Tukuyañataki

1, 2. ¿Kunatsa iyawsäwinïñatak jankʼakïñasa?

IYAWSÄWI, uka aru istʼañajj wali askipuniwa. Cheqas iyawsäwinïñajj wali wakiskiripuniwa. Ukampis yaqha aruw utjaraki, ‘jankʼakïña’. ¿Kunatsa iyawsäwit parlkasajj jankʼakïñat parlaraktanjja? Janïratï iyawsäwinïkstan ukhajja, jankʼakiw iyawsäwinïñatak chʼamachasiñasa. Ukat iyawsäwinëjjstan ukhajja, jukʼamp iyawsäwinïñatakejj jankʼakïñasarakiwa. ¿Kunatsa?

² Amuytʼañataki, umat pharjat mä wasar pampnam saraskasma ukat mä akatjamat um jikjjatasma ukhajja, jankʼakiw lupimp jan wañsuñapatakejj kunampis imtʼasma. Ukat kawkharutï puriñ munkta ukar puriñkamajj um utjaskakiñapatakejj sapa kutiw yaptʼasma. Jichhürunakanjja, ajay toqet mä wasar pampansa jaksna ukhamarakiwa, cheqpach iyawsäwejj umar uñtatawa, janiw añch utjkiti ukat janitï jukʼamp iyawsäwinïñatak chʼamachasiñäni ukhajja, uka iyawsäwisajj chhaqtjjaspawa. Ukhamajj jankʼakïñasawa. Jan umampejj janiw jaksnati ukat jan iyawsäwinïsajj janirakiw Diosamp sum apasksnati (Rom. 1:17).

3. Jukʼamp iyawsäwinïskakiñatakejja, ¿kuna yanaptʼsa Diosajj churistu, ukat kunsa lurañasa?

³ Jichha tiempon iyawsäwinïskakiñajj wali chʼamawa, uk Jehová Diosajj sum yati. Ukatwa yateqasiñatak walja suma sarnaqäwinak Biblian qellqayawayi. Diosan amuytʼayataw Pablojj akham säna: “Yateqasipjjam khitinakatejj iyawsäw toqe, jan qarjasisa taqe kunatejj Diosajj: ‘Churämaw’ siski uka herencia katoqapki ukanakata” sasa (Heb. 6:12). Ukhamajj iyawsäwini nayra chacha warminakat yateqasiñatakiw Diosan markapajj chʼamañchtʼistu, jupanakatwa aka libron yatjjatawaytan. ¿Kun lurañas jichhajj waktʼistu? Maya, jukʼamp iyawsäwinïñatakiw chʼamachasiñasa. Paya, kuntï jutïritak suyktan ukjja taqe chuym suytʼaskakiñasawa.

4. ¿Kunsa Supayajj jan iyawsäwinïñasatak luraski, ukampis kunatsa jan ajjsarañasäki?

⁴ Jukʼamp iyawsäwinïñatak chʼamachasiñäni. Akapach apnaqeri Supayaw jan iyawsäwinïñasatak wal chʼamachasiski. Ukatwa aka jan wali pachan iyawsäwinïñajj wali chʼamajja. Jïsa, Supayajj jiwasat sipansa, jukʼamp chʼamaniwa, ukampis janiw ajjsarañasäkiti. ¡Taqeniw iyawsäwinïsna ukat urut urutjamaw jukʼamp iyawsäwinïskaksna! Amtapuniñäni, Jehová Diosajj cheqpach iyawsäwinïpki ukanakan amigopawa. Jupan yanaptʼapampejj Supayar saykatsnawa. Janiw ukakïkiti, Supayajj ‘jiwasat jaltawayjjarakiniwa’ (Sant. 4:7). Ukampis qhepakam aguantañatakejj sapüruw Diosar jukʼamp atinisiñatak wal chʼamachasiñasa. ¿Kunjamatsa?

5. Diosan yupaychirinakaparojja, ¿kunas iyawsäwinïñatak yanaptʼäna?

⁵ Kunjamtï yateqanktanjja, Diosan yupaychirinakapajj janiw qalltatpach iyawsäwinïpkänti. Diosan qollan ajayupaw iyawsäwinïñatak yanaptʼistu, ukwa nayra sarnaqäwinakajj uñachtʼayi (Gál. 5:22, 23). Jupanakajj Diosaruw oracionan yanaptʼa mayipjjäna, uk istʼasaw Diosajj jukʼamp iyawsäwinïpjjañapatak yanaptʼäna. Jiwasajj ukham lurañasarakiwa. Janipun armañäniti, jiwasatï Diosar oracionan mayiñäni ukat ukarjam lurarakiñäni ukhajja, Jupajj yanaptʼapunistaniwa (Luc. 11:13). Ukampis ¿kunampsa lursna?

6. Biblian parlki uka chacha warminakat yatjjatasajja, ¿kunjamsa jukʼamp askinak apsna?

⁶ Aka libronjja, iyawsäwin mä qawqha chacha warminakatwa yatjjatawaytanjja. Ukampis waljaw utjaski (Hebreos 11:32 liytʼasiñapawa). Sapak yatjjatkañäni ukhaw uka chacha warminakat jukʼamp yatjjatsna. Walja yatichäwinakwa sapa sarnaqäwit yateqsna, ukampis aleqak liyiñäni ukhajja, janiw jukʼamp iyawsäwinïñatak yanaptʼkistaniti. Uka chacha warminakajj kunjamsa jakasipjjäna, kunanakas uka tiempon pasäna ukanak sum yatjjatasakiw aski yatichäwinak yateqsna. Jupanakajj ‘jiwasjam jaqekïpjjarakïnwa’ uk janipun armañäniti, ukhamatakwa jupanakar jukʼamp jakʼachasiñäni (Sant. 5:17). Jupanakjam amuyasaw kunjamsa jan waltʼäwinakan uñjasisajj chuymapan jikjjatasipjjäna uk jukʼamp sum amuysna.

7-9. 1) Kunjamtï jichhürunakan yupaychktan ukham yupaychapjjam sasin nayra chacha warminakar sissna ukhajja, ¿kamsapjjaspasa? 2) ¿Kunjamsa luratanakasampi jukʼamp iyawsäwinïtas uñachtʼaysna?

⁷ Kuntï Diosajj lurañas munki uk phoqhasakiw jukʼamp iyawsäwinïsna. Amtañäni, ‘iyawsañajj jiwatawa, kunapachatejj jan suma luräwinakampi uñachtʼayaski ukhajja’ (Sant. 2:26). Diosar yupaychiri uka nayra chacha warminakajja, taqe chuymaw kuna luräwinakatï Jehová Diosajj jichhürunakan lurañasatak jaytawaykistu uka luräw phoqhapjjasapäna.

⁸ Amuytʼañataki, “janiw pampanakan qalat lurata altaranakampi Diosar yupaychjjätati. Jan ukasti jilat kullakanakamp chikaw suma Tantachasiñ Utana ukat jachʼa tantachäwinakanwa Diosar yupaychjjäta” sasin Abrahamar sapjjaspa ukhajja, ¿kunjamakis jikjjatasispa? Jupajj Diosan arunakapjja, ‘jayatakwa uñtäna’, ukampis kunjamsa ukanakajj jichhürunakan sum phoqhasiski uk uñjasajj walpun kusisispa (Hebreos 11:13 liytʼasiñapawa). Jan ukajj “janiw Baal diosan jan sinttʼasiri profetanakapar jiwayir sarkätati, ni Diosar kutkatasir mä reyin apnaqatas Diosar yupaychjjätati. Jan ukasti utanakapar sarasaw jutïritak suma yatiyäwinak jaqenakar yatichir saräta” sasin Elías profetar sapjjaspa ukhajja, ¿kunjamakis jikjjatasispa? Taqe chuyma serviri uka chachanakajj jan pächasisaw ukanak phoqhapjjasapäna.

⁹ Ukhamajj iyawsäwinïtasjja, luräwinakasamp uñachtʼayaskakiñäni. Diosan amuytʼayat Arupajj parlki uka chacha warminakat yateqasisajj ukarjam sarnaqaskakiñäni. Ukham lurasajj kunjamtï aka libro qalltasajj sawayktanjja, jupanakarojj wali munat amigonakasarjamaw uñjañäni. Ukampis niyaw jupanakampi jukʼamp sum apasjjañäni.

10. ¿Kunatsa paraison wali kusisit jikjjatasiñäni?

¹⁰ Kuntï jutïritak suyktan ukjja taqe chuym suyaskakiñäni. Kuntï Diosajj jutïritak arsuwaykäna ukaruw nayra tiempon servirinakajj taqe chuym atinisipjjäna. ¿Jiwasajj atinisiraktanti? Aski jaqenak jaktanipjjani ukhajja, Diosar taqe chuyma serviri nayra chacha warminakar katoqañajj wali kusiskañapunïniwa (Hechos 24:15 liytʼasiñapawa). ¿Kunsa jupanakar jisktʼañ munasma?

11, 12. ¿Kunsa aka chacha warminakar jisktʼañ munasma? 1) Abel. 2) Noé. 3) Abraham. 4) Rut. 5) Abigail. 6) Ester.

¹¹ “¿Awk taykamajj kunjamäpjjänsa? Querubines sat angelanakampi, ¿mä kutis parlawaytati?” sasin inas Abelar jisktʼañ munsna. Noé chacharojj “¿nefilim satäpkäna uka chachanakar ajjsarirïtati? Jan ukajj walja animalanakar mä mara arca manqhan uñjañajja, ¿kunjamakïnsa?” sasaw jisktʼaraksna. Abrahamarojj inas akham jisktʼsna: “¿Ur markat mistuñajj chʼamakïnti? ¿Sem chachati Jehová Diosat yatichawaytam?” sasa.

¹² Ukat Biblian parlki uka warminakar ¿janit jisktʼañ munkaraksna? Sañäni, “¿kunatsa Diosar yupaychañ amtawayta?” sasaw Rut warmir jisktʼsna. “Davitaruw yanaptʼawaytjja sasin chachamar awisañ ¿ajjsarayätati?” sasaw Abigailar jisktʼaraksna. Ukat Mardoqueompi Esterampejj kunjamsa jakasjjapjjäna uk Bibliajj janiw qhanañchjjeti, ¿janit uk yatiñ munkaraksna?

13. 1) ¿Kunsa nayra chacha warminakajj jaktanisajj jisktʼapjjestani? 2) Nayra tiempon jakapkäna uka chacha warminakar uñtʼañajja, ¿jumatakejj kunjamakisa?

¹³ Uka chacha warminakajj wal jiwasar jisktʼañ munapjjarakistani. Qhepa urunakan jakaña ukat jan waltʼäwinakanjja kunjamsa Diosajj markapar yanaptʼawayi uk yatiyañajj ¡wali kusiskañapunïniwa! Kunjamsa Diosajj taqe arsutanakap phoqhawayi uk yatisajj wal kusisipjjani. Maysa toqetjja, janiw “jupajj ukhamäpachänwa” sasin sisjjañäniti. Jan ukasti, taqe jupanakaruw sum uñtʼjjañäni. Ukampis uka uru puriniñapkamajja, jupanakar uñjksnas ukham amuyasipjjañäni. Jupanakan iyawsäwipat yateqasipjjañäni, ukhamatwa uka munat amigonakasamp chikajj wiñay wiñayataki Jehová Diosar serviñäni.