Jutïr urunakataki mä suma suytʼäwi

Supayamp saxranakapampixa jukʼa tiempompikiw jaqinakar sallqjapxani. Jehová Diosaxa, jupanakarux alaxpachat jaquqanxiwa (Apocalipsis 12:9). Diosaxa niyaw wasitat Supayampir saxranakapampir juchañcharakikini. Mä visionan uñachtʼayataxa, apóstol Juanax akham sänwa: “Ukatsti uñjaraktwa alaxpachat mä angelaru saraqasinkiri manqhapacha chʼamakan llavepas aptʼata, ukhamarak mä jachʼa cadena iqtʼata. Aka angelasti dragonaruw katuntäna. Uka dragonasti nayrapacha katari pachpa Supayawa. Katuntasinsti waranqa maratakiw ñachʼantarakïna. Ukatsti manqhapacha chʼamakaruw jaquntäna, jistʼantarakïna. Mä sellompiw sellxatawayarakïna, ukhamata jan markanakaru sallqjaskañapataki waranq mara phuqhasiñapkama” sasa (Apocalipsis 20:1-3). Mä jukʼa tiempotxa Supayampi saxranakapampix jan mayampitaki tukjatäpxaniwa (Apocalipsis 20:10).

Ñanqha jaqinakasa tukjatäpxarakiniwa (Salmo 37:9, 10; Lucas 13:5).

¡Jiwatanakax jaktanxapxaniwa!

Supayampir saxranakapampir tukjasaxa, Jehová Diosax walja bendicionanakwa jaqinakatakix utjayani. Amtañäni, jiwatanakax janiw jakapkiti, jiwatäsipkiwa. Jiws iktʼasipkaspa ukhamaw sasaw Jesusax säna (Juan 11:11-14). Jiwatanakan jaktaniñapatakix mä tiempo utjatap yatisaw ukham parlaskäna. Ukat akham sänwa: “Horasax purininiwa taqi jiwatanakasti [...] jaktapxaniwa” sasa (Juan 5:28, 29; uñxattʼarakismawa Hechos 24:15).

Aka Uraqin jakañatakiw jaktanxapxani. Jaqinakaw jiwapxatayna sas istʼañat sipansa, ¡jiwatat jaktanxatayna sas yatiyäwinak istʼañaw paraison kusisiyistani! Munat masinakasarusa familianakasarusa jiwatat jaktanipan katuqañaxa, ¡kunja kusiskañänisa!