¿Jiwatanakajj jaktanipjjpachäniti?

¿Kamsasmasa?

¿KUNSA BIBLIAJJ YATICHI?

‘Jiwatanakajj jaktanipjjapuniniwa’ (Hechos 24:15, Machaq Mundon Jakirinakataki).

Familiamat maynejj jiwani ukhajja, Diosaw chuymachtʼätam (2 Corintios 1:3, 4).

Janiw jiwañarojj ajjsarjjätati (Hebreos 2:15).

Jiwatäpki uka familiaranakajajj jaktanipjjaniwa sasaw taqe chuyma confiyäta (Juan 5:28, 29).

Jïsa, uk kimsa toqet uñjañäni:

Diosaw jakañ churirejja. Jehová Diosaw ‘jakañ vida churirejja’ sasaw Bibliajj qhanañchi (Salmo 36:9; Hechos 17:24, 25). Niyakejjay jupajj taqenir jakañ churañatakejj chʼamanïchejja, jiwatanakar jaktayañatakejj chʼamanirakiwa.
Diosajj mä qhawqhaniruw jaktayäna. Wasitat jakapjjañapatakejja, kimsaqallqo jaqenakaw jaktayatäpjjäna sasaw Bibliajj qhanañchi. Uka taypinjja, chachanaka, warminakaw utjäna, kunayman maranïpjjarakïnwa. Yaqhepanakajj ukhakiw jiwapjjäna, ukampis mä chachajj pusi uruw jiwatäjjäna (Juan 11:39-44).
Diosajj jiwatanakar wal jaktayañ muni. Jehová Diosajj jiwañar uñisiwa, mä enemigorjamaw uñjaraki (1 Corintios 15:26). Diosajj jiwatanakar jaktayasaw jiwañar atipjani. Jiwatanakajj wasitat aka oraqen jakasipjjaspa ukwa jupajj muni (Job 14:14, 15).

¿Kunatsa chuymankipstasin jiwtanjja?

Bibliankir aka textonakaw uka jisktʼar qhanañchi: GÉNESIS 3:17-19 ukat ROMANOS 5:12.