Samuelojj kunatï askïki ukpunwa luräna

Jiskʼatpach Samuelojj tabernaculon servïna, ukanwa jakasirakïna. Uka cheqanwa jaqenakajj Jehová Diosar yupaychapjjerïna. ¿Kunatsa Samuelojj ukan jakpachäna uk yatiñ munasmati? Nayraqatjja, Samuelun mamapat parltʼañäni, jupajj Ana satänwa.

Anajja, jan wawanïsajj walpun llakisïna. Ukatwa Jehová Diosan yanaptʼap mayïna. Ukat akham sarakïnwa: “Jumatï mä yoqall wawanïñatak yanaptʼitäta ukhajja, nayajj uka wawarojj jumar serviñapatakiw uywä” sasa. Diosajj mayisitapar istʼänwa, ukatwa Anajj wawanëjjäna. Samuel sasarakiw sutiyäna. Samuelojj niya pusi maranëjjäna ukhajja, tabernaculon serviñapatakiw Anajj apäna. Ukhamatwa arsutapar phoqäna.

Tabernaculonjja, jilïr sacerdotejj Elí satänwa. Ukanjja, pä yoqanakapaw servipjjarakïna. Amtañäni, tabernaculojj Diosar yupaychañatak utänwa, ukhamajj ukan servirinakajj janiw jan walinak lurapjjañapäkänti. Ukampis Elí sacerdoten yoqanakapajj jan walinakwa uka cheqan lurapjjäna. Samuelojj uka jan walinak uñjasajja, ¿ukhamti lurarakpachäna?... Janiwa. Samuelojj kunatï askïki ukpunwa luräna, kunjamtï tatap mamapajj yatichapkäna ukhama.

Elí sacerdotejj wawanakapar ukham lurir uñjasajja, ¿kunsa lurañapäna?... Yoqanakapar cheqañchañapänwa. ¡Diosan utapatsa alisnukjjañapänwa! Ukampis janiw uk lurkänti. Ukatwa Jehová Diosajj Elí sacerdotetakisa yoqanakapatakisa wal colerasïna ukat jupanakar juchañchañwa amtarakïna.

Mä arumajja, Samuelojj ikiskänwa, ukhaw “¡Samuel!” siri mä aru istʼäna. Ukspachaw jupajj Elí sacerdoten ukar tʼijüna. Ukampis “janiw nayajj jawsksmati” sasaw sacerdotejj säna. Samuelojj wasitatwa “¡Samuel!” sir istʼäna. Ukampis kimsïr kutinjja, Elí sacerdotejj akham sänwa: “Jehová Diosäpachawa, mayan jawsätam ukhajja, ‘mirä ampsuma, parlaskakim. Servirimajj istʼasktamwa’ sasaw säta” sasa. Samuelojj ukham luräna, Diosasti akham sarakïnwa: “Elí sacerdoten familiaparuw juchañchäjja, uk jupar yatiyam” sasa. ¿Elí sacerdoter uk yatiyañajj chʼamäpachänti?... Jïsa, chʼamäpachänwa. Ukampis ajjsarkchïnsa, kuntï Jehová Diosajj siskäna ukwa Samuelojj luräna. Ukat Diosan arsutapajj phoqasïnwa, Elí sacerdotesa yoqanakapasa jiwapjjänwa.

Jiwasajj Samuelut yateqasiraksnawa. Jupajj yaqhanakaru jan walinak lurir uñjkchïnsa, kunatï askïki ukpunwa luräna. ¿Jumasti? ¿Samuelut yateqasisajj kunatï askïki uk luraskakïtati? Ukhamtï lurätajja, Jehová Diosasa tatamasa mamamasa wal kusisipjjani.