¿Jiwatanakatakejj mä suytʼäwejj utjiti?

1. ¿Kuna suytʼäwis jiwatanakatakejj utji?

Jesusajj aka Oraqenkäna ukhaw Lázaro sat amigopajj jiwjjana. Jupajja Jerusalén jakʼan jikjjataskäna uka Betania markanwa jakasïna. Kunapachatï Jesusajj uka markar purïna ukhajja, Lazarojj pusi urunakaw jiwatajjäna. Ukat Jesusajj jiwatan kullakanakapampiw kawkhantï imatäkänjj ukhar sarasipkäna, jupanakajj Marta ukat María satäpjjänwa. Ukat walja jaqenakarakiw ukawjan aywthapipjjäna. Amuysnati, Jesusajj Lazaror jaktaykäna ukhajja, ¿kunja kusisitas Martampi Mariampejj jikjjatasipjjpachäna? Juan 11:21-24, 38-44 liytʼäta.

Jiwatat jaktaniñajja, Biblian mä suma yatiyäwipawa. Ukat Jehová Diosajj jiwatanakar aka Oraqen jakapjjañapatak jaktaykani ukjja Martajj yatirakïnwa. Job 14:14, 15 liytʼäta.

2. ¿Jiwatanakajj kunjamäsipkisa?

Jaqenakajj ‘laqʼat luratätanwa’ (Génesis 2:7; 3:19). Janiw mä ajayuniktanti, jan ukasti janchin chʼakhan jaqekïtanwa, ukat jiwkasajj janiw yaqha cheqan jakktanti. Kunapachatï lejjwejj jiwjje ukhajja, taqe amuyunakaw chhaqhawayjje janiw kuna amtañas utjjeti. Ukhamajj jiwatanakajj janiw llakisipkis ni tʼaqhesipkisa. Ukatwa Lazarojj jaktankäna ukhajja, jiwatapatjja janiw kuns qhanañchkänti. Salmos 146:4 ukat Eclesiastés 9:5, 6, 10 liytʼäta.

Ukat Diosas jiwatanakar infiernon tʼaqhesiykaspa ukhamwa walja jaqenakajj amuyapjje, ukampis kunjamtï yatjjataniwayktanjja, jiwatanakajj janiw kuns amuyapkiti. Ukhamajj infiernot yatichäwinakajja, mä kʼari yatichäwikiwa. Ukat Jehová Diosajj janis sintʼarïkaspa ukham uñjayaraki. Ukampis Jehová Diosajj janiw khitirus ukham tʼaqhesiykaspati, jan ukasti ukham luräwinakarojj uñisiwa. Jeremías 7:31 liytʼäta.

¿Jiwatanakajj jaktanipjjaspati? sat video uñtasma.

3. ¿Jiwatanakamp parlsnati?

Jiwatanakajj janiw parlapkaspati ukat janirakiw istʼapkaspasa (Salmo 115:17). Ukampisa jan wali angelanakaw utji, jupanakaw jaqenakampejj parlapjjaspa ukat jiwat jaqepkaspas ukham tukupjje (2 Pedro 2:4). Ukatwa Jehová Diosajj jiwatanakamp parlañ munirirojj uñisi. Deuteronomio 18:10, 11 liytʼäta.

4. ¿Khitinakas jaktanipjjäni?

Millón millón jaqenakaw jiwawayapjje ukat jupanakaw jaktanisin aka Oraqen jakasipjjani. Ukat khitinakatï Jehová Diosar jan uñtʼas jan walinak lurawayapjje ukanakas jaktanipjjarakiniwa. Lucas 23:43 ukat Hechos 24:15 liytʼäta.

Khitinakatï jaktanipkäni ukanakajja, kunatï Jehová Diosat cheqäki uk yateqapjjani, ukat Jesusar istʼasaw iyawsatapjja uñachtʼayapjjani (Apocalipsis 20:11-13). Ukham lurapjjani ukhajja, wiñayatakiw aka Oraqen jakasipjjarakini. Juan 5:28, 29 liytʼäta.

5. Jiwatat jaktañajja ¿kuns Jehová Diosat yatichistu?

Jehová Diosajja, wali munat wawaparuw khitani jiwasan juchanakasat qhespiyañataki, ukhamatwa jiwatat jaktañajj utjaraki. Ukham lurasinjja Jehová Diosajj wali munarisirïtapa ukat khuyaptʼayasirïtap uñachtʼayistu. Ukhamajj jiwatanak jaktanipkani ukhajja ¿khitimpis jikisiñ munasma? Juan 3:16 ukat Romanos 6:23 liytʼäta.