2 YATICHÄWI
Rebecajj Jehová Diosaruw kusisiyañ munäna
Rebeca sat warmejj Jehová Diosaruw wal munasïna. Isaac sat esposopas ukhamarakiw Diosar munasïna. Kunjamsa Rebecajj esposopar uñtʼäna ukat kun lurasas Diosar kusisiyäna, ukwa aka yatichäwin yatjjatañäni.
Isaacan tatapajj Abraham satänwa, mamapasti Sara satarakïnwa. Jupanakajj Canaán markanwa jakapjjäna. Uka markankirinakajj janiw Jehová Diosar yupaychapkänti. Ukatwa Abrahamajj Diosar yupaychir mä warmi Isaacatak thaqharapïna. Ukatwa familiaranakapajj jakapkäna uka markaru mä uywatapar khitäna (inas Eliezer sat uywatapar khitchïna). Uka markasti Harán satänwa.
Rebecajj camellonakar um umtʼayañatakejj wal chʼamachasïna
Eliezer chachajja, manqʼañanaka ukat suma regalonakwa 10 camellonakar khumuntäna, ukat ukanak irptʼataw Abrahaman yaqha uywatanakapampejj Harán markar wali jay sarapjjäna. Ukampis ¿kunjamsa Isaacatak mä esposa ajllisapäna? Harán markankirinakajj phujutwa um waysusir sarapjjerïna, uk sumwa Eliezer chachajj yatïna. Ukatwa Harán markar purisajj mä phujur puripjjäna. Ukat Jehová Diosaruw akham mayisïna: “Kawkïr tawaqotejj um mayitajja, ‘akajj umtʼaskakim, camellonakamarus umartʼayarakï’ sitani uka tawaqöniw Jumajj Isaacatak ajllkta uka warmejja” sasa.
Ukhamaruw Rebecajj phujur purinïna. Jupajj wali suma uñnaqtʼani tawaqönwa siw Bibliajja. Kunapachatï Eliezer chachajj “um wajjtʼita” sasin Rebecar säna ukhajja, Rebecajj akham sänwa: “Akajj umtʼaskakim, ukat camellonakamarus umartʼayarakï” sasa. Camellonakajj walja um umirïpjjewa, ukhamajj walja kutiw Rebecajj phujut um wayspachäna. 6 janan utjki uka foto uñjjattʼam. ¿Kunsa Rebecajj luraski?... Jehová Diosajj mayisitapar istʼatapatjja, Eliezer chachajj wal muspharäna.
Eliezer chachajj Rebecar suma regalonakwa churäna. Rebecasti, Eliezer chachampiru ukat mayni uywatanakampiruw utapar irparakïna, kawkhantï familiapajj jakäna ukaru. Eliezer chachajja, kunatsa Abrahamajj Harán markar khitäna ukat kunjamsa Diosajj mayisitapar istʼäna ukwa jupanakar qhanañchäna. Uk istʼasajj Rebecan familiapajj wal kusisïna ukat Isaacamp casarasiñapsa munapjjarakïnwa.
Rebecajj Eliezer chachampiw Canaán markar saräna, ukat ukanwa Isaacamp casarasïna
¿Rebecajj Isaacamp casarasiñ munpachänti?... Jehová Diosaw Eliezer chachar khitäna, uk sum Rebecajj yatïna. Ukatwa “¿Isaacamp casarasir sarasmati?” sasin jisktʼatajja, “jïsa” sasin Rebecajj säna. Ukhamajj Eliezer chachampiw Rebecajj Canaán markar saräna ukat ukanwa Isaacamp casarasïna.
Rebecajj Jehová Diosar istʼapunirïnwa, ukatwa Diosajj jupar wal yanaptʼäna. Ukat tiempompejja, Rebecan familiapatwa Jesusajj nasïna. Jumatï Rebecjama Jehová Diosar istʼäta ukhajja, ukhamarakiw Jupajj wal yanaptʼätam.