Aka Uraqix mä paraisor tukuyatäniwa
Jehová Diosaxa, Supayan jan wali luratanakapxa qʼalpun tʼunjani. Ukatakix Jehová Diosax Jesusaruw reyit aka Uraqxaru uttʼayi. Jesucristo apnaqkani ukhaxa, aka Uraqix mä paraisor tukuyatäniwa (Daniel 7:13, 14; Lucas 23:43, NM).
Kunjamsa Jehová Diosax arsutap phuqani uk jichhax uñjañäni:
MANQʼAX JILARKIRIW UTJANI: “Uraqix achunakap churi, [Jehová] Diosasaw askinak churistu”. “Trigox yapunakan jilarkir utjpan, qullu patanakansti jilantarakpan” (Salmo 67:6; 72:16).
JANIW CHʼAXWAÑANAKAX UTJXANITI: “Tatitun muspharkañ luräwinakap uñjir jutapxam, uraqin lurki uka muspharkañ luräwinaka, aka uraq tukuskamaw nuwasiñ tʼakurayi” (Salmo 46:8, 9).
JANIW ÑANQHA JAQINAKAX UTJXANITI: “Ñanqha luririnakax uraqit jaqunukutäpxaniwa [...]. Akat mä jukʼa urunakarux ñanqha lurir jaqinakax chhaqtxaniwa; jupanakar thaqkätasa, janiw jikxatkätati” (Salmo 37:9, 10).
JANIW TʼAQHISIÑAS USUNTAÑAS JIWAÑAS UTJXANITI: “Ukapachaw juykhunakax uñjapxani uqaranakas istʼapxarakini; suchunakasti taruja qallunakjamaw sinkʼusipxani, amutunakasti arnaqasipxarakiniwa” (Isaías 35:5, 6).
“[Jehová] Dios kipkarakiw jupanakampïni, jupanakan Diosaparakïniwa. Diosax taqi jachanakapwa nayranakapatxa picharani, janirakiw jiwañas, jachañas utjkxaniti, warariñasa ni usuyasiñasa. Taqi kunanakatï nayrax utjkän ukanakax tukusxiwa.” (Apocalipsis 21:3, 4.)
Supayas saxranakapas kʼarisirïpxiwa, ukampis Jehová Diosax janipuniw kʼariskaspati. Taqi kuntï arski ukanakax phuqasiñapapuniwa (Lucas 1:36, 37). Jehová Diosax jumar munastamwa, ukat aka Uraqi Paraisoptaykani ukan jakasiñamsa munarakiwa. Ukhamaxa, jankʼaki Jehová Diosan Qhanañchirinakapar thaqtasa Diosan Arupan jikxataski uka suma yatichäwinakapat yatxatma. Jumatï Diosan arunakaparjam sarnaqätaxa, kʼari yatichäwinakatsa, jan wali amuyunakatsa (supersticiones) qhispirakïtawa. Tiempompixa, juchatsa jiwañatsa qhispiyatarakïyätawa. Kunjamtï Jesusax siskänxa: “Uñtʼapxarakïtawa kunatix chiqäki ukxa, uka chiqa kankañasti qhispiyat sarnaqasiñ churapxarakïtam” sasa (Juan 8:32).