6 Yatichäwi
¿Kunas Diosan Apnaqäwipaxa?
¿Kawkinkis Diosan Apnaqäwipaxa? (1)
¿Khitis Apnaqi? (2)
¿Jupamp chika yaqha apnaqirinakax utjiti? Ukhamächi ukaxa, ¿qhawqhanïpxisa? (3)
¿Kunjamatsa qhipa urunakan jakatasa yattanxa? (4)
¿Kunsa Diosan Apnaqäwipax jutïrin jaqinakatak lurani? (5-7)
1. Jesusax aka Uraqinkkäna ukhaxa, Diosan Apnaqäwipax jutpan sas mayisiñwa arkirinakapar yatichäna. Diosan Apnaqäwipax mä suma gobiernowa. Alaxpachan uttʼayatawa, ukat aka Uraqxaruw apnaqanini. Diosan sutip jachʼañchani mä arunxa qullanaptayaniwa. Diosan munañapwa aka Uraqin lurayani kunjamtï alaxpachan luraski ukhama (Mateo 6:9, 10).
2. Apnaqäwijanxa Jesusaw Apnaqirita uttʼayatäni sataynaw Diosaxa (Lucas 1:30-33). Jesusax aka Uraqinkkäna ukhaxa, suma chuymani, taqi kunsa chiqapar uñjiri, suma apnaqirïtap uñachtʼayäna. Alaxpachar kuttʼxäna ukhaxa janiw ukjpacha Apnaqirit uttʼayatäkänti (Hebreos 10:12, 13). 1914 maranwa Jehová Diosax Jesusar apnaqirit uttʼayäna, kunjamtï siskän ukhama. Ukat aksaruw Jesusax alaxpachana apnaqaski (Daniel 7:13, 14).
3. Jehová Diosax mä qhawqha chachanakampi warminakampwa ajllirakitayna alaxpachar sarapxañapataki. Uka jaqinakaw Jesusamp chika reyinakjama, taripirinakjama, sacerdotenakjama jaqinakaru apnaqapxani (Lucas 22:28-30; Apocalipsis 5:9, 10). Jupamp chika apnaqirinakaruxa “jiskʼa tama” sataynawa Jesusaxa. Taqpachaxa 144.000 jaqinakäpxiwa (Lucas 12:32; Apocalipsis 14:1-3).
4. Jesusax alaxpachan Apnaqirita uttʼayatäxi ukhaxa, jankʼakiw Supayaru ñanqhanakapar alaxpachat aka Uraqir jaquqani. Ukatwa 1914 marat aksaruxa jan walinakax aka Uraqin jukʼampi jilxatawayi (Apocalipsis 12:9, 12). Chʼaxwañanaka, manqʼata pistʼañanaka, usunaka, ñanqha lurañanaka..., taqi akanakasti Jesusan Apnaqatap ‘uñachtʼayistu’ ukat aka ñanqha pachax niyaw tukusxani ukwa uñachtʼayarakistu (Mateo 24:3, 7, 8, 12; Lucas 21:10, 11; 2 Timoteo 3:1-5).
5. Kunjamtï mä awatirix uwijanaka cabritonakat ajllskix ukhamwa Jesusax jaqinakar niy taripani. Diosat jan jithiqtasa jupampi apnaqayasiñ munirinakaruwa ‘uwijanakapjam’ uñjani, ukat wiñay jakañ churani. Diosan Apnaqäwipar jan iyawsirinakaxa ‘cabritonakjam’ uñjatäpxaniwa (Mateo 25:31-34, 46). Jesusaxa niyaw cabritjam jaqinakarux tukjani (2 Tesalonicenses 1:6-9). Jesusan uwijapäñ munasaxa Diosan Apnaqäwipata yatichäwinakar istʼañamawa ukat ukarjam sarnaqañamawa (Mateo 24:14).
6. Aka Uraqix walja markanakar jalanuqatawa, sapa markarakiw apnaqirini. Ukat jupanakkamaw chʼaxwapxi. Ukampisa, Diosan Apnaqäwipaw taqi uka apnaqäwinakar tukjani. Diosan Apnaqäwipakiwa aka Uraq apnaqxani (Daniel 2:44). Ukhamaxa janiw chʼaxwañasa, jiwayasiñasa nuwasiñas utjxaniti. Taqinisa mayakiw suman jakasxapxani (Miqueas 4:3, 4).
7. Jesusax waranqa mara apnaqkani ukhaxa, janiw khitis juchanïxaniti ukat aka Uraqpachawa mä huertaru tukuyatäxani. Waranqa maranaka tukuykamaxa kuntï Jesusax lurañapäkäna taqi ukanakaw luratäxani, Diosan munañaparjama. Ukatxa, Jesusax Awkiparuwa Apnaqäwxa katuyxani (1 Corintios 15:24). ¿Kuntï Diosan Apnaqäwipax lurkani uka tuqita familiaranakamaru jan ukax masinakamaru yatichtʼañax janit walïkaspa?
[13 janan fotopa]
Jesusax apnaqxani ukhaxa janiw uñisisiñas uñchʼukisiñas utjxaniti