Jiwatanakatakix jaktäwi suytʼäwix utjapuniniwa
AKHAM sasaw 25 maran mä warmix qillqatayna: “Uywasir mamitajaxa 1981 maranwa cáncer usumpi jiwawayxi. Jiwatapaxa nayarus jilajarus wali llakitpun jaytawayapxitäna, ukampis jilajax nayjam uywat wawapakirakïnwa. Ukapachaxa nayax 17 maranïyätwa, ukat jilajasti 11 maranirakïnwa. Jupat walpun llakisïyäta. Niyakixay jiwatanakax alaxpacharuw sarapxi sas yatichapchitänxa, jupampïñatakix jiwayasiñ munxayäta. Jupaxa wali suma amigajapunïnwa” sasa.
¡Kunapachatï jiwañax mä munat familiarasar jan ukax amigosar apaqkistu ukhaxa janipuniw akchʼas walïkiti! Ukat jiwxi ukhaxa janipuniw jupampix mayamps parlxañäniti, larxañänisa ni qhumanttʼasxañänisa, ukanak yatisax jan aguantañjamäspawa. Ukat munat familiaramax jan ukax amigomax alaxpachankxiw sasax sapkchistusa ukax janiw llakis apaqkistuti.
Ukampisa, Bibliax yaqha suytʼäwitwa parli. Kunjamtix sisktanxa, Bibliax jutïr urunxa wasitampiw jiwatanakampix jikisxañäni siwa, ukampis janiw mä jan uñtʼat alaxpachanxa jan ukasti aka pachpa Uraqinwa wali suma jakasiñataki jikisxañäni. Uka urunxa jaqinakax kʼumaraw jakasipxani, ukat janipuniw mayamps jiwxapxaniti. Inas yaqhipanakax ‘kawkit chiqänix’ sasaw sapxaspa.
¿Kunjamatsa jumax uka suytʼäwix chiqapuniw utjani sasax sasma? Ukax utjapuniniw sañatakixa, khititï jaktaykani ukax ukham lurañ munpachati, ukat uk lurañatakix chʼamanirakïpachati, uka tuqit maynix wali sum yatiñapawa. ¿Khitiraki jiwatanakax wasitampiw jaktanxapxani sas arsuwayisti?
Panqaranakax panqarki uka phaxsinwa 31 maran Jesucristox akham sänwa: “Kunjämtix Awkix jiwatanakar jaktayixa, ukhamarak jakañ churi, Yuqapax khitinakarutix munki ukanakarux jakañxa churarakiwa. Jan muspharapxamti ak arsutaxatxa, horasax purininiwa taqi jiwatanakasti [Jesusan] arupx istʼapxaniwa. Ukatsti uka jiwatanakax jaktapxaniwa” sasa (Juan 5:21, 28, 29). Chiqpachansa, walja jiwatanakaw jaktanipxani ukat aka Uraqin mä paraison wiñayatakiw jakasxapxani sasaw Jesucristox arsuwayäna (Lucas 23:43; Juan 3:16; 17:3; ukat Salmo 37:29 ukat Mateo 5:5 uñxattʼarakïta). Niyakixay Jesusax uk arsuwaychixa, inas janiw lurañ munkpachati sasaw sissna. Ukampis ¿uk luraspati?
Janïr pä mara uka arsutapat saraqkipanwa Jesusax uka arsutapax chiqapunïtap ukat jiwatanakar jaktayañatakis chʼamanïtapwa wali qhana uñachtʼayäna.
“¡Lázaro, mistunim!”
Kuntï Jesusax lurkäna ukaxa wali muspharkañapunïnwa. Lazarow wali usuntat jikxatasïna, ukañkamaxa Jesusax Jordán jawir khurkatankaskänwa ukatwa María ukat Marta kullakanakapax akham sas yatiyañapataki khitapxäna: “Tata, amigomaw usuta” sasa (Juan 11:3). Jesusaxa Lazarorux wal munasïna ukxa jupanakax yatipxänwa. Ukhamaxa, ¿janit Jesusax munat amigopar uñjiri sarkasapänxa? Ukampisa Betania markar sarañat sipansa, Jesusax pä urumpiw kawkinkantï ukhan qhiparäna (Juan 11:5, 6).
Ukat kunapachatï Jesusarux Lazarow usuntata sas yatiyapkäna, uka qhipatwa Lazarox jiwxäna. Kuna horasarus Lazarox jiwxäna ukxa Jesusax yatïnwa, ukatwa yanaptʼaniñ munäna. Ukat kunapachatï Betania markar purxän ukhaxa, Lázaro amigopax pusi uruw jiwatäxäna (Juan 11:17, 39). ¿Ukham walja urunak jiwatarux Jesusax jaktayaspänti?
Ukat Jesusan purinxatap istʼasinxa, Martax jankʼakiw Jesusar katuqirix tʼijukamaw saräna (Lucas 10:38-42 uñxattʼarakïta). Martar wali llakit uñjasaxa, Jesusax akham sasaw säna: “Jilamax jaktaniwa” sasa. Ukat khipa urun jaktañap yattwa sas Martax sän ukhaxa, Jesusax jan payachasisaw akham säna: “Nayätwa jaktañasa, jakañasa. Khititix nayaru iyawsarakitu ukaxa jiwatäkanisa, jakaniwa” sasa (Juan 11:20-25).
Ukat kawkhantï imatakän ukar purisinxa, uka qala atiqapxam sänwa. Ukxarusti jachʼatwa Diosar mayïna ukat akham sasaw jachʼat artʼäna: “¡Lázaro, mistunim!” sasa (Juan 11:38-43).
Ukat kawkhantï jiwatax imatäkäna ukaruw taqpachanis wal uñchʼukisipkäna. Ukat mä akatjamatwa chʼamak taypitxa maynix kayunakapas amparanakapas chʼuqañanakampi chʼuqantata ukat ajanupas mä tukuyumpi imantata mistsunirakïna. Ukat “jararapxam, sarnaqpan sam”, sasaw Jesusax säna. Ukat kunapachatï taqpach chʼuqatanakapax jarartxäna ukhaw pusi urunak jiwatäkän uka Lazarötap amuyapxäna (Juan 11:44).
¿Chiqapunit jaktanpachäna?
Lazarox kunjamsa jaktäna ukax apóstol Juanan qillqatanakapankiwa. Kunjamsa pasatayna, taqi ukanak yatiñax jan armkañapuniwa. Ukat uka jaktäwix janiw chiqäkiti sisna ukhaxa, Biblian taqi milagronakat parlki ukanakax janiw chiqäkiti sisksnasa ukhamäspawa, ukat Jesusan jaktäwipas janiw chiqäkiti sisksnas ukhamäspawa. Ukat Jesusax janiw jiwatat jaktkiti sañax janis iyawsäwin cristianoksna ukhamäspawa (1 Corintios 15:13-15).
Jumatï Diosax utjiw sasax sistaxa, jaktaniñ suytʼäwir iyawsañax janiw jumatakix chʼamäñapäkiti. Amuytʼañataki wali jaya maranak jiwatäxapxi uka wali uñtʼat cantir jaqinakaruxa cantaskiri ukat político jaqinakarus parlaskirwa televisionanx uñjtanxa. Ukax nayra patak maranakanxa jaqinakatakix jan amuytʼkañjamäspänwa. Jichhakamasa, jaya pata uraqinakanx ukham televisionana walja mar jiwatäxapxi ukanakar parlaskir ukat sarnaqir uñjapxi ukhaxa, wal muspharapxi, mä milagrokaspas ukhamawa. Ukat jaqinakaxa, kuntï Jehová Diosax lurki ukat yatiqasisaxa, ukhamarakiw jupanakax jaqinakar parlaskirsa televisionan uñstayapxi, ukhamaxa, ¿janit Diosax jaqinakat sipansa jukʼamp lurkaspa? ¿Janit jakäw churir Diosax jiwatäpki ukanakarux kunjamäpkantï ukham pachpa wasitatampi lurkaspa?
Jesusax Lazaror jaktayäna uka milagroxa, Jesusarus ukat Jesusan jaktataparus iyawsapxañapatakiw waljaninakarux yanaptʼawayi (Juan 11:41, 42; 12:9-11, 17-19). Ukat uka milagrox Jehová Diosas Yuqapas jiwatanakar wal jaktayañ munapxatapwa uñachtʼayaraki.
‘Diosax walpun jaktayañ muniʼ
Lazarox jiwxän ukhax kunjams Jesusax jikxatasïna ukax Diosan Yuqapax wali munasiñanïtap uñachtʼayi. Uka urun Jesusax wali llakit jikxatasitapaxa, jiwatanakar wal jaktayañ munatapwa uñachtʼayistu. Bibliax uka tuqit akham siwa: “Mariax Jesusan ukaru purisinsti, Jesusan kayunakaparuw killtʼasi ukatsti sarakiwa: ‘Tata, jumatix akankaskasamäna ukaxa, jilaxax janiw jiwkasapänti’ sasa. Jesusax Mariaru jachiri uñjasinxa, ukhamarak jupamp chika jutiri judionakar jachir uñjasinsa, llakitaw uñjasïna, chuymapsti chʼallxtayasirakïnwa. Ukatsti Jesusax jisktʼänwa: ‘¿Kawkirus imapxta?’ sasa. Jupanakasti sapxänwa: ‘Tata, jutamay uñjiri’ sasa. Jesusasti jachänwa. Judionakasti sapxarakïnwa: ‘Uñtapxam kunjsa munasitaynaʼ” sasa (Juan 11:32-36).
Jesusan taqi chuyma khuyaptʼayasitapaxa ukanxa kimsa arunakampiw akham qhanañchasi: “llakitaw uñjasïna”, “chuymapsti chʼallxtayasïnwa” ukat “jachänwa” sasa. Ukat griego arun qillqaskäna ukanxa, kunjamsa Jesusarux amigopan jiwatapax wal chuymap chʼallxtayäna ukat kullakapar jachiri uñjasas kunjamas jikxatasïna uksa qhanañcharakiwa.
Jesusax paninir jaktayxchïnsa, uka pachparakiw Lazarompix lurañ munäna uka luräwix jukʼamp aski luräwïnwa kunattixa (Juan 11:11, 23, 25), ukhax Jesusax “jachänwa”. Ukhamax Jesusatakix jiwatanakar jaktayañax janiw aliq luräwikïkiti. Uka urun wali munasiñ chuymanïtap uñachtʼayasax kuna jan walintï jiwañax jaqinakar purtʼasiykixa ukanak wal askichañ munatapwa uñachtʼayi.
Jesusax munasiñapat Lazaror jaktayasaxa kuna jan waltʼäwinti jiwañax uñjasiyistu uk wal chhaqtayañ munatap uñachtʼayi
Ukat niyakixay Jesusax ‘Jehová Dios awkip kikpächixa’ ukhamaxa alaxpachankir Awkisax jukʼamp askinak lurani (Hebreos 1:3). Jehová Diosaxa jiwatanakarux wal jaktayañ muni sasaw Job chachax akham säna: “¿Mä jaqisti jiwxasinxa wasitat jaktanxaspati? [...] Jumatix jawsitasmaxa, nayax jaysarakirismawa; munasiñampiw uñtanitasmaxa, jumaxay nayaru uskuschistaxa uka layku” sasa (Job 14:14, 15). Ukat “muniwa” siski ukaxa Hebreo arunxa, Diosax jiwatanakarux wal jaktayañ munatap sañ muni (Génesis 31:30; Salmo 84:2). Chiqpachansa Jehová Diosax jiwatanakax jaktanipkani uka urxa walpun suyaski.
Bibliax jiwatanakax jaktanipxaniw siwa, ¿ukax ukhamapunïniw sistanti? Jïsa, kunattix Jehová Diosasa Yuqapasa uk phuqañxa wal munapxi ukat lurañatakisa chʼamanïpxarakiwa. ¿Ukax jumatakix kun sañs muni? Jumaxa, jiwxapxi uka munat familiaramampis amigonakamampis niyaw aka Uraqin jikisxäta ukampis janiw kunjamäkäntï nayrax ukhamxa jan ukasti wali suman jakasiñatakiw jaktanipxäni.
Jehová Diosaxa, mä suma paraison jakasipxañapatakiw jaqinakarux lurawayi, Jupa kikpawa aka Uraqxa wasitamp mä paraisor tukuyä sasax arsuwayi, ukxa alaxpachankir Jesusax Diosan Apnaqäwipan apnaqxani ukhawa ukanakax phuqasini (Génesis 2:7-9; Mateo 6:10; Lucas 23:42, 43). Uka Paraisonwa jaqinakax wiñayataki jan usuntas jakasxapxani (Apocalipsis 21:1-4; ukat Job 33:25; Isaías 35:5-7 uka qillqatanak uñxattʼarakïta). Ukat uñisiñasa, yaqha kasta janchin jaqinakar uñisiñasa, markanak pura uñisisirinakasa, qullqit pistʼañasa tukusxarakinïwa. Jehová Diosax Jesucristompiw jiwatanakarux mä suma qʼuma Uraqin jakasipxañapatakiw jaktayani.
Jesucristox jiwatapampiw jiwañat qhispiyistu, uka jaktäwiw taqi markanakarux kusisiñ churani
Aka yatichäw qalltan parlkayätan uka kullakaxa uka pachpa suytʼäwinïxarakiwa. Mamitapan walja maranak jiwatapatxa Jehová Diosan Qhanañchirinakapaw Bibliat jukʼamp suma yatxatañatakix yanaptʼapxatayna. Ukat jupax akham siwa: “Jiwatanakax jaktanxapxaniw siskis uk yatiqäyäta ukhaxa jachaqtʼasïyätwa. Nayatakixa mamitajampi wasitat jikisxañäni siski uk yatiñax wali kusiskañapunïnwa”.
Ukat jumatï jiwat familiamampi jan ukax amigomampi jikisiñ wal munarakstaxa, Jehová Diosan Qhanañchirinakapaw uka chiqpach suytʼäwinïñamatakix yanaptʼapxiristamxa. Ukatakix uta jakʼaman kawkhantï Jehová Diosan Qhanañchirinakapax tantachasipki ukaruw sarasma, jan ukax kawkhans jakasta ukxa 32 janankki uka direccionaruw qillqarakisma.