw yupaychañasaxa.

Pedrox taqi jupanakaruw Diosat yatiyäna. Ukat akham sänwa: ‘Diosax jupar yupaychañ munir taqi jaqiruw katuqi’ sasa. Pedrox parlaskäna ukhaw Diosax qullan ajayup apayanïna, ukatxa taqiniw yaqha arunak parlañ qalltapxäna. Pedromp chik jutir judionakaxa wal muspharapxäna, kunattix judionakarukis Diosax katuqaspa ukhamwa amuyapxäna. Diosax janiw mä kastaruki sum uñjkiti jan ukasti taqiniruw sum uñji ukwa ukax sum qhanañchäna. Taqiniw uk sum amtañasaxa, ¿janichä?