Yatiqaskañ sarnaqäwinaka: Lidia

Lidiax jichha bautisat cristianäkchïnsa, jupaw nayraqat apóstol Pablorusa ukat yaqha jilat kullakanakarus qurpachtʼirïna ukat khuyaptʼayirïna (Hechos 16:14, 15). Ukham khuyaptʼayasirïsaw, jupax uka chiqa chuyman cristianonakampix sum apaspachäna. Ukat kunapachatï apóstol Pablox Silasamp carcelat mistxapxän ukhaxa, ¿kawkirus sarapxpachänxa? Lidian utaparuw sarapxäna (Hechos 16:40).

¿Jumasti? ¿Kunjamtï Lidiax lurki ukham lurarakismati? ¿Kunjams lurasma uk yattati? Jukʼat jukʼatwa qalltasma. Tantachäwir sarasaxa taqi jilat kullakanakampis parlañamäkaspa ukham janiw amuyasiñamäkiti. Jan ukasti, sapa tantachäwinwa mä jilatampikis jan ukax mä kullakampikis parltʼañatakix chʼamachasiñama. Jan kuna tuqit parlañs yatkäta ukhaxa, jisktʼam jan ukax juma pachpatwa kuns parltʼasmaxa. Istʼirïñamawa. Tiempompix taqinimpiw sum parltʼasxasma. Chiqpachansa, taqiniw suma chuymampi ukat munasiñamp istʼatäñ muntanxa (Proverbios 16:24). Lidiax wali munasiri ukat khuyaptʼayasirïtapatxa, wali suma amigonakanïnwa. Jumatï jupjam lurasmaxa, ukham suma amigonakanirakïsmawa.