3 Yatichäwi
¿Khitis Jesucristoxa?
¿Kunatsa Jesusax Diosana jilïri Yuqapa sataxa? (1)
¿Kunatsa “Aru” sataxa? (1)
¿Kunatsa Jesusax mä jaqjama aka Uraqir jutäna? (2-4)
¿Kunatsa milagronaka luräna? (5)
¿Kunsa Jesusax niy lurani? (6)
1. Jesusaxa janïra aka Uraqiru jutkasaxa alaxpachanwa mä angeljam jakasïna. Diosaxa juparuwa nayraqat luratayna; ukatwa Diosan “nayrïri” jan ukaxa jilïri Yuqapa sataxa (Colosenses 1:15; Apocalipsis 3:14). Diosaxa Jesusarukiwa jan khitimpi yanapayasisa luratayna. Jesusaxa janïra jutkasaxa Jehová Diosaruw alaxpachansa aka Uraqinsa taqi kun lurañ yanaptʼaskäna (Proverbios 8:22-31; Colosenses 1:16, 17). Diosan yatiyiriparakïnwa. Ukatwa “Aru” satarakixa (Juan 1:1-3; Apocalipsis 19:13).
2. Diosaxa Yuqapan jakäwipa Marian purakapar uchasawa aka Uraqir khitanïna. Ukhamasti, Jesusan awkipax janiw mä jaqïkänti; ukatwa jaqinakjam jan juchanïkänti. Kimsa amtampiw Diosax khitanitayna: 1) Diosat kunatï chiqäki uka yatichañataki (Juan 18:37), 2) Jesusjam Diosat jan jithiqtas sum sarnaqaña yatiqasiñasataki (1 Pedro 2:21), 3) jakäwipa jiwas layku luqtasiñataki ukhamata juchampita jiwañampita jiwasar qhispiyañataki. ¿Kunatsa uka luqtäwixa munasïnxa? (Mateo 20:28.)
3. Diosar jan istʼasaxa kunatï Biblianxa “jucha” satäki ukaruwa Adán sata nayrïri chachax puritayna. Ukatwa Diosax jiwañaru katuyatayna (Génesis 3:17-19). Diosan kamachinakaparjam jan sarnaqasaxa juchanïxänwa. Jukʼat jukʼatwa awkiptxäna ukat jiwxäna. Taqi wawanakapawa Adanat jucha katuqawaytanxa. Ukatwa chuymankipttansa, usunttansa, jiwaraktansa. ¿Kunjamatsa jaqinakar qhispiyasispäna? (Romanos 3:23; 5:12.)
4. Jesusaxa Adanjam jan juchan jaqïnwa. Ukatxa, taqi kunanwa Diosaru istʼäna, jachʼa yantʼanakansa istʼaskakïnwa. Ukhamasti, Adanan juchapat qhispiyañatakixa Jesusakiw jan juchani suma jakäwip luqtasapäna. Biblianxa uka luqtäwixa “qhispiyäwi” satawa. Ukhamatwa Adanan wawanakapaxa jiwañata qhispiyatäpxasapänxa. Khitinakatï Jesusaru iyawsapki ukanakawa juchanakapata pampachatäpxani ukat wiñay jakañsa katuqapxarakini (1 Timoteo 2:5, 6; Juan 3:16; Romanos 5:18, 19).
5. Kunapachatï Jesusax aka Uraqinkkäna ukhaxa usutanakaruw qulläna, awtjatanakarusa manqʼayänwa ukatxa jachʼa thayanaksa tʼakuyänwa. Jiwatanakarusa jaktayarakïnwa. ¿Kunatsa uka milagronak lurpachäna? 1) Tʼaqhisitanakat wal sinttʼasïna ukatwa yanaptʼañ munäna. 2) Milagronakapaxa Diosan Yuqapätapwa uñachtʼayäna. 3) Apnaqkani ukhaxa istʼasiri jaqinak laykux kuns lurani uk uñachtʼayarakïna (Mateo 14:14; Marcos 2:10-12; Juan 5:28, 29).
6. Jesusax jiwxänwa, ukampisa Diosaw mä ajayjama jaktayxäna ukat alaxpacharuw kutkatxäna (1 Pedro 3:18). Ukatxa Diosax Apnaqirit uttʼayxi. Jesusaxa niyaw taqi jan walinaksa, tʼaqhisiñanaksa aka Uraqit chhaqtayani (Salmo 37:9-11; Proverbios 2:21, 22).
[7 janan fotonakapa]
Jesusaxa jaqinakaruwa yatichäna ukat milagronak luräna, ukatxa jiwasanak laykuwa luqtasiwayi