4 Yatichäwi

¿Khitis Supayaxa?

¿Kunjamatsa Supayax utji? (1, 2)

¿Kunjamsa Supayax jaqinakar sallqji? (3-7)

¿Kunatsa Supayampi jan atipayasiñamäkixa? (7)

1. Supaya jan ukax “Diablo” aruxa yaqhanakat jan wali kʼarinak parliri sañ muni. “Satanás” arusti uñisiri jan ukaxa kutkatasiri sañ munaraki. Aka arunakampi uñtʼatawa Diosan jachʼa uñisiripaxa. Qalltanxa suma angelänwa, alaxpachanwa Diosampi qamasïna ukatxa jachʼa jachʼaw tukxäna, Diosjama yupaychayasiñwa munxäna (Mateo 4:8-10).

2. Supayasti mä asirumpiwa Evar arxayäna ukat kʼarimpi kʼarimpiwa Diosar jan istʼaykänti. Ukhamatwa Supayax Diosan “jachʼa kankañaparu” qallasitayna. Diosaxa janiw sum apnaqkiti, janiw jaqinakan sumankañapsa munkiti sasaw payachasiyatayna. Ukatxa, khiti jaqisa Diosat jithiqtakispawa sarakitaynawa. Ukham lurasawa Diosan uñisiripar tukutayna. Ukatwa Supay Satanás sataxa (Génesis 3:1-5; Job 1:8-11; Apocalipsis 12:9).

3. Satanasaxa yupaychayasiñatakiwa jaqinakar sallqji (2 Corintios 11:3, 14). Mä tuqitxa kʼari yupaychäwinakampiw sallqji. Diosata kʼarinak yatichiri yupaychäwinakaxa Supayan munañapwa lurasipki (Juan 8:44). Inasa kʼari yupaychäwinkiri jaqinakaxa chiqpach Diosaruwa yupaychasipkta sapxchispa, ukampisa Supayaruw luqtasipki, jupawa ‘akapachan diosapaxa’ (2 Corintios 4:4).

4. Layqasiñanakampiwa Satanasax jaqinakar apnaqaraki. Yaqhipanakaxa inasa ajayunakaru jawsapxchispa jan walinakat jarkʼaqayasiñataki, yaqhanakaru jan waltʼayañataki, qhipürunakata yatiñataki jan ukax milagronak lurañatakisa. Satanasawa taqi ukanakxa lurayi. Diosar kusisiyañ munasaxa janipuniw kunäkipansa ukanakxa lurañasäkiti (Deuteronomio 18:10-12; Hechos 19:18, 19).

5. Supayaxa kasta tuqit jachʼachasiñanakampi ukat politicaru mitisiñampiwa jaqinakar sallqjaraki. Yaqhipanakaxa markapasa jupasa yaqhanakat sipan wali sumäkaspa ukham amuyasipxi. Ukax janiw chiqäkiti (Hechos 10:34, 35). Yaqhanakasti politiconakaw jan waltʼañanak askichani sapxarakiwa. Ukhamatwa Diosan Apnaqäwipa maysaru apanukupxi, uka Apnaqäwikiwa taqi jan waltʼäwinakasxa askichaspa (Daniel 2:44).

6. Jucha lurañanakar wiytasaw Supayaxa jaqinakar sallqjañ yatiraki. Uka jan wali luräwinakax jan walinakaruw puriyistaspa, uk yatisaw Jehová Diosaxa ukanakat jithiqtapxam sistuxa (Gálatas 6:7, 8). Yaqhipanakax jupanakamp chika jan walinak lurañamwa munapxaspa. Ukat ak amtañamawa, Supayaw ukanak lurañam munaski (1 Corintios 6:9, 10; 15:33).

7. Jehová Diosat jithiqtañamatakiwa Supay Satanasax arknaqayiristam jan ukax uñisiyiristamxa. Bibliat yatiqaskatamatxa inasa familiaranakamaxa wal phiñasipxchispa, yaqhanakasa larusipxchispa. Ukampisa, ¿khitis jakañ churtamxa? Supayax Jehová Diosata jan yatiqaskakiñamatakiwa sustjañ muntamxa. Jan atipayasimti (Mateo 10:34-39; 1 Pedro 5:8, 9). Supayaru atipjasaxa, Jehová Diosaruw kusisiyäta, ukatxa Apnaqäwiparu atinisitamwa uñachtʼayarakïta (Proverbios 27:11).

[9 janan fotonakapa]

Kʼari yupaychäwinakasa, layqasiñanakasa ukat kasta tuqit jachʼachasiñanakasa jaqinakaruw sallqji

[9 janan fotopa]

Jehová Diosata yatiqasa Satanasaru atipjma