7 Yatichäwi

Kunjamsa Diosaru mayisiña

¿Kunatsa Diosaru mayisiñasapuni? (1)

¿Khitirus mayisiñasa, ukat kunjam mayisiñasasa? (2, 3)

¿Kunanakxatsa mayisiñasa? (4)

¿Kunapachas Diosat mayisiskaksnati? (5, 6)

¿Diosax taqinirut istʼpacha? (7)

1. Diosat mayisiñaxa juparu altʼat chuymampi jakʼachasiñawa. Diosarux mayisiñasapuniwa. Ukham lurasaxa, jukʼampiw juparux munasiñäni mä munat masisarjama. Jehová Diosax wali jachʼäkchisa wali chʼamanïkchisa mayitanakasxa istʼiwa. ¿Diosat mayisipunirïtati? (Salmo 65:2; 1 Tesalonicenses 5:17.)

2. Diosat mayisisarakiwa Jupar yupaychtanxa. Ukatwa Jehová Diosaruki mayisiñasaxa. Jesusaxa aka Uraqinkkäna ukhaxa, Awkiparukipuniw mayisirïna. Jiwasax ukham lurañasarakiwa (Mateo 4:10; 6:9). Ukatxa Jesusan sutipxarupuniw mayisiñasaxa. Ukhamatwa Jesusar respetatassa luqtasïwiparu iyawsatassa uñachtʼaytanxa (Juan 14:6; 1 Juan 2:1, 2).

3. Diosarux chuymatpacha mayisiñasawa, janiw yatsut arunakaki kutin kutin sañasäkiti, janirakiw rezañ librotsa liyiñasäkiti (Mateo 6:7, 8). Kawkhansa, kunjamsa, kuna horasasa respetompix Diosat mayisiskaksnawa. Chuymasan mayisktan uksa Diosax istʼistuwa (1 Samuel 1:12, 13). Sapaki Diosaru jakʼachastan ukhaxa walïspawa sumäwjana, chʼusäwjana Diosaru mayisiña (Marcos 1:35).

4. ¿Kunanakxatsa Diosar mayisisma? Jupampi suma sarnaqañ tuqitwa mayisisma (Filipenses 4:6, 7). Diosan munañapa lurasiñapataki ukat Diosan sutipa jachʼañchañatakiw mayisipxäta sasaw Jesusax yatichäna. Manqʼañ tuqitsa, juchanaka pampachayasiñatakisa ukat yantʼanakaru atipañatakisa mayisiraksnawa (Mateo 6:9-13). Janirakiw jiwasanakatakiki mayisiñasäkiti. Kunatï Diosataki walïki ukanakakwa mayisiñasaxa (1 Juan 5:14).

5. Diosar yuspärañ munasasa jan ukax yupaychañ munasasa Jupar jakʼachasiskakismawa (1 Crónicas 29:10-13). Jan walin uñjasïta ukhasa, iyawsäwimasa yantʼata uñjasini ukhasa Diosat mayisiñamapuniwa (Salmo 55:22; 120:1). Janïra manqʼkasaxa wakisiwa Diosar yuspäraña (Mateo 14:19). Jehová Diosax mayisipxapunita sistuwa (Efesios 6:18).

6. Kuna jachʼa juchar purtʼasasa jankʼakiwa, khuyaptʼayita ukat pampachita sasa Diosaru mayisiñasa. Juchasa jan imxatasa arsusiñäni ukat jan uk mayampsa lurxañäni ukhaxa Diosax ‘juch pampachistaniwa’ (Salmo 86:5; Proverbios 28:13).

7. Jehová Diosax aski jaqinakan mayisitanakapakwa istʼi. Diosampi istʼayasiñatakixa kamachinakaparjam sarnaqañamawa (Proverbios 15:29; 28:9). Altʼat chuymampiw jakʼachasiñama (Lucas 18:9-14). Kuntï mayktaxa ukarjamawa sarnaqañamaraki. Ukhamatwa taqi chuyma mayisitamsa iyawsäwinïtamsa uñachtʼayätaxa. Ukham mayisïta ukhakiw Jehová Diosax istʼätamxa (Hebreos 11:6).