¿Kunatsa Jehová Diosax lurpachïstu?

¿JUMAX Jehová Diosar uñt’asax kuns jikxatasma? Yaqha askinakatsa, kawnïr jiskt’äwiti jaqinakatakix jan jaysäwinïki uka jiskt’an qhanañchäwipwa jikxatäta, akham sasaw jiskt’asipxi: “¿Kunatakis aka Uraqir jutpachätanxa?” sasa. Inas jumax ukham walja kuti jiskt’asirakirïsta. Mä wali yatiñan apnaqirixa urunakapan apnaqir ‘reyinakatxa qamirkankañana, ukhamarak yatiñkankañansa atipänwa’ jupaxa kunatakis jaktan uka tuqit wal lup’itayna (2 Crónicas 9:22; Eclesiastés 2:1-13). Aka Salomón sat apnaqirixa, apnaqañatakix wali ch’amanïnwa, walja yänakani ukat janirakiw khitis jupjam wali yatiñanix utjkänti. Ukampis ¿uka tuqit yatxatasax kuna amtarus puriwayäna? Akham sänwa: “Parlañax tukuyxiwa. Taqiwa parlatäxi. Diosar [axsartam, NM] ukatsti mandamiento arunakapa phuqham, taqi ukanakax jaqitakïtap layku” sasa (Eclesiastés 12:13). Niyakixay Salomonan sarnaqäwipax taqi jaqinakat sipansa wali jilankchïnxa, ukhamax uka sarnaqäwipatxa amuyt’añasäspawa (Eclesiastés 2:12).

² Ukat Salomonax Diosar axsartam sas parlkasaxa, janiw mä jan uñt’at ch’amaru wal axsarañat parlkänti, jan ukasti, khitirutï munktan ukaru jan wali luratanakasampi jan chuym ust’ayañxat parlaskäna. Kunapachatï maynir wal munasktan ukhaxa, janiw kunäkipans chuymap ust’ayañ munktanti ukat chuymap ust’ayirjamäki uksa janirakiw lurksnati. Jumax Jehová Diosar munasïta ukhaxa ukhamarakiw jikxatasïta.

³ Ukat kunatï Diosatakix walïki ukat jan walïki ukxa Biblianwa yatiqasma, ukat kuna amtampis aka Uraqxa lurpachäna uksa yatiqarakismawa. Bibliax Jehová Diosaw ‘aka Uraq luri sayt’ayaraki’ sas parlkasaxa, jupatxa akham saskakiwa: ‘Khititix uchki jan ch’usäñapataki, jan ukasti jaqinïñapatakiw luri’ sasa (Isaías 45:18). Ukat Diosax aka Uraqxa jaqinakan utjasipxañapatakiw wakicht’atayna, ukat jupanakarakiw taqi ukan utjiririnakarux uñjapxañapäna (Génesis 1:28). Ukhamaxa, ¿aka Uraq uñjapxañapatakikiti Jehová Diosax jaqinakar lurpachäna?

⁴ Janiwa; yaqha juk’amp suma amtampiw luräna. Nayrïr Adán sat chachaxa, Jehová Diosampix wali sum apasïna. Ukat Luririmpix purapat parlt’asipxäna; ukhamax janiw Diosan arsutanakapak ist’känti, jan ukasti jupan amuyunakapsa yatiyarakïnwa (Génesis 1:28-30; 3:8-13, 16-19; Hechos 17:26-28). Ukhamax Adanasa ukat Eva warmipasa, Jehová Diosatxa wali sum yatiqapxasapäna ukatxa wali sum Jupampix apasipxarakispäna. Ukat Luririr uñt’asasa ukat Jupat yatiqasis sarnaqasasa, wali kusisitaw jakasipxañapäna, kunattix Jupaw ‘wali kusisir Diosaxa’ (1 Timoteo 1:11, NM). Ukhamax niyakixaya Diosaxa ‘taqi kunsa jilarkir churiri ukat kusisit jakayirïchixa’, Jehová Diosax Edén huerta sat chiqaruw nayrïr chacharux mä paraison wiñayataki jakasipxañapatakiw usküna (1 Timoteo 6:17; Génesis 2:8, 9, 16, 17).

⁵ ¿Wiñayataki? Inas jumatakix wiñayatakiw jakañäni siski uka arunak yatiñax aliq parlakïkaspas ukhamjamächi, ukampis ¿ukax chiqapunïpachati? Ciencia tuqit yatxatirinakaxa, célula satäkis ukax kunatsa mirq’isi ukxa yatxapxtwa sasaw sapxi. Ukat kunatï telómeros satäpki ukanakaxa, cromosomas satapkis ukanakan sapa puntanakapankiwa, kunapachatï celulax jaljtki ukhaxa ukanakax jisk’aruw juk’at juk’at tukuwayxi. Ukat 50 jan ukax 100 kut jaljtasinxa, telómeros satäpkis ukanakaxa mirq’isxapxiwa ukat niya taqpach celulanakas janirakiw jaljtxapxiti. Ukampis jichhak yatxatasinxa akham sasaw yatxatirinakax sapxi, telomerasa sat sutimp uñt’atäki uka enziman yanapt’apampixa, jaqin celulanakapax wiñayatakiw jaljtaskakispa sasa. Uka yatxatäwinakaxa janiw Jehová Diosax enzima satäkis ukampiw wiñay jakañ churani sañ munkiti, jan ukasti, wiñay jakañax chiqapun utjatapwa amuyt’ayistu.

⁶ Chiqpachansa, kunjamtï Bibliax nayrïr chach warmix wiñayatak wali kusisit jakasipxañapatak luratäpxänwa sas siskixa, ukax chiqäskapuniwa. Ukat taqpach jaqinakaxa Jehová Diosampix wiñayatakiw wali sum apasipxaspa. Jupanakax Diosan amtanakap yatisasa ukat ukarjam sarnaqasasa, Alaxpachankir Awkipampix wali sumwa apasipxasapäna ukat jakäwinakapas janiw inamayakïkasapänti. Adanamp Evampixa aka Uraqxa wali kusisita jan juchani wawanakampiw phuqantapxañapäna. Ukat wiñayatakiw wali aski luräwinakapatxa wali kusisit jakapxasapäna, ukhamatwa jakawinakapanxa chiqpach kusisiñ jikxatapxasapäna (Génesis 1:28).