10 jalja

Diosan Apnaqäwipax “janipuniw tukjatäkaniti”

1. ¿Kunanakatï akapachan luraski ukanakax kunsa uñachtʼayi jaqin sarnaqäwipatxa?

JAQINAKAX jupanakaki apnaqasiñ munasasa, Jehová Diosampi jan apnaqayasiñ munasasa, janiw kusisit jakapkiti, ukaxa akapachan jan wali luräwinakapan sapür uñjasi. Jaqin uttʼayat apnaqäwinakax janiw maynis taqiniru kunatï munaski ukxa churkiti. Jaqix ciencia tuqit wali yatxatatäkchisa, janiw usunakarus ni jiwañarus atipkiti, janiw mä jaqirus wiñayatak qullapkiti. Jaqin apnaqäwipax janiw chʼaxwañsa, nuwasiñsa, lunthatasiñsa, pisinkañsa, jan wali luräwinaksa tukjkiti, ukatxa walja markanakanwa qhuru apnaqirinakan tʼaqhisiyat uñjasipxi (Eclesiastés 8:9). Jaqix maquinanak lurasaw uraqirus umarus samanarus qʼañuchi, ukatxa jan amuytʼasirinakasa, jupatakiki taqi kun munirinakasa ukhamarakiw qʼañuchapxi. Marka apnaqirinakax janiw qullq sum apnaqapkiti, ukatxa kunatï jakañatak munaski ukanakasa janiw taqinitaki utjkiti. Waranq waranqa maranak jaqin apnaqasitapax ak uñachtʼayi: “Jaqix janiw alaskiti pachpa jakañapxa, janirakiw tukuyäwipsa munañapar apnaqkaspati” (Jeremías 10:23).

2. ¿Kunakis jaqinakan jan waltʼañanakap askichaspa?

² ¿Kunakis uka jan waltʼäwinak askichaspa? Diosan Apnaqäwipakiw askichaspa, ukatwa Jesusax arkirinakaparux akham mayisiñ yatichäna: “Apnaqäwimax jutpan. Munañamax luraspan, alaxpachansa ukhamaraki aka Uraqinsa” sasa (Mateo 6:9, 10, NM). 2 Pedro 3:13 qillqatanxa uka alaxpach apnaqäwix ‘machaq alaxpacha’ satawa, ukawa “machaq uraqi” apnaqani, mä arunxa ukaw aski jaqinakar apnaqani. Diosan alaxpachankir Apnaqäwipax wali wakiskiriwa, ukatwa Jesusax Diosat yatiyir sarasax uka Apnaqäwitpun yatichäna (Mateo 4:17). Ukatxa jakäwis kunjam uñjañasasa uk sum amuytʼañasatakixa, Jesusax akham sasaw iwxtʼatayna: “Nayraqatax Diosan reinopa [jan ukaxa apnaqäwip] munapxam, ukhamarak kunatix chiqäki jupan nayraqatapanxa ukanaka” sasa (Mateo 6:33).

3. ¿Kunatsa aka urunakan Diosan Apnaqäwipat jankʼaki yatxatañasaxa?

³ Aka urunakanxa jankʼaki Diosan Apnaqäwipat yatxatañasaw wakisi, niyaw uka Apnaqäwixa akapach apnaqäwinak chhaqtayani, ukat aka Uraq wiñayatakiw apnaqxani. Daniel 2:44 qillqataxa akham siwa: “Uka reyinakan [jichhürunak] apnaqañapkamasti, alaxpachankiri Diosax mä yaqha reino [alaxpachan] saytʼayarakini, uka reinosti janipuniw tukjatäkaniti ni apnaqatäkarakinisa yaqha markanakampixa, [jaqinakax janiw mayampsa apnaqxapxaniti aka Uraqxa,] jan ukasti jupaw [jichhürunakan] taqi yaqha reinonakarux tukjani, wiñayan wiñayapaw uka reinox utjarakini” sasa. Ukhamaxa, Diosan alaxpachankir uka Apnaqäwipaw aka qhipa urunakxa tukuyani, aka ñanqha pacharux jan mayampitakiw tukjani, ukhamax janiw aka uraqi apnaqañatakix khitis waykasxaniti. Diosar taqi chuym yuspärañasawa, niyaw jan walinakat samarxañäni.

4. ¿1914 maranxa kunas alaxpachan kamachatayna Diosan Apnaqäwipampixa, ukat kunatsa wali wakiskirix jiwasatakixa?

⁴ Jehová Diosax 1914 maranwa Cristo Jesusar apnaqirit uttʼayi ‘uñisirinakap taypin apnaqañapataki’ (Salmo 110:1, 2, NM). Uka maranwa aka ñanqha pachan ‘qhipa urunakapax’ qalltarakïna (2 Timoteo 3:1-5, 13). Kuntï Jehová Diosax Daniel profetar uñjaykatayna ukaxa, ukharakiw alaxpachan phuqasïna. “Chuymani Jilïri” Jehová Diosasti, jaqin Yuqapa, Jesucristoruw ‘munañanïñsa, jachʼakankañsa, reinosa churatarakïna, taqi markankiri jaqinaka, kunayman casta parlani jaqinakarakiw juparux servipxäna’. Uk uñjasax Danielax akham qillqatayna: “[Apnaqäwipax] pachpakïskaniwa, reinopasa janirakiw tʼunjatäkaniti” sasa (Daniel 7:13, 14). Cristo Jesusan apnaqat uka alaxpachankir Apnaqäwimpiw Diosax walja bendicionanak churani kunatï chiqäki ukar munir jaqinakaruxa, nayra awk taykasar Edenan uchkatayna ukhatpachwa uk amtatayna.

5. ¿Diosan Apnaqäwipat kunanaks sum yatiñasa, ukat kunatsa?

⁵ ¿Diosan Apnaqäwipampi apnaqayasiñ muntanti? Ukhamächi ukaxa, alaxpach apnaqäwix kunjam uttʼayatas ukat kunjamsa apnaqani uk yatxatañ munañasawa. Kunsa luraski, kunsa jutïrin lurani ukat kunsa jiwasat mayistu uk yatiñ munaraktanxa. Uka tuqinakat sum amuytʼasax jukʼampwa uka apnaqäwiru munañäni. Munañapar iyawsañänixa, kuna sumanaktï Diosan Apnaqäwipax istʼasir jaqinakar churkani ukanak yatiyañatakix wakichtʼatäñäniwa (Salmo 48:12, 13).

Diosan Apnaqäwipan apnaqirinaka

6. 1) Cristor apnaqirit uttʼayasi ukampixa, ¿khitin jachʼakankañapaw uñachtʼayasi sis Bibliaxa? 2) ¿Diosan apnaqawipat yatxatasax kun lurañasasa?

⁶ Uka tuqinakat sum amuytʼañax ak qhanañcharakistu; Cristor apnaqirit uttʼayasaw Jehová Diosax jachʼakankañap uñachtʼayi, Jupaw Yuqaparux ‘munañanïñsa, jachʼa kankañsa, reinsa churatayna’. Ukatxa, Diosan Yuqapax apnaqañatak munañanïña katuqän ukhaxa, aka wakiskir arunakaw alaxpachan istʼasïna: “Akapach qhapaq markanakaxa [Jehová] Tatitusan qhapaq markanakapaw tukxapxi, Cristopankiriraki; wiñayan wiñayapatakirakiw [Jehová Diosax] munañanïni” sasa (Apocalipsis 11:15, MT). Ukhamaxa, Diosan Apnaqäwipat uñjtan taqi ukanakasa, ukat luratanakapasa pachpa Jehová Diosaruw jukʼampi jakʼachistu. Ukanak yatxatasax Diosan jachʼakankañapampi wiñayatak apnaqayasiñ munañasawa.

7. Jehová Diosan sutipxaru Jesucristox apnaqki ukaxa, ¿kunatsa jiwasatakix wali askixa?

⁷ Ak amuytʼañäni, Jehová Diosax Jesucristoruw Sutipxaru apnaqañapataki uttʼayatayna. Jupa tuqirakiw Diosax aka Uraqsa jaqinaksa luratayna, ukhamasti Jesusax jiwasat sipansa jukʼamp sum yati kuntï munktan ukanakxa. Ukatxa, qalltatpachwa ‘jaqinak uñjasax kusisïna’ (Proverbios 8:30, 31; Colosenses 1:15-17). Jesusax walpun jaqinakarux munasi, ukatwa aka Uraqir jutasin jiwasar qhispiyañ laykux jakañap luqtasiwayi (Juan 3:16). Ukhamatwa juchampit jiwañampit qhispiyassna, ukat wiñay jakañsa jikxataraksna (Mateo 20:28).

8. 1) Jaqinakan apnaqäwipat sipansa, ¿kunatsa Diosan Apnaqäwipax wiñayatakïni? 2) ¿“Amuyasiri Chiqapa Uywatax” kun lurañapas Diosan alaxpachankir Apnaqäwipatakixa?

⁸ Diosan Apnaqäwipax suma uttʼayatawa, wiñayatakirakiwa. Jehová Diosax janiw jiwirïkiti, ukatwa apnaqäwipax jan tukuskirirakixa (Habacuc 1:12). Akapach apnaqir jaqinakat sipansa Jesucristox janiw jiwirïkarakiti, juparuw Diosax apnaqäwip katuyi (Romanos 6:9; 1 Timoteo 6:15, 16). Diosar taqi chuym luqtir 144.000 jaqinakaw alaxpachat Jesucristomp chika apnaqapxarakini, jupanakax ‘taqi casta jaqinakata, kunayman parlani jaqinakata, jiskʼa markata, jachʼa markata’ mistutäpxiwa. Ukat jupanakax jan jiwir jakañwa katuqapxaraki (Apocalipsis 5:9, 10; 14:1-4; 1 Corintios 15:42-44, 53). Niya taqiniw alaxpachankxapxi, jichhürunakan aka Uraqina jiltʼapki ukanakaw “Amuyasiri Chiqapa Uywata” satäpxixa, jupanakaw aka Uraqinxa Diosan Apnaqäwipatxa taqi chuyma nayraru sartayasipki (Mateo 24:45-47).

9, 10. 1) ¿Kuna jan waltʼayirinaksa Diosan Apnaqäwipax tukjani? 2) ¿Kunanakatsa jithiqtañasa Diosan Apnaqäwip contra jan saytʼañatakixa?

⁹ Jehová Diosan amtat urupax purinkani ukhaxa, jupaw Jesucristompi ukat yanapirinakapampixa aka Uraqit jan walinak tukjayani. Jupanakaw kawkïri jaqinakatix Diosan jachʼakankañapar jan iyawsapki ukanakarus kuntï Jesucristo tuqi wali suma churäwinak churkistu ukanak jan munir jaqinakarus jan mayampitaki tukjapxani (2 Tesalonicenses 1:6-9). Ukaw Jehová Diosan urupänixa, ukax wali suyat urupuniwa, ukhaw taqi kunxar Munañani jachʼa Diosjam jachʼañchatäni. “Tatitun urupax purinxiwa, axsarkañ uruwa, colerasiñampi phuqhantatarakiw nakhi, [...] jucharar jaqinakarus tukjarakiniwa.” (Isaías 13:9.) “Uka urusti colerasiña urüniwa, llakisiña, jachaña ururakïniwa, tʼunjatäña, apanukutäña, chʼiwi chʼamak uru, qinayampi urpumpi phuqhantat ururakïniwa.” (Sofonías 1:15.)

¹⁰ Ukhamaxa, Supayampi apnaqat taqi kʼari yupaychäwinakasa, akapach apnaqirinakasa ukat taqi soldado tamanakapas jan mayampitaki tukjatäpxaniwa. Ukatxa akapachan qʼañu luräwinakaparjam sarnaqirinakasa, taqi kunsa jupatakik munirinakasa, kʼari chuymaninakasa jiwapxarakiniwa. Ukxarusti, waranq maraw Supayampi saxranakapampix jistʼantatäpxani, ukhamax janiw jaqinakar jan waltʼayxapxaniti. Diosan apnaqäwipakiw aka uraqpachxa apnaqxani. Kunatï chiqapäki ukar munirinakatakix ¡wali kusiskañäniwa! (Apocalipsis 18:21, 24; 19:11-16, 19-21; 20:1, 2.)

Diosan Apnaqäwipax kunjamsa Amtanakap phuqani

11. 1) Cristox Diosan Apnaqäwipan apnaqki ukhaxa, ¿kunjamsa Jehová Diosan amtapxa Uraqitaki phuqani? 2) ¿Diosan Apnaqäwipampi apnaqatax kunjamsa paraison jakasxañäni?

¹¹ Cristox Diosan Apnaqäwipan apnaqxani ukhaw kunäkänti aka Uraqitaki Diosan amtapaxa uk phuqani (Génesis 1:28; 2:8, 9, 15). Jichhürkamax janiw jaqinakax uka amtarjam sarnaqapkiti. Ukampisa, jichha jutkani “uka qhipa uraq[i]xa” jaqin Yuqapa sata, Jesucristor katuyatäniwa. Jehová Diosax aka ñanqha pach tʼunjkani ukhaxa Jupar istʼirinakax jakasipkakiniwa, ukanakax taqinis mayakiw Cristor istʼasa irnaqapxani, kuntï jupax siskani ukxa taqi chuymaw lurapxani, ukhamat Uraqpach paraisor tukuyañataki (Hebreos 2:5-9). Taqiniw luratanakapatxa kusisipxani, ukatxa taqinirakiw Uraqin achunakapatsa manqʼasipxarakini (Salmo 72:1, 7, 8, 16-19; Isaías 65:21, 22).

12. ¿Kunjamsa Diosan apnaqat jaqinakax amuyunsa janchinsa jan juchanïñxa jikxatapxani?

¹² Adanamp Evampiru Diosax luratayna ukhaxa janiw juchanïpkänti, ukatxa wawanakapampi Uraqir phuqantapxañapänwa, uk Diosax munäna, taqi jupanakax amuyunsa jañchinsa jan juchani ukham wali sum jakasipxañapänwa. Diosan Apnaqäwipaw uka amtapxa sum phuqasiyani. Uk phuqasiñapatakix kunanakarutï juchax puriykistu ukanakaw nayraqat chhaqtañapa, ukatakix janiw Cristox apnaqirjamakïkaniti, jan ukasti Jilïr Sacerdotjamaw irnaqarakini. Jaqjam jiwawayki uka luqtasïwipat askinak katuqapxañapatakix Jesusax llampʼu chuymampiw jaqinakarux yanaptʼani.

13. ¿Diosan Apnaqäwipampi apnaqat jaqinakax kuna bendicionanaksa katuqapxani?

¹³ Diosan Apnaqäwipampi apnaqat jaqinakax wali musparkañ bendicionanakwa jañchi tuqit katuqapxani. “Ukapachaw juykhunakas uñjxapxani, uqaranakas istʼapxarakini; suchunakasti taruja qallunakjamaw sinkʼusipxani, amutunakasti arnaqasipxarakiniwa” (Isaías 35:5, 6). Kunjamäkitï mä wawaxa, ukhamäxapxaniw chuymaninakaxa, usutanakan jañchipasa, jan qullañjam usuninakasa kʼumaräxapxaniwa. “Ukapachaw cuerpopaxa wasitata kʼumara uñjasxani, ukasti wayna tiempo sarnaqäwiparuw kuttxarakini.” (Job 33:25.) Uka uru purinini ukhaxa janiw khitis “Usutätwa” sisxaniti. ¿Kunatsa? Diosar axsartʼir jaqinakax juchampitsa ukat kunarutï juchax puriykistu ukanakatsa qhispiyatäxapxaniwa (Isaías 33:24; Lucas 13:11-13). Ukhamaxa, “Diosax taqi jachanakapwa nayranakapatxa picharani, janirakiw jiwañas, jachañas utjkxaniti, warariñasa ni usuyasiñasa. Taqi kunanakatï nayrax utjkän ukanakax tukusx[an]iwa” (Apocalipsis 21:4).

14. ¿Kunjamänis jan juchan jakasiñaxa?

¹⁴ Ukampisa, jan juchanïñatakix janiw amuyunsa janchinsa kʼumarakïñasäkiti. Jan ukasti Jehová Diosax kunjamtï sarnaqkaspaxa ukham sarnaqañasarakiwa, niyakixay ‘jupar uñtasita’ luratästanxa (Génesis 1:26). Ukatakix wal yatiqañasawa. Jutïrpachanxa “taqi kunasa chiqapapunïniwa”, kunjamtï Isaiasax siskänxa: “Jaqinakax yatiqapxaniwa kunatix chiqapäki ukxa” (2 Pedro 3:13; Isaías 26:9). Ukhamäñaxa, taqi kasta jaqinakampi, munat masinakampi ukat familiaranakampisa sumankañasatakiw yanaptʼistu, ukatxa pachpa Jehová Diosampi sumankañatakiw jukʼampi yanapistu (Salmo 85:10-13; Isaías 32:17). Kunatix chiqapäki uk yatiqirinakarux jukʼat jukʼatwa jupanakatak kunas Diosan munañapaxa ukax yatichasini. Jehová Diosar taqi chuym munasxapxanixa, sapüruw Jupan thakinakaparjam sarnaqxapxani. Jesusjamaw akham sapxarakini: “Nayax [Awkir] kusisiykirpun kuns lur[txa]” sasa (Juan 8:29). ¡Taqi jaqinakas ukham sapxani ukha, jakasiñax wali sumapunïniwa!

Luratanakax niyaw uñjasi

15. Aka tʼaqxarüki uka jisktʼanakampiw Diosan Apnaqäwipan luratanakapxa qhanañchtʼäta, ukatxa kunsa jichhax luraskañasa uksa qhanañchtʼarakïtawa.

¹⁵ Diosan Apnaqäwipan luratanakapas ukat luqtirinakapan luratanakapas uñjkañawa, muspharkañarakiwa. Akxarüki uka jisktʼanakasa ukat Biblian jiskʼa tʼaqanakapasa ukanak amtayistani, ukatxa Diosan Apnaqäwipampi apnaqat jaqinakax kunanaksa jichhürunakan lurapxañapa uksa amtayarakistaniwa.

¿Diosan Apnaqäwipax khitinak contras nayraqat saytʼasïna, ukat kunas utjawayi? (Apocalipsis 12:7-10, 12.)

¿Cristox Diosan Apnaqäwipan uttʼayatäkan ukat aksarux khitinakarus apthapisi? (Apocalipsis 14:1-3.)

¿Walja tʼaqhisiñ urunakanxa kunaw lurasiñap sasas Jesusax arsuwayi, ukat kamsis Mateo 25:31-33 qillqatanxa?

¿Kunas jichhax janiräkipan lurasiski? ¿Khitinakas uk lurasipki? (Salmo 110:3; Mateo 24:14; Apocalipsis 14:6, 7.)

¿Político tuqit uñisirinakas yupaychäwi tuqit uñisirinakas kunatsa Diosat yatiyir sarañxa jan tukjirjamäpki? (Zacarías 4:6; Hechos 5:38, 39.)

¿Khitinakatix Diosan Apnaqäwiparu iyawsapki ukanakax kunjamsa jichhax sarnaqxapxi? (Isaías 2:4; 1 Corintios 6:9-11.)

Waranq Mara Apnaqäwi

16. 1) ¿Qhawqha tiempos Cristox apnaqani? 2) ¿Kuna muspharkañanakas ukapachax jikxatasini, ukhamaraki uka qhipatsa?

¹⁶ Supayampi saxranakapampix jistʼantatäpxani uka qhipatxa, Jesucristompi ukat jupamp chika apnaqäw katuqir 144.000 alaxpachar saririnakampiw waranq mara apnaqapxani ukat sacerdotepxarakiniwa (Apocalipsis 20:6). Ukapachaw Adanan juchapasa ukhamaraki uka juchat jutir jiwañas jan mayampitaki chhaqtayatäni, ukat jaqinakax janiw juchanïxapxaniti. Waranq Mara Apnaqäw tukuyaruxa, Apnaqirjam ukat Diosan jilïr Sacerdotjama lurañanakapa tukuyasaxa Awkiparuw Jesusax ‘Apnaqäwxa katuyxani’, ‘ukhamata Diosax taqi kunxaru munañanïñapataki’ (1 Corintios 15:24-28). Ukatxa mä jukʼa tiempow Supayax antutatäni jan juchan jaqinakar yantʼañapataki, ukhamat yatisini khitinakas taqi chuyma iyawsapxi Jehová Diosan Jachʼakankañaparu. Uka qhipa yantʼäwi tukuyxani ukhawa Diosax kutkatasirinakampiru ukar Supayampirux jan mayampitaki tukjani (Apocalipsis 20:7-10). Jehová Diosan jachʼakankañapar mä arunxa apnaqäwipar iyawsirinakax taqi chuyma iyawsapxatapwa uñachtʼayapxani. Ukhamasti Jehová Diosampix wali sum apasipxani; Diosax wawanakapjamwa uñtʼasxani, wiñay jakañ churarakini (Romanos 8:21).

17. 1) ¿Kunas Diosan Apnaqäwipampix waranq mara tukuyatarux kamachasini? 2) ¿Kunatsa uka Apnaqäwix ‘janipuniw tukjatakaniti’ sisna?

¹⁷ Ukampis Jesusamp ukat 144.000 apnaqirinakampisti janiw pachpa luräwinak lurxapxaniti aka Uraqitakixa. ¿Ukhamax kuns lurxapxani? Bibliax janiw ukat parlkiti. Ukampis Jehová Diosan jachʼakankañapar taqi chuyma iyawsañänixa, Waranq Mara Apnaqäwix tukuyxani ukhaxa jakaskakiñäniwa, ukhaw kunsa Jehová Diosax jupanakatak amti ukxa yatxañäni, ukat taqi amtäwinakapsa yatxarakiñäniwa. Jichhax ¿kunatsa Criston waranq mara apnaqäwipax “pachpakïskaniwa” jan ukax wiñayatakïniwa sispachaxa? ¿Ukat kunatsa “janirakiw tʼunjatakäniti” sispachaxa? (Daniel 7:14.) Uka Apnaqäwix janiw yaqha amtani jaqinakan amparapankkaniti, jan ukasti Jehová Diosakiw apnaqxani. Ukampis uka Apnaqäwix “janipuniw tukjatäkaniti” mä arunxa luratanakapax wiñayatakipunïniwa (Daniel 2:44). Apnaqiri Diosan jilïr Sacerdoterus ukhamaraki jupamp chika apnaqir sacerdotenakarusa wiñayatakiw jachʼañchasini Jehová Diosaru taqi chuyma luqtapxatanakapata.

Amtañataki

• ¿Kunatsa Diosan Apnaqäwipakipunix jaqinakan jan waltʼäwipxa askichaspa? ¿Kunapachas Jesucristox Diosan Apnaqäwipan apnaqañ qallti?

• ¿Kunanakas Diosan Apnaqäwipatsa ukhamaraki luratanakapatsa jumatakix munañjamaxa?

• ¿Diosan Apnaqäwipan kuna luratanakapas niya uñjasxi, ukat jiwasax kun lurañasarakisa?

[92, 93 jananakan fotopa]

Diosan Apnaqäwipampi apnaqat taqi jaqinakaw kunatix chiqapäki ukxa yatiqapxani