1 Yatichäwi

Kunsa Diosax mayistu uk kunjamatsa yatxatasma

¿Kuna wakisiri yatichäwinakanisa Bibliaxa? (1)

¿Bibliax khitin apayanitasa? (2)

¿Kunatsa Bibliat yatiqañamaxa? (3)

1. Bibliax Diosan suma churäwipawa. Kunjamtï mä munasir awkixa wawanakapar carta apaykix ukhamawa. Diosatwa kunatï chiqäki uk sistu: khitis jupaxa, kawkïrinakas kamachinakapaxa ukanak yatichistu. Kunjamatsa jan waltʼañanakaru saykatsna ukat wali kusisita jakassna ukanakwa qhanañchistu. Kun lurasas Diosar kusisiysna ukxa Bibliakiw yatichistu (Salmo 1:1-3; Isaías 48:17, 18).

2. Bibliax mä 40 chachanakan qillqatänwa, nayrïr pach 1513 maranwa qillqañ qalltasïna, ukat niya 1600 maranakanwa tukuyapxäna. 66 libronakaniwa. Biblia qillqirinakaxa Diosan amuytʼayatäpxänwa, janiw jupanakan amuyunakapa qillqapkänti jan ukasti Diosan amuyunakapwa qillqapxäna. Ukhamasti, Bibliaxa janiw aka Uraqinkiri jaqinkkiti, jan ukasti alaxpachankiri Diosan apayanitawa (2 Timoteo 3:16, 17; 2 Pedro 1:20, 21).

3. Bibliaxa kunjam qillqatäkäntï ukhampacha qillqaqasiñapatakixa Diosaw sum uñjaskäna. Kuna librot sipansa Bibliawa jukʼampi lurasiwayi. Janiw taqinisa Bibliat yatiqañamxa munapkaniti, ukampisa yatiqaskakiñamawa. Jan yatiqamti satpachasa Diosaru uñtʼaskakïta ukat munañapa luraskakïta ukhaw wiñay jakañxa katuqäta (Mateo 5:10-12; Juan 17:3).