Kuns yatichapxi

ALAXPACHANSA aka Uraqinsa taqi kunas Jehová Diosan luratawa, ukat Jupaw taqi chʼamani sasaw Jehová Diosan Qhanañchirinakapax sapxi. Taqi kunas wali suma lurtʼatawa, ukhamasti ukanak luririx wali yatiñani ukat wali chʼamani ukhamäñapawa. Ukat kunjamatix luratanakasax kunjam jaqïktantï uk uñachtʼayixa, ukhamarakiw Diosan luratanakapax kunjam Diosäkitï uk uñachtʼayistu. Ukatxa “Diosan jan uñjkay yänakapax jupan luratanakap tuqiw uñachtʼayasi. Qhanpachawa uñachtʼayasi kunapachatix aka uraqix luratäkäns ukürutpacha jupax Diosätapa, chʼamapax jan tukuskirirakïtapa” sasaw Bibliax qhanañcharaki. Alaxpachax janis arunïkchixa ‘Diosan jachʼakankañapwa’ yatiyistu (Romanos 1:20; Salmo 19:1-4).

Amuytʼañäni: jaqix janiw ñiqʼi phuksa televisionsa jan ukax computadorsa jan amtanix lurkiti, jan ukasti mä amtanipuniw luri. Ukat sipansa, animalanakasa, kunayman quqanakasa wali muspharkañ lurtʼatawa. Ukat cuerposax walja millón celulanakampix kunjamas unxti, lixwisax kunjamsa amuyunak apnaqi ukanaksa janiw sum yatktanti. Ukhamasti niyakixay jaqinakax kuna jiskʼanaksa mä amtampi luraschixa, ¿janit Jehová Diosax jukʼamp wali aski amtampi taqi kuns lurkpacha? “Taqi kunsa [Jehová] Tatituw luri mä amtampi” sasaw Proverbios 16:4 jiskʼa tʼaqax qhanañchi.

Jehová Diosax mä suma amtampiw aka Uraqxa luräna, ukatwa nayrïri chacha warmirux akham säna: “Jichhax wali mirantapxam, aka uraqirusti phuqhantapxarakim, apnaqapxarakim taqi challwanakarusa, jamachʼinakarusa apnaqapxam, ukhamaraki uraqinjam qatatnaqtir animalanakarusa” sasa (Génesis 1:28). Diosar jan istʼasax jucharar wawanakanikïxapxänwa, ukhamasti janiw khiti aski jaqis aka Uraqi uñjañatakix utjxänti. Ukampis Jehová Diosax janiw amtapxa armaskiti. Ukatwa walja maranak qhipatxa akham qillqayatayna: “Khititix aka uraqi lurki saytʼaykaraki” ukaxa janiw inamay lurkiti, “jan ukasti, [jaqinïñapatakiw luri]” sasa. Ukatxa “uraqix janipuniw mayjtʼkiti”, mä arunxa, janipuniw tʼunjatäkaniti sasaw qillqayarakitayna (Isaías 45:18; Eclesiastés 1:4). Diosan amtapax aka Uraqitakix phuqasipuniniwa, “amtanakaxax phuqhasipuniniwa, taqi kuntix amtkta ukanakxa lurapuniwa” sasaw Arupanxa qhanañchistu (Isaías 46:10).

Ukhamasti, aka Uraqix janiw tukuskaniti, jan ukasti mä paraisor tukuyatäniwa, ukanwa jaqinakas ukat jaktanirinakas Diosan amtanakaparjam sarnaqasax jakasipxani sasaw Jehová Diosan Qhanañchirinakapax sapxi. Ukampis jichhax taqiniw Adanan Evan wawanakapjamax juchanïtanxa (Romanos 5:12). Kunjamtï Bibliax siskixa: “Juchan waxtʼasiñapasti jiwañawa”, ukat “khitinakatix jakasipki ukanakaxa yatisipxiwa jiwxañanakapa, ukampis jiwatanakax janiw kunsa yatipkiti”. Ukat akham sarakiwa: “Kawkïritix jucha lurkani ukasti jiwarakiniwa” sasa (Romanos 6:23; Eclesiastés 9:5; Ezequiel 18:4, 20). Ukhamasti, ¿kunjamatsa jiwatanakax uka aski churäwinak katuqañatakix kuttanipxaspa? Jesusan jakäwip luqtasitap laykuw jiwatanakax mayampi jaktanipxani, Jesusax akham sänwa: “Nayätwa jaktañasa jakañasa. Khititix nayaru iyawsarakitu ukaxa jiwatäkanisa, jakaniwa”. “Taqi jiwatanakasti [aruj] istʼapxaniwa. Ukatsti uka jiwatanakax jaktapxaniwa” sasa (Juan 11:25; 5:28, 29; Mateo 20:28).

¿Kunjamatsa uka arunakax phuqasini? Jesusax Diosan Apnaqäwipatwa suma yatiyäwinak aka Uraqin yatiyäna, ukanwa kunjamsa phuqasini uk uñachtʼayäna (Mateo 4:17-23). Jichhürunakanxa niya ukhamarakiw Jehová Diosan Qhanañchirinakapax wali suma yatiyäwinak yatiyasipki.

[13 janan tablapa]

JEHOVÁ DIOSAN QHANAÑCHIRINAKAPAN YATICHÄWINAKAPA

Yatichäwi Bibliax kamsisa

Jaysasiri jaqinak laykuw Jesusax 1 Ped. 2:24, MT; jakäwip luqtasiwayi Mat. 20:28; 1 Tim. 2:5, 6;

Mä thakikiw wiñay jakañarux api Mat. 7:13, 14; Efe. 4:4, 5

Jiwatanakax wasitat jaktanipxani 1 Cor. 15:20-22; Juan 5:28, 29; 11:25, 26

[12 janan fotopa]

URAQI: Jehová Diosan lurata, jaqinakan wiñayataki suma uñjata