2 jalja

Jehová, chiqpach Diosar jachʼañchapxañäni

1. ¿Khitis chiqpach Diosaxa?

WALJAW dios satanakaxa utji, “ukampis jiwasatakix mä [...] Dios Awkikiw utji” siw Bibliaxa (1 Corintios 8:5, 6). Jehová Diosaw uka ‘mä Dios Awkixa’, taqi kunasa jupan luratawa (Deuteronomio 6:4; Apocalipsis 4:11). Jesusax “nayan Diosaxawa jumanakan Diosamarakiwa” sataynawa (Juan 20:17), ukhamarakiw Moisesax satayna, Jehová Diosaw ‘chiqpach Diosaxa, jupat sipansa janiw yaqhax utjkiti’ sasa (Deuteronomio 4:35). Yupaychañ santonakat sipansa, diosar tukut jaqinakat sipansa, ‘akapach dios’ Supay Satanasat sipansa, Jehová Diosax wali chʼamaniwa (2 Corintios 4:3, 4). Uka diosanakat sipansa, Jehová Diosakiw ‘chiqpach Diosax’ sataynaw Jesusaxa (Juan 17:3).

2. ¿Diosat yatiqasax kun lurañasasa?

² Jehová Diosax kuntï lurkäna ukat kunsa jiwas laykux lurani ukanak yatisasa ukat kunjam Diosäkitï uk yatisasa, yuspärasir jaqinakax walpun Jupar jakʼachasiñ munapxi. Ukat Jupar munasisax taqi chuymaw jachʼañchapxi. ¿Kunjamsa? Jaqi masir yatiyasaw jachʼañchapxi. ‘Lakampiw arsuñaxa qhispiyatäñatakixa’ siw Romanos 10:10 qillqataxa. Lurañansa parlañansa Jupat yatiqasisaw jachʼañchapxaraki. Kunattix Efesios 5:1 qillqatax akham siwa: “Diosan munat wawanakapäpxtawa, jupax kunjämäkitix ukhamäpxarakimaya” sasa. Uka arunak phuqañatakix Jehová Diosar sum uñtʼañasawa.

3. ¿Jehová Diosax kunjam Diosasa?

³ Chiqpachansa Jehová Diosax kunjam Diosas ukaxa Biblian walja chiqanakan qillqatawa. Yatiñani, taqi kunsa chiqapar uñjiri, chʼamani ukat munasir Diosaw siwa. “Diosax wali [...] yatiñanirakiwa” (Job 12:13). “Jupasti chiqapawa.” (Deuteronomio 32:4.) “Wali jachʼaw chʼamapaxa” (Isaías 40:26). “Diosax munasiñawa.” (1 Juan 4:8.) ¿Ukanakat kawkïris jilankixa, ukat Diosax kunjam uñtʼatasa?

“Diosax munasiñawa”

4. ¿Kunatsa Jehová Diosax alaxpachsa, Uraqsa, angelanaksa, jaqinaksa luratayna?

⁴ Kunatsa Jehová Diosax alaxpachsa, Uraqsa, angelanaksa, jaqinaksa lurpachäna uk amuytʼañäni. ¿Yatiñanïtap laykuti jan ukax chamanïtap laykuch lurpachäna? Janiwa. Ukanak lurañatakix yatiñas chʼamas munaschïnxa, janiw chʼamanïtap laykus ni yatiñanïtap laykus ukanak lurkänti. Janirakiw chiqap Diosätap laykus jakañxa yaqhanakar churkänti. Jan ukasti, wali munasiñapatwa angelanakarus jaqinakarus kusisita jakasipxañapatakix jupjam amuytʼasiri luratayna, ukatxa istʼasir jaqinakax Paraison wiñayatak jakasipxaspa ukwa amtatayna (Génesis 1:28; 2:15). Munasiñapatwa Adanan juchapatsa taqinir qhispiyarakistu.

5. ¿Jehová Diosax kunjam Diosaw sis Bibliaxa, ukat kunatsa?

⁵ Ukhamasti munasiñaw jilankixa. Luririsax wali munasiriwa. Chiqapar uñjañasa yatiñasa chʼamasa wakisirïkchixa, ukampis janiw Bibliax Jehová Diosax chʼamaw siskis ni yatiñaw siskisa; jan ukasti munasiñawa siwa. Ukhamasti, Jehová Diosax munasiñ pachpawa. Janiw chuyma may munasirikïkiti, jan ukasti kunatix chiqapäki ukhamaraki askïki ukarjam munasiriwa. Diosan munasiñapat sipanxa janiw jukʼampi munasiñax utjkaspati, ukatxa jan kuns suyas munasiriwa, luratanakapansa munasiñapax wali qhanarakiwa.

6. Diosax jiwasat sipansa wali jachʼäkchisa, ¿kunatsa jupat yatiqassna?

⁶ Munasirïtapatwa Diosat yatiqasiraksnaxa. Ukatxa jupax wali jachʼawa, jucharar jaqinakjamax janipuniw jupjamäksnati sakiraksnawa. Ukampis Jehová Diosax chuymas yatiwa, janiw jan juchanïñasxa suykapuniti. Juchararätas laykux pantjasipuntanwa uksa yatirakiwa, uka tuqitwa munasiñap uñachtʼayistu (Salmo 51:5). Ukatwa Salmo 130:3, 4 qillqatax akham sixa: “Dios Tatay, jumatix taqpach juchanak amxäsiskakismaxa, ¿khitirak nayraqataman saytʼaspasti? Ukampis jumaw juchanakat pampachapxista” sasa. Ukhamawa, Jehová Diosax ‘khuyapayasiriwa, janiw jankʼaki colerasirïkiti, jan ukasti jachʼa munasiriwa’ (Éxodo 34:6). Jehová Dios “Tatay, jumax munasiñanïtawa, juch pampachirirakïtawa” (Salmo 86:5). ¡Kunja chuyma qhanartaykirisa! ¡Wali sumaw ukham munasiri khuyaptʼayasir Diosar yupaychañaxa!

7. ¿Jehová Diosan munasiñapax kunjams luratanakapan uñjasi?

⁷ Luratanakapanwa Jehová Diosan munasiñapxa uñjaraktanxa. Kunaymaninakwa kusisiñasatakix churistu, ukanakat amuytʼañäni, jachʼa qullunaka, kunayman alinaka ukhamarak qutanak churistuxa. Ukatxa chʼamañchkir suma achunakwa churarakistu, ukat walja kasta suma panqaranakwa ucharapistu, ukatxa kunayman animalanakaw utjaraki. Janis wakiskchïnxa, kusisiñasatakiw taqi ukanak luratayna. Chiqasa, juchararjamasa aka ñanqha pachan jakasasa, janiw luratanakapatxa sumpach kusisiñjamäkiti (Romanos 8:22). Ukampisa, kunsa Jehová Diosax Paraison churistani uka tuqit amuytʼañäni. Salmo qillqirixa akham siwa: “Jumaw amparam luqatattaxa, taqi jakirinakarusti askinak jilarkir chur[ä]taxa” sasa (Salmo 145:16).

8. ¿Kunjamsa Jehová Diosax jaqinakar wal munasitapxa uñachtʼayi?

⁸ ¿Kunjamsa Jehová Diosax jaqinakar jachʼa munasiñapxa uñachtʼayi? Bibliaxa akham siwa: “Diosax akapachar wal munatap laykuw mä sapa Yuqapar khitani, taqi khitinakatix jupar iyawsapki ukanakax jan chhaqañapataki, jan ukasti wiñay jakañanïñapataki” sasa (Juan 3:16). ¿Suma jaqinak uñjasat Diosax uk luräna? Romanos 5:8 qillqatax akham siwa: “Diosax munasiñapwa uñachtʼayistu, kunapachatix jiwasanakax juchanïskäyätan ukapachaw Cristox jiwasanak layku jiwawayi” sasa. Ukhamawa, Diosax jan juchani Yuqapwa aka Uraqir khitanïna jakäwip churañapataki, jiwasaru juchampita jiwañampita qhispiyañataki (Mateo 20:28). Ukhamatwa mä punkjam jistʼarasiwayi, kawkïrinakatï Diosar munasipki ukanakax wiñay jakaña katuqapxañapataki. Ukax wali kusiskañawa, wali munasiñani Awkisaxa, munañap phuqañ munir taqi kasta jaqinakaruw munasi, kunjamtï Bibliax siskixa, “Diosatakix taqi casta jaqis mayak[iwa]. Jupasti kuna cast jaqirus katuqakiwa, khitinakatix jupar axsarki, ukhamarak aski lurapki taqi ukanakarusa” (Hechos 10:34, 35).

9. Jehová Diosax jiwasar qhispiyañatakiw Yuqap khitanitayna, ¿uk yatisax kun lurañasasa?

⁹ Jehová Diosax Yuqapwa jiwasar qhispiyañatakix khitanitayna, ukatwa wiñay jakañ katuqsna, ¿uk yatisax kunanak lurañasasa? Jehová, chiqpach Diosar jukʼampi munasiñasawa, ukatxa jupan khitanit Jesusar istʼañ munañasarakiwa. “Cristox taqinitakiw jiwi, khitinakatix jakasipki ukanakax jan jupanakpachataki jakxapxañapataki, jan ukasti Cristotaki jakxapxañapataki” (2 Corintios 5:15). Jehová Diosatwa Jesusax munasiñsa khuyapayasiñsa yatiqäna, ukatwa jupar arkañax wali askipuni. Aka arunakampiwa ukhamätapxa uñachtʼayäna: “Nayar jutapxam taqi qarjatanaka jatjatanaka, nayaw samarayapxäma. Nayan yugoxa apapxam, ukatsti nayat yatiqasipxarakita. Nayasti llampʼu chuymani, altʼat chuymanirakïtwa, ukatwa almaman samarañapxa jikxatapxäta. Nayan yugoxasti jasa apañakiwa, khumuxasti sinti phisnakirakiwa” sasaw altʼat chuymaninakar satayna (Mateo 11:28-30).

Jaqi masisar munasiñäni

10. ¿Kunjamatsa jilat kullakanakasar munatasxa uñachtʼaysna?

¹⁰ Jehová Diosamp Jesucristompixa wal munasipxistu, ukham jilat kullakanakasar munasitasxa, ¿kunjamsa uñachtʼaysna? Kunjamanakatsa munasiñxa uñachtʼaysna uk amuytʼañäni: “Khitintix munasiñax utjki ukax llampʼu chuymaniwa, suma jaqiwa, janiw envidiasirïkiti, janiw jachʼa jachʼa tukurïkiti. Janiw kuna jan walsa lurkiti, janirakiw kunsa jupatakiki munirïkiti, janiw coleraskiti, janirakiw colerasitapsa imxäsiskiti. Janiw kunatix jan walïki ukatx kusisiñ yatkiti, jan ukasti kunatix chiqapäki ukat kusisiñ yati. Taqi kun tʼaqhisi, taqi kun iyawsi, taqi kun llampʼu chuymampi suytʼaraki. Munasiñax janipuniw tukuskiti” (1 Corintios 13:4-8; 1 Juan 3:14-18; 4:7-12).

11. ¿Khitinakampirus munasiñasa, ukat kunjamsa?

¹¹ ¿Khitinakampirus munasiñasaxa, ukat kunjamsa? Jesusaxa ak lurapxam sänwa: “Ukhamasti, sarapxam, taqi jaqinakaru yatichapxarakim, Awkina, Yuqana, qullan ajayumpina sutiparu bautizasa. Jupanakaru yatichasa taqi kunanaktï iwxapksma ukanaka imapxañapataki” sasa (Mateo 28:19, 20, MT ). Ukhamasti, Diosax niyaw mä jutïrpach apanini sasaw suma yatiyäwinakxa yaqhanakar yatiyañasa. Janiw jiwasjam iyawsirinakaruki munasiñasäkiti, ukxa Jesusax akham sasaw qhanañchäna: “Jumanakatix munapxsta khitinakatix jumar munapktam ukanakaruki ukaxa, ¿kuna askirak katuqapxätasti? Impuesto cobririnakasa uka kipkrakwa lurasipki. Ukhamaraki jilanakamarukitix aruntasipksta ukaxa, ¿kuna suma askirak lurapxta? Jan Diosar uñtʼiris ukxa lurarakiwa” sasa (Mateo 5:46, 47; 24:14; Gálatas 6:10).

‘Jehová Diosan sutipan sarnaqapxañäni’

12. ¿Kunatsa Dios sapakix Jehová suti apañapaxa?

¹² Jehová sutip uñtʼasa, sutip aytasisa ukat yaqhanakar yatiyasawa chiqpach Diosarux jachʼañcharaktanxa. Salmo qillqirixa akwa taqi chuyma munäna: “Jaqinakan yatipxañapataki, jumax Jehová sutinïtama, juma sapakiw uraqpachxaru taqi Munañanïtaxa” sasaw qillqatayna (Salmo 83:18, NM). Jehová sutix “Kuntï Jupax Munki ukxa Phuqasiyapuniwa” sañ muni. Jupax Amtanakani Jachʼa Diosawa, kuntï amtki ukxa phuqapuniwa. Chiqpach Dios sapakiw uka sutxa apañapaxa, kuna laykutix, jaqinakax janiw yatipkiti jupanakan amtanakapax phuqasinit janicha ukxa (Santiago 4:13, 14). Jehová Diosakiw “kuntix nayax siskta ukwa phuqharakï[xa]” saspaxa (Isaías 55:11). Diosan sutip Biblian jikxatasas ukat uka sutixa kun sañs muni uk yatxatasas waljaniw chuym chʼallxtayasipxi (Éxodo 6:3). Ukampis janitï ‘Jehová Diosan sutipan wiñayataki sarnaqapkanixa’ janiw kuna asksa yatitanakapatxa katuqapkaniti (Miqueas 4:5, NM).

13. ¿Jehová Diosan sutip uñtʼañas ukat uka sutipan sarnaqañas kamsañs muni?

¹³ Salmo 9:10 qillqataxa Diosan sutipatxa akham siwa: “Tatay, sutim yatirinakax jumaruw iyawsapxtam” sasa. Ukhamaxa, janiw Diosax Jehová sutinïtap yatiñakïkiti, janiw uk yatisakix atinisksnati. Jan ukasti, sutip uñtʼañax akanak sañ muni: kunjam Diosäkitï uk yatiña, apnaqäwipar respetaña, kamachinakapar istʼaña, ukat jan payachasis jupar alkataña (Proverbios 3:5, 6). Ukatxa Jehová Diosan sutipan sarnaqañaxa, jupar jakäwis katuyasiña ukat yupaychiripjam sarnaqaña sañ munaraki, ukhamax munañaparjam sarnaqañasawa (Lucas 10:27). ¿Jumax uk lurasktati?

14. Jehová Diosar wiñayatak luqtañ munasaxa, ¿Diosar luqtañasapuniw sañat sipansa kunas munasi?

¹⁴ Jehová Diosar wiñay yupaychañ munasaxa janiw luqtañasapuniw sañasakïkiti. Apóstol Pablox Timoteorux akham sataynawa: “Sapürus Dios chuymaki jakam” sasa, Timoteox walja maranakaw Jehová Diosar luqtxäna (1 Timoteo 4:7). Taqi chuym munatas laykuw mä jaqirux munastanxa. Ukhamasti, Diosar munasisaxa, mä arunxa Dios chuymäsaxa taqi chuymaw Jehová Diosar yupaychtanxa. Kunjam Diosäkitï ukatxa wal jupar munastanxa, kamachinakaparus ukhamaraki. Taqinis uka Diosan sutip wali jachʼaru aptapxaspa ukwa Dios chuymäsax muntanxa. Chiqpach Jehová Diosan sutipan wiñay sarnaqañatakix sapüruw Dios chuyma jakañasaxa (Salmo 37:4; 2 Pedro 3:11).

15. ¿Kunjamatsa Diosatakix taqi chuymäsnaxa?

¹⁵ Jehová Diosamp iyawsatäñatakix juparukipuniw yupaychañasaxa, “janiw munkti yaqhanakampïpxañama” siw Diosax (Éxodo 20:5). Diosar munaskaraksna ukat Supayan apnaqata ñanqha pachar munaskaraksna ukhaxa janiw walïkaspati (Santiago 4:4; 1 Juan 2:15-17). Sapa maynis kunjam jaqïñs muntan ukxa Jehová Diosax sum yati (Jeremías 17:10). Kunatix chiqäki uk munatasxa Jupax uñjaskistuwa, ukatxa sapüruw yantʼanakar saykatañ yanapistani. Akapach jan wali luräwinakar atipañasatakis qullan ajayup churistani (2 Corintios 4:7). Paraíso Uraqin wiñay jakasiñataki suytʼañsa yanaparakistaniwa. ¡Ukaxa wali askipuniwa! Uka suytʼäwitxa chiqpach Jehová Diosar wal yuspärañasa, ukatxa taqi chuymaw luqtañasaraki.

16. ¿Uka millón millón jaqinakamp chikax kun lurañatak chʼamachasiñamasa?

¹⁶ Salmonak qillqirix akham sänwa: “Tatitun jachʼa kankañap taqpachan jachʼañchapxañäni, sutip jachʼar aptapxañäni” sasa, ukarux millón millonaw iyawsapxi (Salmo 34:3). Taqi markanwa Diosar mayachtʼat yupaychasipki, uka taypinkañamatakiw Jehová Diosax jawstamxa.

Amtañataki

• ¿Jehová Diosax kunjam Diosasa? ¿Ukanak sum yatiñax kunjamsa yanaptʼistu?

• ¿Kunjamsa jaqi masisar yanaptʼsna Diosat kunatï chiqäki uk yatipxañapatakixa?

• ¿Jehová Diosan sutip yatiñas ukat sutipan sarnaqañas kun sañs muni?

[14 janan fotonakapa]

Jehová Diosax munasiñapatwa, ‘amparap luqatatanixa, taqi jakirinakarusti askinakxa jilarkir churani’