9 Yatichäwi
Diosan yupaychirinakapaxa janiw qʼañüpxañapäkiti
¿Kunatsa taqi kunan qʼumäpxañasaxa? (1)
¿Kun sañs muni yatichäwinak tuqit qʼumäñaxa? (2) ¿Kun sañs muni sarnaqäwin qʼumäñaxa? (3) ¿Kun sañs muni amuyun qʼumäñaxa? (4) ¿Kun sañs muni janchi tuqit qʼumäñaxa? (5)
¿Kuna jan wali arunakasa jan parlañasäkaspa? (6)
1. Jehová Diosax qʼumawa, qullänarakiwa. Yupaychirinakapaxa yatichäwinak tuqitsa, amuyunsa, jañchinsa, sarnaqäwinsa qʼumäpxañapawa uk Diosax muni (1 Pedro 1:16). Dios nayraqatan qʼumäñatakix wal chʼamachasiñasawa. Wali qʼañu ñanqha pachanwa jakastanxa. Ukatxa jan walinak munir chuymanïtanwa, ukampis janiw atipayasiñasäkiti.
2. Yatichäwinak tuqita qʼumäña: Jehová Diosaru luqtaña munasaxa, kʼari yupaychäwinakan yatichäwinakaparusa luräwinakaparusa jaytxañasawa. Kʼari yupaychäwit mistxañasawa, janipuniw mitisiñasäkiti (2 Corintios 6:14-18; Apocalipsis 18:4). Kunatï Diosat chiqäki uk yatiqxasaxa, kʼari yatichirinakatxa amuyasiñasawa (2 Juan 10, 11).
3. Sarnaqäwin qʼumäña: Yupaychirinakapax taqi chiqana cristianonakjama sarnaqapxaspa ukwa Jehová Diosax muni (1 Pedro 2:12). Jupax taqi kun uñji, kuntï jamasat lurasktan uks uñjiwa (Hebreos 4:13). Qʼañunak lurañatsa, akapachan jan wali lurañanakapatsa jithiqtañasawa (1 Corintios 6:9-11).
4. Amuyun qʼumäña: Sumanaka lupʼiñäni ukhaxa ukarjamaw sum sarnaqarakiñäni (Filipenses 4:8). Ukat jan walinakaki lupʼiskañäni ukhaxa jan walinakwa lurarakiñänixa (Mateo 15:18-20). Amuyusaru qʼañuchiri jan wali luräwinak uñchʼukiñatxa jithiqtañasawa. Diosan Arupat yatiqasawa sumanak lupʼiñänixa.
5. Janchin qʼumäña: Cristianonakax Diosan yupaychiripätanwa ukatwa jañchisasa isisasa qʼumäñapaxa. Bañor sarasasa, manqʼanak apnaqañatakisa ampar jariqasiñasawa. Utasan bañox jan utjchi ukhaxa, laqʼar allintañasawa (Deuteronomio 23:12, 13). Qʼum sarnaqasaxa kʼumarakiw sarnaqastanxa. Cristianonakan utanakapax anqäxatsa manqhäxatsa suma apthaptʼata qʼumäñapawa, janiw qʼañüñapäkiti. Comunidadansa qʼuma sarnaqirit uñtʼatäpxañapawa.
6. Suma arunak parlaña: Diosan yupaychirinakapax chiq parlapxañapawa. Kʼarisirinakax janiw Diosan Apnaqäwipar mantapkaniti (Efesios 4:25; Apocalipsis 21:8). Cristianonakax janiw qʼañu arunak parlapkiti. Janiw larusiñataki jan wali arunaka parlapkiti, janirakiw qʼañu lurañanakatsa parlapkiti. Irnaqäwinsa yatiqañ utansa markapansa sumanak parlirita uñtʼatäpxiwa (Efesios 4:29, 31; 5:3).
[18, 19 jananakan fotonakapa]
Diosan yupaychirinakapaxa taqi kunan qʼumäpxañapawa