¡Jakäwi!... mä sumankir machaq jutïrpachana
Aka qillqatana uñachtʼäwipa uñxatasaxa, ¿kuns amuyta? ¿Janiti sumankañana, kusisiñana, taqi kunanïña akan uñxataski ukham chuymamax munki? Jïsa ¿ukhamaxaya? Ukampisa, ¿Aka Uraqina akanakax phuqhasipuniniwa sañax samkakïpachati jan ukax amuyukïpachacha?
Walja jaqinakawa ukhamaw sapxaspa. Jichhurunakana chʼama tukuñanakax akanakawa: chʼaxwäwi, juchachasiña, awtjatäña, usuña, chuymaniptaña, ukasa mä qawqha sasaki. Ukampisa, sum amuyañ sipanxa suytʼäwix utjiwa. Bibliax jutïr urunakatakix siwa: “Ukampis jiwasax arsutaparjamaw suytʼasktan mä machaq uraqi, mä machaq alaxpachampi, kuntix Diosax: “Churapxämaw” siskistu uka. Ukansti taqi kunasa chiqapapunïniwa” (2 Pedro 3:13; Isaías 65:17).
Biblianxa, “mä machaq uraqi, mä machaq alaxpachampi” arunakaxa, janiw mä uñjkaya machaq alaxpachampi, machaq Uraqimpïkapuniti. Uñjkaya Uraqimpi alaxpachampixa yäni lurtʼatawa, wiñayatakïniw siw Bibliaxa (Salmo 89:36, 37; 104:5). “Machaq uraqi” aruxa sañ muniwa chiqap jaqinakaw Uraqina jakapxani, ‘machaq alaxpacha’ arusti sañ munarakiwa, alaxpachankir mä yäni apnaqäwiwa aka uraqinkiri jaqinakaru apnaqani, mä arunxa reino satarakiwa. Ukampisa, ¿‘mä machaq uraqiw’ utjani sañaxa, mä arunxa, suma machaq jutïrpachaw utjani sañax chiqaw sañjamati?
Ak amuykiparakim, uka sumankañanakaxa Diosan qallta amtapankänwa aka Uraqitakixa. Jupaxa uchänwa nayrïri panichata chachawarmiruxa uraqinkir Edén kusipacharu, churarakïnwa mä muspkaña luräwi: “wali mirantapxam, aka uraqirusti phuqhantapxarakim, apnaqapxarakim” (Génesis 1:28). Jïsa, Diosax amtänwa, jupanakaxa wawanakanipxañapa, ukhamatwa kusipachaxa Uraqpacharu jithitatayatañapäna. Ukampisa, jupanakaxa janiw Diosaru jaysawayapkänti, ukhamatwa wiñay jakaña aptʼawayapxi. Ukatsa Diosan qallta amtäwipax janiw mayjtʼkiti. ¡Phuqhasiñapawa mä machaq jutïrpachana! (Isaías 55:11.)
Kunapachatix alaxpachankiri Awkisaru orasiskta ukhaxa mayisktawa Apnaqäwipa jutañapa, Uraqiru ñanqhata qhispiyañapataki ukat aka machaq jutïrpacharu apnaqañapataki (Mateo 6:9). Diosax aka oracionarux jaysaniw sasax atinissnawa, Arupanxa qillqataskiwa: “Aski jaqinakax uraq katuqapxani, wiñayatakiw ukan jakapxarakini” (Salmo 37:29).
Machaq jutïrpachana ¿Kunjamänisa jakäwixa?
Diosan Apnaqäwipaxa musparkaya askinakwa Uraqiru apanini, markapan kusisita jakasiñapataki, kumjamtï qallta amtapanxa Diosax munkäna ukhama. Uñisisiñanakampi uñanukusiñanakampixa tukusxaniwa, ukatsti Uraqinkiri taqi utjasirinakaxa suma munasiri masinakäxapxaniwa. Biblianxa Diosax arsuwa: Jupax ‘aka uraq tukuskamaw nuwasiñ tʼakurayani’. “Janirakiw kawkïr markas yaqha markampix nuwasiñatak sartkaniti. Janirakiw guerran nuwasiñatakis yatichäwinakxa katuqapkaniti” (Salmo 46:9; Isaías 2:4).
Ukxaruxa Uraqpachawa kusipachaptayatäni mä muyar uñtata. Bibliax siwa: “Wasarax kusispan, waña uraqis ukhamaraki, kusisiñampi phuqtʼaspan, panqararakpan, [...] Wasara waña uraqinsti umax walpun jalsuni mä jachʼa jawirjama tukusa. Uka wasarax mä qutaw tukuni” (Isaías 35:1, 6, 7).
Kusipach Uraqinxa taqi kunas kusisiñatakiniwa. Janipuniw manqʼatjam khitis awtjatäxaniti. Bibliax siwa: ‘Uraqix achunakap churani’ (Salmo 67:6; 72:16). Taqiniwa irnaqawinakapata kusisipxani, Inuqirisan arsutaparjama: “Jaqinakasti utanak utachasipxani, ukan jakasipxarakini, uvanak yapuchasipxani, uka yaputxa manqʼasipxarakini [...], janirakiw maynix yapuchkaniti mayninakan askipatakikixa” (Isaías 65:21, 22).
Machaq jutïrpachanxa jaqinakaxa janiw jachʼa altus utanakansa kʼullkʼusxapxaniti, janirakiw jiskʼa jichhu utanakansa jakxapxaniti, Diosax amtiwa: “Jaqinakasti utanak utachasipxani, ukan jakasipxarakini [...]. Janiw ukanxa maynix yaqhan jakasiñapataki utachkaniti”. Bibliax saskakiwa: “Janiw inamaya irnaqapkaniti” (Isaías 65:21-23). Ukhamaxa, jaqinakaxa khusa irnaqäwinakanïxapxaniwa. Jakañax janiw amjayasiñjamäxaniti.
Diosan Apnaqäwipaxa uywanakpura sumankaña apanini Edén muyanjama, jaqinakasa uywanakampix sumankxapxaniwa. Bibliax siwa: “Ukapachaw qamaqimpi ovejampix suman jakasipxani, tigrempi, cabritompisti mayakiw samartʼapxarakini, vaka qallumpi leonampisti jakʼapuran jilasipxarakini, mä jiskʼa yuqall wawarakiw jupanakarux awatini” (Isaías 11:6-9; Oseas 2:18).
¡Amuytʼam, kusipach Uraqinxa taqi usuñanakasa, janchin pisinkañanakasa tukusxaniwa! Diosan Arupaxa saskakiwa: ‘Janiw khitis sisxaniti: “Usutätwa” sasaxa’ (Isaías 33:24). “Diosax taqi jachanakapwa nayranakapatxa picharani, janirakiw jiwañas, jachañas utjkxaniti, warariñasa ni usuyasiñasa. Taqi kunanakatï nayrax utjkän ukanakax tukusxiwa” (Apocalipsis [Revelación] 21:4).
Kunjamatsa ukanksna
Aski machaq jutïrpachapan jakañxata Diosan arsutaparjam yatisaxa, chuymamax chʼallxtatapunïpachawa. Yaqhipanakatakixa aka aski churäwinakaxa ancha sumawa phuqhasiñapatakixa, ukampisa munasir Inuqirisatakix akanakaxa janiw chʼamäkiti, phuqhasipuniniwa (Salmo 145:16; Miqueas 4:4).
Jutïr kusipach Uraqina wiñayataki jakañ munasaxa, mayitanakaparuw phuqhañasa. Aka mayitanakatxa Jesusax Diosar oräna ukhaxa maynïrwa uñachtʼayäna: “Aka wiñay jakañax juma sapa chiqpach Diosar uñtʼañanwa utji, ukhamarak Jesucristoru kawkïrirutix jumax khitankta ukaru” (Juan 17:3).
Ukhamaxa, Diosan machaq jutïrpachapana jakañ munasaxa, nayraqatxa Diosan munañapwa yatiqañasa ukxaruxa lurañasarakiwa, chiqasa “Akapachax tukusirikiwa jan wali luräwinakapamppacha, ukampis kawkïritix Diosan munañap lurki ukax wiñayatakiw jaki”. Ukham lurañäni ukhaxa, munasir Inuqirisaw walja aski churäwinak apanini wiñay wiñay kusisiñasataki (1 Juan 2:17).
Jiskʼa tʼaqanakaxa Qullan Arunaka (1992) Bibliata apstʼatawa, jan ukhamäkanixa qhanañchasiniwa.