Sapaki uñjasisajja, ¿kunsa lurasma?

Aka wawajj wali sustjatawa. ¿Jupjam jikjjatasirïtati?... Awisajj taqeniw jupjam uñjastanjja. Nayrajj ukhamarakiw Diosan servirinakapajj ajjsarayasipjjerïna ukat sapakïpkaspas ukhamaw amuyasipjjerïna, sasaw Bibliajj qhanañchi. Maynejj Elías satänwa.

Janïr Jesusajj naskäna ukhaw Eliasajj Israel markan jakasïna. Israelitanakan reyipajj Acab satänwa, esposapasti Jezabel satarakïnwa. Jupanakajj janiw Jehová Diosar yupaychapkänti, jan ukasti Baal sat kʼari diosaruw yupaychapjjäna. Ukatwa uka markankirinakajj uka kʼari diosar yupaychapjjarakïna. Jezabel reinajj jan sinttʼasirïnwa, Jehová Diosan yupaychirinakaparus jiwarayañwa munäna. Eliasarus ukhamaraki. ¿Kunsa Eliasajj lurpachäna?...

Wasararuw sarjjäna, ukansti mä qollu pʼiyaruw imantasïna. ¿Kunatsa uk lurpachäna?... Jehová Diosan yanaptʼasirïtap yatkchïnsa, ¡Eliasajj wal ajjsarayasïna! Cheqansa, Jehová Diosajj wali chʼamaniwa, ukat walja kutirakiw jupar yanaptʼäna. Mä kutejja, alajjpachat nina apayanisaw mayisitapar istʼäna. Ukhamajj janiw Eliasajj ajjsarañapäkänti.

Eliasajj qollun imantatäskäna ukhaw Diosajj akham jisktʼäna: “¿Kuns akan luraskta?” sasa. Eliasajj sarakïnwa: “Nayrajj walja jaqenakaw Jumar yupaychir utjäna. Jichhajj naya sapakëjjtwa. Ukat jiwayañatakiw thaqhasipkitu” sasa. Eliasajj sapakëjjaspas ukhamwa amuyasïna. Ukampis Diosajj akham sänwa: “Janiw sapäktati. Paqallq waranqa jaqenakaw nayar yupaychir utjaski. Jan ajjsaramti. Yaqha lurañanakwa jumar churañ munsma” sasa. Uk istʼasajja, ¿kunjamakis Eliasajj jikjjataspachäna?...

¿Kunsa Eliasan sarnaqäwipat yateqasisma?... Janiw sapakïkasmas ukham amuyasiñamäkiti, ni ajjsarañamäkisa. Diosar munasiri walja amigonakaw utjtam, jupanakajj wal munasipjjaraktamjja. Ukat Jehová Diosasa munasiraktamwa. Jupajj wali chʼamaniwa ukat yanaptʼapunïtamwa. Uk yatiñajj ¿janit kusisiyktam?...