Ajayunakax janiw aka Uraqin jakirïpkiti ni jiwirïpkisa

¡Ajayunakax utjaskapuniwa! Ajayunakax jakapki ukanxa suma ajayunaka ukat jan wali ajayunakas utjarakiwa. Ukanakaxa, ¿aka Uraqin jakawayasin jiwxapxi uka jaqinakan ajayunakapäpachati?

Janiwa. Janiw yaqhipanakax amuyapki ukhamäkiti, maynix jiwxi ukhaxa, janiw kawkhantï ajayunakax jakapki ukar sarapkiti. ¿Kunjamatsa uk yattanxa? Bibliaw uk qhanañchi. Bibliax kunatï chiqäki uk yatichi, chiqpach Diosan amuyunakapaw ukan qillqata, sutipasti Jehová satawa. Jehová Diosaw jaqirux luratayna, Jupaw maynix jiwxi ukhax kunas kamachi uk yatiraki (Salmo 83:18, NM; 2 Timoteo 3:16).

Diosax Adanar “laqʼatwa luräna” siw Bibliaxa (Génesis 2:7). Ukat Edén huertoruw usküna. Jehová Diosarutï istʼasapänxa, Adanax jichhakamaw jakaskasapänxa. Ukampis yatkasina Diosan leyip pʼakintäna ukhaxa, Diosax akham sänwa: “Kuna laqʼata luratäktatix ukar kuttañamkama, laqʼätawa, laqʼarurakiw kuttäta” sasa (Génesis 3:19).

¿Kamsañs muni uka arunakaxa? Amuytʼañäni, ¿Adanax kawkinkänsa Jehová Diosax janïr laqʼat lurkäna ukhaxa? Chiqpachansa Adanax janiw utjkänti, janirakiw jan yurit ajayükänsa. Ukhamaxa, kunapachatï Jehová Diosax Adanarux ‘laqʼaruw kuttäta’ säna ukhaxa, jiwätawa sañ munaskäna. Adanax janiw kawkhantï ajayunakax jakapki ukar sarkänti. Jan ukasti jiwxäna ukhaxa janiw jakxänti, laqʼaruw tukusxäna. Jiwañanxa janiw jakañax utjxiti.

Jichhaxa, ¿yaqha jaqinakan jiwatapatxa kamssnasa? ¿Jupanakax ukhamarakit tukusipxpacha? Bibliaw uka jisktʼanakarux qhanañchi.

• “[Jaqinakasa animalanakasa], taqinis mä tukuyäwirukiw sarapxi; taqinis laqʼata luratäpxiwa, ukhamarakiw taqinis laqʼaru tukxapxani.” (Eclesiastés 3:20.)

• “Jiwatanakax janiw kunsa yatipkiti.” (Eclesiastés 9:5.)

• “Munasiñapax tukusxi, uñisiñapasa, envidiasiñapasa.” (Eclesiastés 9:6.)

• “Jumax sepulcror sarkätas ukanxa janiw kuna lurañas utjkiti, kuna lupʼiñasa, uñtʼañasa, janirakiw yatiñanïñasa utjkiti.” (Eclesiastés 9:10.)

• “[Jaqinakax] jiwxapxi ukapachaxa, laqʼaruw tukxapxi, ukürpachaw amtatanakapax tukusxi.” (Salmo 146:4.)

¿Jumatakix Biblian uka jiskʼa tʼaqanakapat amuytʼañax chʼamati? Ukhamächi ukhaxa aka tuqit amuytʼma: Walja familianakanxa chachaw familiapar uywañatakix qullq jikxati. Ukat kunapachatï chachax jiwxi ukhaxa, familiapax jan waltʼäwinakanwa uñjasispa. Awisax warmipasa wawanakapas manqʼa alasiñatakis jan qullqini ukhamaw uñjasipxaspa. Ukat khitinakatix uka chachar uñisipxäna ukanakax jiwatan familiaparux jan walinak lurapxarakispa. Jichhax ¿kamsasmasa? ‘Jiwki uka chachax kawkhantï ajayunakax jakapki ukan jakaskchi ukhaxa, ¿kunatsa familiaparux jan uywaskakpacha? ¿Kunatsa familiaparux jan wali jaqinakat jan jarkʼaqkpacha?’ Kunattix Biblian qillqatäki uka jiskʼa tʼaqanakax chiqäskapuniwa. Uka chachax janiw jakxiti, janiw kuns lurkaspati (Salmo 115:17).

Ukhamasti, ¿jiwatanakax janipunit mayampis jaktanipkani? Janiw ukhamäkiti. Jutïrinwa kunjamsa jiwatanakax jaktanipxani uk yatxatañäni. Ukampis jiwatanakax kuntï jumax lurkta uk janiw yatipkiti, janiw uñjapkiristamti, istʼapkiristamsa ni parlapkiristamsa. Janiw kunats axsarayasiñamäkiti. Jiwatanakax janiw yanaptʼapkiristamti ni jan walinaksa lurapkiristamti (Eclesiastés 9:4; Isaías 26:14).