19 jalja
Diosan arunakapxa jan axsaras qhanañchaskakiñäni
1. 1) ¿Kuna suma yatiyäwinaksa Jesusan arkirinakapax qhanañchapxäna, ukampis kamachapxänsa yaqhip judionakaxa? 2) ¿Kun jisktʼasiñasas wakisispa?
DIOSAN Yuqapa, Jesucristox Uraqpach apnaqañapataki ajllitäkäna ukat jichhakamax niya pä waranq maranakäxaniwa. Uñisir yupaychirinakaw Juparux jiwayapxäna, ukampis Jehová Diosaw jiwatanak taypitxa jaktayäna, ukhamatwa jiwasax wiñay jakañ jikxatsnaxa. Ukat kunapachatï arkirinakapax uka suma yatiyäwinak apapkäna ukhaxa, wali arknaqataw uñjasipxarakïna. Yaqhiparux carcelaruw jistʼantapxäna, ukat jawqʼjapxäna kunawa, ukatxa janiw Jesusan sutipxarux parlapxätati sasaw sapxäna (Hechos 4:1-3, 17; 5:17, 18, 40). ¿Kuns lurapxäna? ¿Kuns jumax lurasmäna? ¿Jan axsartʼas qhanañchaskakisamänti?
2. 1) ¿Kuna suma yatiyäwinakas aka urunakanxa apasiñapa? 2) ¿Khitinakas uka suma yatiyäwinak apapxañapa?
2 Jesucristorux uñisirinakap taypin apnaqañapatakix 1914 maranwa alaxpachan uttʼayasïna, jupaw Diosan Apnaqäwipan Apnaqiripaxa (Salmo 110:2). Ukxarusti, Supayampi ñanqhanakapampisti aka Uraqir jaquqanitaw uñjasipxi (Apocalipsis 12:1-5, 7-12). Ukhamatwa ñanqha pachan qhipa urunakapax qalltawayi. Aka urunak tukusxani ukhaxa Diosax jan mayampitakiw Supayan pachapxa tʼunjani (Daniel 2:44; Mateo 24:21). Uka tʼunjäwi pasirinakaxa, paraisoptayat Uraqinwa wiñayataki jakasipxaspa. Jumatï uka suma yatiyäwinak iyawstaxa, yaqhanakaruw yatiyañ munpachätaxa (Mateo 24:14). Ukampis ¿jaqinakax kamsapxakinisa?
3. 1) ¿Kunjamsa jaqinakax Diosan Apnaqäwipat yatiyäwinakxa katuqapxi? 2) ¿Kun jisktʼasiñasas wakisi?
3 Diosan Apnaqäwipat yatiyir saräta ukhaxa, yaqhipanakax munasiñampiw katuqtʼapxätamxa, ukat janis istʼañ munapkaspa ukhamwa niya taqinis tukupxani (Mateo 24:37-39). Yaqhipanakax sawkasipxätamwa ukat yaqhanakasti janiw Diosan Arupa apañamxa munapkaniti. Familia taypitsa uñisirinakaw sartani sasaw Jesusax säna (Lucas 21:16-19). Irnaqäwinsa yatiqañ utansa uñisipxistaspawa. Yaqhip marka apnaqirinakaxa Jehová Diosan Qhanañchirinakapax janiw utjañapäkit sasaw kamachinak apsupxi. Jumax ukham jan walinakan uñjasïta ukhaxa, ¿jan axsaras Diosan arunakap qhanañchaskakïtati ukat ‘iyawsäwiman chʼamani saytʼaskakïtati’? (1 Corintios 16:13.)
Jan chʼamasarukix atinisiñäniti
4. 1) ¿Diosar taqi chuyma luqtañatakix kunas munasi? 2) ¿Kunatsa cristiano tantachäwinakax wali wakiskirixa?
4 Jehová Diosar taqi chuyma luqtañatakixa churäwinakapar atinisiñasawa. Mayax Jehová Diosan Qhanañchirinakapan tantachäwinakapäspawa, Bibliax tantachasipxapunim sistuwa (Hebreos 10:23-25). Jehová Diosan kawkïr Qhanañchirinakapatï taqi chuyma luqtasipki ukanakaxa jilat kullakanakapampix tantachasipxapuniwa. Uka tantachäwinakanwa Bibliat sum yatiqtanxa, ukat Bibliat yatxtan uka chiqa yatichäwinaksa jukʼampwa yatxataraktanxa, ukatsti kunatsa yatiqatarjam sarnaqañas wali wakisirix ukwa amuytʼayarakistu. Ukampisa, uka tantachäwinakanwa Diosan munañap phuqañatakixa chʼamachastanxa, ukat Diosaru mayachtʼat yupaychasax jukʼampiw cristiano masinakasarux jakʼachastanxa. Jehová Diosan ajayupax tama taypiw irpistu, ukatxa uka ajayu tuqirakiw Jesusax jiwasampïski (Mateo 18:20; Apocalipsis 3:6).
5. ¿Jehová Diosan Qhanañchirinakapax jarkʼatäpki ukhaxa kamachapxisa?
5 ¿Jumax taqi tantachäwinakar sarapuntati, ukat ukan yatiqatarjamati sarnaqaskta? Yaqhip markanakanxa Jehová Diosan Qhanañchirinakapax jan Diosar luqtapxañapatakiw jarkʼatäpxi, ukat utanakapanakwa jupanakax mä qhawqhani tantachasipxi. Tantachäwinakapax kuna horas apasini, kawkhankanisa ukanakax jittayasikispawa, ukatxa jupanakatakix uka tantachäwinakar sarañax chʼamäspawa, awisaxa wali arumaw tantachasipxi. Ukhamäkipansa, Diosat jan jithiqtir jilat kullakanakax taqi kun lurapxi taqpach tantachäwinakar jan qhipaqtas sarañatakixa.
6. ¿Kunjamatsa Jehová Diosar atinisitasxa uñachtʼaytanxa, ukat kunjamsa jaqinakar jan axsaras yatiyaskakiñataki yanapistu?
6 Jehová Diosan yanaptʼap munapuntanwa, uka amuyumpiw chuymatpach Jupar mayisiñasa, ukar yatinuqtasaw Jehová Diosarux jukʼampi atinisiñänixa. ¿Jumax ukhamti lurta? Aka Uraqin Jesusax Diosataki irnaqkäna ukhaxa walja kutiw Awkipar mayisïna (Lucas 3:21; 6:12, 13; 22:39-44). Janïra lawar chʼakkatat jiwkäna uka arumaxa, Jesusax arkirinakaparux akham iwxtʼäna: “Jan ikipxamti; Diosat mayisipxam, jan yantʼar mantañataki” sasa (Marcos 14:38). Diosan Apnaqäwipatxa jaqinakax janikiw istʼañ munapkiti, uk uñjasax janikiw Diosan arunakapxa taqi chuym yatiyir sarxsnati. Ukat jaqin sawkasitas jan ukax arknaqatas janikiw Diosat yatiyir sarañ munxsnati. Ukham jan aynachtʼañatakix Jehová Diosaruw taqi chuyma mayisiñasa qullan ajayupa, ukhamata jan axsaras jaqinakar yatiyaskakiñataki (Lucas 11:13; Efesios 6:18-20).
Jan axsartʼas yatiyirinakat uñtʼatäpxiwa
7. 1) ¿Kunatsa Hechos librot yatiqasiñasaxa? 2) Kuna askinakas jiwasatak utji uk qhanañchasaw aka jisktʼanakarux jaysäta.
7 Kunatï Hechos libron qillqatäki ukat yatiqasiñasawa. Kunjamsa apostolanakas yaqha arkirinakas Diosar taqi chuyma luqtapkäna, ukat Jehová Diosan jan axsartʼir Qhanañchirïpxatapsa kunjamsa uñachtʼayapxäna ukat kunjamaraksa jan walinakarus atipapxäna uka tuqitwa uka libron parli, ukat jupanakax jiwasjamakïpxarakïnwa. Jichhax uka librot mä chiq uñxattʼañäni, ukatakiw akxarüki uka jisktʼanakas jiskʼa tʼaqanakasa. Uk liytʼkasax kuna askinaksa apsusma uk amuyäta.
¿Apostolanakax yatiñan jaqïpxänti? ¿Janit jupanakax kunarus axsarapxirïkäna? (Juan 18:17, 25-27; 20:19; Hechos 4:13.)
¿Kunatsa Pedrox Diosan Yuqapar jiwayapkäna uka jaqinakan nayraqatapanxa jan axsartʼas parläna? (Mateo 10:19, 20; Hechos 4:8.)
Judionakan jilïrinakapampi janïra parlkasaxa, ¿kunsa apostolanakax semananak faltkipanxa lurapxäna? (Hechos 1:14; 2:1, 42.)
Marka apnaqirinakax jan Jesusan sutipxaru parlapxamti sas tuqipxäna ukhaxa, ¿Pedrompi Juanampix kamsapxänsa? (Hechos 4:19, 20.)
Ukat mistxasaxa, ¿khitirus apostolanakax yanaptʼxa mayisipxäna? ¿Jan jukʼamp arknaqayasxañatakit mayisipxäna, jan ukax yaqha amtampich mayisipxäna? (Hechos 4:24-31.)
Diosat yatiyirinakar amuktʼayañ munapxäna ukhaxa, ¿kunjamsa Jehová Diosax luqtirinakapar yanaptʼänxa? (Hechos 5:17-20.)
Mä amtampiw Diosax apostolanakar antutayäna, uk amuytʼasipxatapxa, ¿kun lurasas jupanakax uñachtʼayapxäna? (Hechos 5:21, 41, 42.)
Jesusan walja arkirinakapaw arknaqatax yaqha chiqanakar sarxapxäna, ¿ukat jupanakax kunsa lurasipkakïna? (Hechos 8:3, 4; 11:19-21.)
8. Jesusan nayra arkirinakapan yatiyatanakapatxa, ¿kuna askinakas utjäna, ukat kunatsa jiwasax yatiyir sararaksna?
8 Diosan arunakapat yatiyir sarapkäna ukax janiw inamayäkänti. Pentecostés 33 j.p. maranxa mä kimsa waranqaniw bautisasipxäna, ukatxa “iyawsirinakasti jukʼampiw yapxattäna, chachanakatsa, warminakatsa” (Hechos 2:41; 4:4; 5:14). Tiempompix Diosan markapar arknaqir Saulo chachas Jesusan arkiriparuw tukxäna, ukat Diosan arunakapxa jan axsartʼasaw qhanañchäna, jupax Tarso markankirïnwa, ukatxa apóstol Pablo satäxänwa (Gálatas 1:22-24). Ukampis Diosan arunakapat yatiyañaxa janiw uka tiempokamakïkänti. Jan ukasti, aka qhipa urunakanxa jukʼampi yatiyasiski, ukatxa taqi chiqanwa yatiyasiskaraki. Jiwasaw yatiyasktanxa, ukax wali askipuniwa, ukampis uk lurañatakix Jehová Diosan nayra Qhanañchirinakapat yatiqassnaxa.
9. 1) ¿Kawkinakans Pablox Diosat qhanañchäna? 2) ¿Kunanak lurasas jumax Diosan Apnaqäwipat yatiyaskta?
9 Jesusat kunatï chiqäki uk yatiqasax Pabloxa, ¿kuns luräna? “Jesusax Diosan Yuqapaw” sasaw jankʼaki yatiyañ qalltäna (Hechos 9:20). Diosax khuyaptʼayäna ukatxa wal yuspäräna, ukat kuna suma yatiyäwinaktï katuqkäna ukxa yaqhanakax yatipxañaparakïnwa, uk jupax amuyäna. Pablox judío jaqïnwa, ukhamax kunjamtï khä tiemponakan yatichapxirïkänxa ukhamwa tantachasiñ utanakan jupax yatichäna. Utat uta yatiyiris sararakïnwa, ukatxa plazansa qhatunakansa yatiyarakïnwa. Ukatxa Diosat yatiyirix yaqha markanakaruw sararakïna (Hechos 17:17; 20:20; Romanos 15:23, 24).
10. 1) Pablox janiw jan axsarirïkänti, jan ukasti jaqinakar parlañatakix wal amuytʼasirïna, ¿kunjamsa uk uñachtʼayäna? 2) ¿Kunjamsa Pablot yatiqasisax familiaranakarus irnaqir masinakarus ukat yatiqir masinakarus yatiysna?
10 Pablox janiw axsarirïkänti, wali amuytʼasirïnwa, jiwasax ukhamäñasarakiwa. Kunsa Diosax judionakan nayra awkinakaparux säna uka tuqinakat judionakarux parläna, ukat griegonakarusti, kuntï jupanakax uñtʼapkäna uka tuqinakat parlarakïna. Kunjamsa jupax Diosar uñtʼatayna uka tuqinakat parlasaw awisax jaqinakar amuytʼayirïna. “Taqi akanakxa Tatitun arunakap parlañ laykuw lurta, ukhamata kuna askinakatix uka arunak parlañanxa utjki ukanak katuqañaxataki” sasaw säna (1 Corintios 9:20-23; Hechos 22:3-21).
11. 1) ¿Uñisirinakampi jan sapa kuti jikisiskañatakix kunsa Pablox luräna? 2) ¿Kuna jan waltʼäwin uñjasisas Pablot yatiqassna ukat kunjamsa? 3) ¿Jan axsartʼas yatirir saraskakiñatakix khitis chʼam churistaspa?
11 Wali arknaqatax mä markat yaqha chiqar sarañax wakisirjamän ukhax yaqha chiqanakaruw Pablox yatiyir sarirïna, ukhamat uñisirinakampix jan sapa kuti jikisiskañataki (Hechos 14:5-7; 18:5-7; Romanos 12:18). Ukampis janiw suma yatiyäwinak apañatxa pʼinqaskänti (Romanos 1:16). Chiqasa, janiw uñisirinakampi tuqiyasiñsa nuwayasiñsa munkänti, ukampis ‘Diosatwa chʼam katxatäna’ jukʼampi yatiyaskakiñatakixa. Akham sänwa: “Tatituwa yanapitu, chʼam churarakitu, ukhamat qhispiyasiñ arunak parlañaxataki” sasa (1 Tesalonicenses 2:2, MT; 2 Timoteo 4:17). Cristiano tama pʼiqtʼir Jesusaw jichhürunakanxa chʼam churaskistu, ukhamatwa kuntï jupax aka urunakatak siskäna ukax phuqasiski (Marcos 13:10).
12. ¿Kunjamsa jan axsartʼir cristianütasxa uñachtʼaysnaxa, ukat kunatsa?
12 Diosan arunakapat jan axsaras yatiyaskakiñasawa, kunjamtï Jesusampi ukat Diosar taqi chuyma luqtir cristianonakax lurapkäna ukhama. Jan istʼañ munapxipansa yatiyir saraskakiñäniwa, janirakiw arknaqatas amuktʼkañäniti. Ukampis ak amuyasiñasawa; taqiniruw sum uñjañasaxa ukat jan istʼañ munirinakarux janiw Diosan arunakap istʼayañkampun arxaykañäniti. Diosan Apnaqäwipakiw aka Uraqitakix chiqa apnaqäwix sasaw Jesusax yatiyäna, jiwasax ukham yatiyaraktanxa. Jan payachasisaw parltanxa, kunattix Jehová Diosaw khitistu, jupaw taqi kunxar Munañan Diosaxa, ukhamax kuntï yatiyktan ukaxa Jupankiwa janiw jiwasankkiti. Ukatxa, Jehová Diosarux munatas laykuw yupaychtanxa, janipuniw uk armañasäkiti (Filipenses 1:27, 28; 1 Tesalonicenses 2:13).
Amtañataki
• ¿Khitinakarutï yatiyañjamäki ukanakarux kunatsa Diosan apnaqäwipat yatiyañasa, ukat jaqinakax kunjamsa katuqapxani?
• Jehová Diosar luqtañatakix janiw chʼamasar atinisktanti, ¿kunjams uk uñachtʼaytanxa?
• ¿Kuna askinaksa Hechos librotxa yatiqtanxa?
[173 janan fotonakapa]
Kunjamtï nayra maranakanxa Diosan Arup yatiyapkänxa ukhamwa Jehová Diosan Qhanañchirinakapax jan axsartʼas yatiyasipki