11 yatichäwi
Jutïrpachan jakasiñatakiw wakichasisipki
1, 2. ¿Kunjamsa profecianakax jiwasan uñjkañ phuqasiski?
JUTÏRPACHAN jakasiñatakiw wali muspharkañ wakichasisipki, ukäñkamasti Supayamp apnaqat akapachaw tukusiskaraki. Jiwasan uñjkañaw Diosax taqi chiqat jaqinakarux tantachthapiski ukat jutïr suma uraqin jakasipxañapatakiw suma chuyman jaqinakarux wakichaski. 2 Pedro 3:13 jiskʼa tʼaqanxa, uka suma chuyman jaqinakaxa, “machaq uraqi” satawa.
2 Biblian profecianakapax akham sarakiwa: “Qhipa urunakansti [jichhürunakan jakasktan uka urunaka] [...]. Taqi markanakasti uka qulluruw jutapxarakini, walja jaqinakaw jutapxani sapxarakiniwa: ‘jutapxam, Tatitun qullupar makhatapxañäni, [Diosan chiqpach yupaychäwiru] [...] jupax jiwasar sarnaqäwinakap yatichañapataki, ukat uka thakipanjam sarañasataki’” sasa (Isaías 2:2, 3).
3. 1) ¿Isaiasan profeciapax khitinakampis phuqasiski? 2) ¿Jupanakatxa kamsis Apocalipsis libronxa?
3 Khitinakatï Diosamp ‘yatichatäpki ukat uka thakinjam sarnaqapki’ jupanakampiw uka profeciax phuqasi. “Walja jaqinaka taqi markanakata, kunayman janchini, ukhamarak taqi casta parlani”, ukhamäpxiwa sasaw Apocalipsis libronxa qhanañchi. Mä wawakïpkaspas ukhamaw Diosar luqtasipki. Bibliax akham saskakiwa: “Akanakax wali jachʼa llakinakwa pasanipxi” sasa. Mä arunxa, aka ñanqha pachax tukusxani ukhax jupanakaw jakasipkakini (Apocalipsis 7:9, 14; Mateo 24:3).
Chiqpachapuniw jilat kullakanakax uraqpachan mayachtʼatäpxi
4, 5. ¿Kunatsa Jehová Diosan Qhanañchirinakapax uraqpachan mayachtʼatäpxi?
4 Jehová Diosan waranq waranqa Qhanañchirinakapaw uraqpachan taqi chuyma Diosan yatichäwinakaparux istʼasipki ukat ukarjam sarnaqañatakiw chʼamachasipxi. Diosan suma machaq uraqipan jakasiñwa suyasipki. Sapürus Jupan kamachinakaparjam sarnaqasinsti, jichhasa jutïrinsa Diosan Apnaqäwipar atinisitapwa uñachtʼayapxi. Taqi chiqanwa, kuna markatäpasa jan ukax kuna kast jaqïpasa, kuntï Diosax Biblian siski ukar istʼapxi. Ukatwa chiqpachapun jilat kullakanakax uraqpachan mayachtʼatäpxi, Diosaw ukham jutïr suma uraqin jakasipxañapatakix wakichaski (Isaías 54:13; Mateo 22:37, 38; Juan 15:9, 14).
5 Jehová Diosan Qhanañchirinakapax janiw jupanakpach mayachtʼat sarnaqapkaspati, ukham jupanakax amuyapxi. Jan ukasti, khitinakatï Diosan kamachinakapar istʼapki ukanakaruxa qullan ajayuw mayachtʼaski, ukwa jupanakax sum yatipxi (Hechos 5:29, 32; Gálatas 5:22, 23). Diosaw ukham luri. Kunjamatï Jesusax siskänxa, “kunatï jaqinakatakix jan lurasirjamakixa, Diosatakix lurasispawa” (Lucas 18:27). Ukhamasti, taqi kun wiñayatak Lurir Diosawa, jaqinakarux jutïr machaq uraqin jakapxañapatakiw wiñayatak utjayani.
6. Jehová Diosan Qhanañchirinakapax mayachtʼat sarnaqapxi ukax mä milagrowa, ¿kunatsa ukham sisna?
6 Ukhamaxa, Jehová Diosan Apnaqäwipax apnaqxani ukhaxa, ¿kunjamänis jutïr machaq uraqixa? Jichhürunakanwa ukax uñjasiski. Ukham Jehová Diosan Qhanañchirinakapax mayachtʼatäpki ukaxa, mä milagrükaspas ukhamawa. ¿Kunatsa? Kunattix uraqpachanwa mä familiäkaspas ukham sarnaqasipxi, janipuniw khitis jaljtaykaspati. Taqi chiqanwa Jehová Diosan Qhanañchirinakapax utji, 235 jukʼamp markanakan jakasipkchisa, mä wawakïkaspas ukham sarnaqapxi. Chiqpachansa, janipuniw nayrax ukham uñjaskänti, Diosan milagropapuniwa (Isaías 43:10, 11, 21; Hechos 10:34, 35; Gálatas 3:28).
Kunjamatsa Diosan markapar uñtʼsna
7. ¿Kunjamats Jesusan chiqpach arkirinakaparux uñtʼsna, ukat Jesusax uka tuqit kamsänsa?
7 Diosax machaq uraqin jakasipxañapatakiw markapar wakichaski, ¿khitinakas markachirinakapaxa, uk kunjamats uñtʼsna? Chiqansa, ¿khitinakas Juan 13:34, 35 jiskʼa tʼaqanakan Jesusax arskäna uka arunak phuqasipki? Jupax akham sasaw säna: “Aka machaq mandamientwa churapxsma: Maynit maynikama munasipxam. Kunjämtix nayax munasipxsma, ukhama jumanakax maynit maynikam munasipxañamarakiwa. Jumanakatix maynit maynikama munasipxätaxa, taqiniw amuyapxani nayan discipulonakaxäpxatama”. Jehová Diosan Qhanañchirinakapax uka arunakaruw iyawsapxi ukat ukarjamaw sarnaqapxaraki. Kunjamatï Bibliax siskixa, ‘jupanakanxa munasiñax utjapuniwa’ (1 Pedro 4:8). ‘Wali munasiñanïpxiwa, munasiñasti mayaruw tukuyi.’ (Colosenses 3:14.) Uka munasiñaw “mayachi”, ukatwa mä wawak uraqpachan sarnaqasipxi.
8. ¿Kunjamsa 1 Juan 3:10-12 jiskʼa tʼaqanakax Diosan markapar uñtʼañatakix yanaptʼistu?
8 Ukampisa 1 Juan 3:10-12 jiskʼa tʼaqanakanxa akham siwa: “Ukhamatwa yatisi khitinakas Diosan wawanakapaxa, khitinakarakis Supayan wawanakapäkarakis ukaxa. Kawkïritix jan aski lurkixa, ukhamarak jan jilaparus munaski ukaxa, janiw Diosankkiti. Aka arunakwa istʼapxtaxa qalltäwitpacha: ‘Munasipxam maynit maynikama’ sasa. Janiw Cainjamäñasäkiti, jupax Supayankirïnwa ukatwa jilaparu jiwayi” sasa. Kunjamtï uñjktanxa, Diosan markapax uraqpachan mayachtʼataw sum sarnaqasipxi, janiw nuwasiñanakarux mitisipkiti.
Kuna tuqitsa Diosan markapar uñtʼaraksna
9, 10. 1) ¿Qhipa urunakanxa kunsa Diosan luqtirinakapax lurapxañapa? 2) ¿Kunjamsa Mateo 24:14 jiskʼa tʼaqan siski uk phuqapxi?
9 Yaqha tuqitwa Diosan luqtirinakaparux uñtʼaraksna. Jesusax akapachan tukusiñ urunakapanxa kunayman chimpunakaw utjani sasaw satayna (9 yatichäwi uñxattʼarakisma). Mä wakiskir profeciax Mateo 24:14 jiskʼa tʼaqan qillqatawa, ukanxa akham siwa: “Diosan reinopat aka suma yatiyäwisti aka uraqpachanwa yatiyatäni, ukhamat taqi markanakan yatipxañapataki, ukatsti akapachan tukusiñapaw jutani” sasa.
10 ¿Uka profecía phuqasir uñjtanti? Jïsa, 1914 marat aksaruw Jehová Diosan Qhanañchirinakapax Diosan Apnaqäwipat uraqpachan jaqinakarux yatiyasipki, kunjamtï Jesusax siskäna ukhama, mä arunxa utat utaw jaqinakar yatiyir sarasipki (Mateo 10:7, 12; Hechos 20:20). Taqi chiqanwa jutïr machaq uraqit parlañataki sarapxi. Ukatwa, jumas aka qillqat katuqpachäta, Jehová Diosan Qhanañchirinakapax Bibliat apstʼat millón millón qillqatanak lurapxi ukat Diosan Apnaqäwipat yatiyañatakiwa lakirapxaraki. ¿Jumax yaqhanakat ukham utat uta Diosan Apnaqäwipat uraqpachan yatiyirinak uñtʼtati? Marcos 13:10 jiskʼa tʼaqaxa ‘nayraqataw’ aka yatiyäwinakax yatiyasiñapa ukat yatichasiñaparaki, janïr aka pachan tukusiñap jutkipan sasaw qhanañcharaki.
Payïr jan waltʼäwiruw qhanañchasi
11. Jehová Diosan Qhanañchirinakapaxa, ¿Diosan kamachinakapar istʼasax kuns uñachtʼayapxi?
11 Janiw khitis jan waltʼäwinakampi yantʼatax Diosar luqtkaniti sasaw Supayax satayna, Jehová Diosan Qhanañchirinakapax Diosan kamachinakaparu ukat yatichäwinakapar istʼasaw Supayan kʼarïtap uñachtʼayapxi, ukhamatwa payïr jan waltʼäwirux qhanañchapxi (Job 2:1-5, NM). Jehová Diosan walja Qhanañchirinakapaxa, mä cuerpükaspas ukham mayachtʼataw taqi chuym Diosan Apnaqäwipar atinisipxi. Pantjasir jaqinakäpxchisa ukat Supayamp yantʼatäsipkchisa janipuniw Diosan jachʼakankañapat jithiqtapkiti.
12. ¿Khitinakatsa Jehová Diosan Qhanañchirinakapax yatiqasipxi?
12 Jichhürunakanxa, Jehová Diosan walja Qhanañchirinakapaw kunjamatï nayra luqtirinakapax taqi chuym luqtapkäna ukham luqtasipki. Abel, Noé, Job, Abrahám, Sara, Isaac, Jacob, Débora, Rut, David ukat Daniel, jupanakaw taqi chuym Jehová Diosan yaqhip luqtirinakapaxa (Hebreos, 11 jalja). Kunjamtï Bibliax siskixa, “walja iyawsañani jaqinakampi muyuntatätan[wa]” (Hebreos 12:1). Jupanakasa ukat Jesusan arkirinakapasa ukham taqi chuym Diosar istʼasaw sarnaqapxäna. Ukat Jesús pachpaw ukham sum istʼañ uñachtʼäwayäna.
13. ¿Jesusan kuna arunakapas Supay tuqit phuqasiwayi?
13 Kuntï Jesusax Supayxat judionakan yupaychäwip pʼiqtʼirinakarux siskäna ukax chiqäskapuniwa, jupax akham sänwa: “Kuntix Diosax nayaru yatichkitu ukarakwa jumanakarux sapxsma, jumanakasti uk sataxatakwa jiwayañ munapxista. [...] Jumanakax awkinakaman luräwinakapwa lurapxta [...]. Jumanakan awkimax Supayawa, jumanakax Supayankapxtawa. Kuntix jupax munki ukwa lurapxaraktaxa. Supayax qalltatpacha jaqi jiwayiriwa. Janiw kunapachas jupax chiq parlkiti, jupax kʼarïtap layku. Kunapachatix kʼarinak parlki ukkhaxa jupatakwa parlaski, kʼarïtap layku, ukhamarak kʼarin awkipätap laykuraki” sasa (Juan 8:40-44).
¿Kuns jumax luräta?
14. Machaq uraqin jakañatak wakichtʼasisipki ukanakaxa, ¿kunjamäsipkis jichhürunakanxa?
14 Jichhürunakanxa, jutïr machaq uraqin jakañatakiw Jehová Diosan Qhanañchirinakapax wakichtʼasisipki ukat sapürutjamaw uraqpachan jilxattasipki. Sapa marax millón millón jaqinakaw chiqa arunak yatiqasax Jehová Diosan Apnaqäwipar iyawsañatak amtaparjam sum sarnaqasipki. Ukham sum sarnaqasaxa, Diosan jachʼakankañap tuqit saytʼasipxi, ukhamatwa Supayan kʼarïtap uñachtʼayapxi.
15. ¿Mateo 25:31-46 qillqatarjamaxa kunsa Jesusax lurani?
15 Diosan jachʼakankañap tuqit saytʼasisaxa, Criston ‘kupïxaparu’ uchayasiñatakiw mayitanak phuqapxani, kunapachatï Cristox ‘uwijanakarux cabranakat’ jaljkäni ukhaxa, jupanakarux kupïxaparuw uchani. Qhipa urunakat parlkasaxa Jesusax akham sänwa: “Taqi markanakankir jaqinakarakiw jupan nayraqataparux tantachtʼasipxani. Jupasti jupanakarux jaljarakiniwa, kunjämtix awatirix ovejanakarux cabritonakat jaljkix ukhama. Ovejanakaparusti kupïxaparuw ucharakini, cabritonakarusti chʼiqäxaparuraki” sasa. Uwijanakaxa, altʼat chuymani, Criston jilanakapamp chika sarnaqiri ukat Diosan jachʼakankañapar iyawsir jaqinakäpxaniwa. Cabranakax kutkatasiri ukat Criston jilanakaparus uñisipxi ukat Diosan jachʼakankañaparus jan iyawsapki ukanakäpxaniwa. ¿Kunas jupanakar pasani? Jesusax akham sataynawa: “Jichhax [cabranakax] wiñay [tʼunjatä] ñaruw jupanakax sarapxarakini, aski jaqinakasti [uwijanakax] wiñay jakañarurakiw sarapxani” sasa (Mateo 25:31-46).
16. Jumatï jutïr paraison jakañ munstaxa, ¿kuns jichhax lurañama?
16 Jïsa, ¡Diosax sum jakasiñas muni! Niyaw mä suma paraíso churistani. ¿Jumax uka paraison jakasiñ munasmati? Ukhamächixa, kuntï Jehová Diosax jupat yatiqañatak churkistu ukanakat yatxataskakiñamawa, ukat uka yatiqatarjam sarnaqañamarakiwa. “Tatitur thaqtapxam jikxatañjamäkipana, jakʼankkipan jawsapxam. Qhuru jaqix sarnaqäwipxa apanukpan, ñanqha amtañan jaqisti amtañanakapxa apanukpan; Tatitun ukar kuttanxapxam, jupasti jumanakatxa khuyapayasipxätamwa” sasaw Diosan Arupax sistu (Isaías 55:6, 7).
17. Khitirus luqtañäni uk ajlliñatakix janiw tiempox utjxiti, ¿kunatsa ukham sistanxa?
17 Janiw tiempox utjxiti. Niyaw aka ñanqha pachax tʼunjatäxani. Diosan Arupax akham sasaw iwxtʼistu: “Jan akapachar munirïpxamti, janirak akapachan yänakapsa. Kawkïritix akapachar munaski ukanxa, janïraw Dios Awkitak munasiñapax utjkiti. [...] Akapachax tukusirikiwa jan wali luräwinakapamppacha, ukampis kawkïritix Diosan munañap lurki ukax wiñayatakiw jaki” sasa (1 Juan 2:15-17).
18. ¿Kun lurasas Diosan suma machaq uraqin jakasisma?
18 Jichhürunakanwa Diosan markapax jutïr machaq uraqin jakasiñatakix yatichatäsipki. Kunattix paraíso lurañatakix wakiskani uk yatiqasipki. Jehová Diosar Apnaqirjam ajllipxañamataki ukat kuntï Jupax jaqinakar qhispiyañataki uraqpachan luraski ukar yanapapxañamatakiw chʼamañchasinipksma. Jehová Diosan Qhanañchirinakapamp Bibliat yatiqam ukatwa juman sum jakasiñam munir Diosarux uñtʼata, ukat Jupaw tʼaqhisiñanakarux chhaqtayani, uksa yatirakïtawa. Ukhamatwa Diosamp iyawsayasiñxa taqi chuymamp suyasma, ukat wiñayatak uka suma machaq uraqin jakasirakismawa.
[31 janan fotopa]
Jehová Diosan Qhanañchirinakapax chiqpachapuniw jilat kullakanakjama uraqpachan mayachtʼatäpxi
[32 janan fotopa]
Jichhürunakanwa Diosan markapax jutïrpachan jakasiñatakix wakichasiski